ຫວ່າງມໍ່ໆມານີ້, ຫົວໜ້ານັກອອກແບບຂອງພາລະໜ້າທີ່ຍານອະວະກາດ “ທ່ຽນເວີ້ນ 3” ໄດ້ເປີດເຜີຍໃຫ້ຮູ້ວ່າ: ພາລະໜ້າທີ່ຍານອະວະກາດ “ທ່ຽນເວີ້ນ 3” ຂອງຈີນ ມີແຜນຈະປະຕິບັດໜ້າທີ່ການຍິງສົ່ງ 2 ຄັ້ງໃນລະຫວ່າງປີ 2028 ເພື່ອບັນລຸການເກັບຕົວຢ່າງຂອງດາວອັງຄານກັບຄືນສູ່ໜ່ວຍໂລກ.

    ໃນຖານະເປັນດວງດາວທີ່ຢູ່ຂ້ອນຂ້າງໃກ້ກັບໜ່ວຍໂລກ ແລະ ມີສິ່ງແວດລ້ອມຄ້າຍຄືກັນຫຼາຍທີ່ສຸດ,  ດາວອັງຄານແມ່ນເປົ້າໝາຍທໍາອິດຂອງມວນມະນຸດໃນການບິນອອກຈາກລະບົບໜ່ວຍໂລກ-ດວງຈັນ ແລະ ຄົ້ນຫາອະວະກາດເລິກນັ້ນມາໂດຍຕະຫຼອດ.

    ດາວອັງຄານ ແມ່ນ 1 ໃນ 8 ດາວເຄາະຂອງລະບົບສຸລິຍະ, ໃນຍາມທີ່ຫ່າງໄກຈາກໜ່ວຍໂລກທີ່ສຸດແມ່ນ 400 ລ້ານກິໂລແມັດ ແລະ ໃກ້ທີ່ສຸດປະມານ 55 ລ້ານກິໂລແມັດ. ເຖິງຈະແມ່ນຕອນໃກ້ທີ່ສຸດ ກໍຍັງເປັນ 100 ກວ່າເທົ່າຂອງໄລຍະຫ່າງລະຫວ່າງໜ່ວຍໂລກກັບດວງຈັນ. ດາວສີແດງທີ່ຫ່າງໄກ ແລະ ເລິກລັບດວງນີ້ ໄດ້ເຮັດໃຫ້ມະນຸດເຮົາມີຈິນຕະນາການຢູ່ສະເໝີ.

    ຊຸມປີ 1960, ມະນຸດເຮົາໄດ້ເລີ່ມການສຳຫຼວດດາວອັງຄານ. ນັບມາຮອດປັດຈຸບັນ, ທົ່ວໂລກໄດ້ດຳເນີນໜ້າທີ່ສຳຫຼວດດາວອັງຄານ 40 ກວ່າຄັ້ງ ໂດຍໄດ້ບິນຜ່ານ, ບິນອ້ອມ, ຈອດຢູ່ໜ້າດິນ ແລະ ລາດຕະເວນວັດແທກດາວອັງຄານ.

    ປີ 2021, ຍານອະວະກາດລະຫັດ “ທ່ຽນເວີ້ນ 1” ຂອງຈີນໄດ້ຈອດຢູ່ດາວອັງຄານຢ່າງສຳເລັດຜົນ, ເຮັດໃຫ້ຈີນກາຍເປັນປະເທດທີ 2 ທີ່ລົງຈອດຢູ່ດາວອັງຄານຢ່າງສຳເລັດຜົນ. ຜົນງານດ້ານວິທະຍາສາດທີ່ໄດ້ສ້າງມາເລື້ອຍໆນັ້ນ ໄດ້ຂະຫຍາຍຄວາມຮັບຮູ້ຂອງມະນຸດທີ່ມີຕໍ່ວິວັດທະນາການ, ກົດເກນການປ່ຽນແປງດ້ານສິ່ງແວດລ້ອມ ແລະ ພູມສັນຖານຕົ້ນຕໍຂອງດາວອັງຄານເປັນຕົ້ນ.

    ຈີນຈະບຸກທະລຸຄວາມຫຍຸ້ງຍາກລະດັບໂລກຄື “ການເກັບເອົາຕົວຢ່າງຢູ່ດາວອັງຄານແລ້ວກັບຄືນສູ່ໜ່ວຍໂລກຄືແນວໃດ”? ຕາມຂ່າວລາຍງານວ່າ:  ໜ້າວຽກ “ທ່ຽນເວີ້ນ 3” ຈະຖືເອົາການຄົ້ນຫາຮ່ອງຮອຍຂອງສິ່ງທີ່ມີຊິດເປັນເປົ້າໝາຍທາງວິທະຍາສາດທໍາອິດ, ຈະບຸກທະລຸເຕັກນິກສຳຄັນຕ່າງໆ ເຊັ່ນ: ການເກັບຕົວຢ່າງຢູ່ໜ້າດິນດາວອັງຄານ, ບິນຂຶ້ນຈາກໜ້າດິນດາວອັງຄານ, ເຊື່ອມຈອດກັນຢູ່ຕາມວົງໂຄຈອນດາວອັງຄານ, ປົກປ້ອງດາວເຄາະ ແລະອື່ນໆ ພ້ອມທັງບັນລຸເປົ້າໝາຍທີ່ເຮັດໃຫ້ຕົວຢ່າງຈາກດາວອັງຄານກັບຄືນສູ່ໜ່ວຍໂລກໄດ້.

    ພ້ອມດຽວກັນນັ້ນ, ໜ້າວຽກ “ທ່ຽນເວີ້ນ 3” ຍັງຈະດຳເນີນການຮ່ວມມືສາກົນໃນ 3 ດ້ານ ຄື: ການບັນຈຸເຄື່ອງວັດແທກຕ່າງປະເທດ, ການແບ່ງປັນຕົວຢ່າງ-ຂໍ້ມູນຂ່າວສານ ແລະ ການວາງແຜນຮ່ວມກັນຄົ້ນຄວ້າໃນອະນາຄົດ.

    ຈາກຍານອະວະກາດບັນທຸກຄົນບິນອອກຈາກໜ່ວຍໂລກ ຮອດການບິນໄປສູ່ດວງຈັນ ດາວອັງຄານ ແລະ ບິນໄປສູ່ອະວະກາດເລິກ, ພະນັກງານການບິນອະວະການທັງຫຼາຍຂອງຈີນໄດ້ສ້າງປະຫວັດສາດໃໝ່ຢ່າງບໍ່ຢຸດຢັ້ງ ແລະ ຊຸກຍູ້ໃຫ້ຜົນງານດ້ານອະວະກາດ ປະກອບສ່ວນເຂົ້າໃນການສ້າງອະນາຄົດທີ່ດີງາມກວ່າເກົ່າ.