|
ແມ່ເຖົ້າເຊ້ຍຊູສິນຖືບັດຢັ້ງຢືນຜູ້ລອດຕາຍຈາກເຫດການສັງຫານໂຫດ
ທີ່ນານກິ່ງ
ແມ່ເຖົ້າເຊ້ຍຊູສິນ ປີນີ້ອາຍຸ77ປີ,ແມ່ນໜຶ່ງໃນຜູ້ລອດຕາຍຈຳນວນບໍ່ຫຼາຍຈາກມະຫັນຕະໄພເທື່ອນັ້ນ.ເວລາໃດຫວນຄຶດເຖິງຕອນຮຸ່ງເຊົ້າລະດູໜາວເມື່ອ69ປີກ່ອນ.ແມ່ເຖົ້າເຊ້ຍຊູສິນ ເວົ້າຢ່າງສະອຶກສະອື້ນວ່າ:ພຽງແຕ່ຕອນເຊົ້າດຽວເທົ່ານັ້ນ,ຜູ້ຮຸກຮານຂອງຍີ່ປຸ່ນກໍໄດ້ທຳລາຍຄອບຄົວທີ່ມີ9ຄົນແລະມີຄວາມສຸກຂອງແມ່ເຖົ້າ ຢ່າງສິ້ນເຊິ່ງ.ແມ່ເຖົ້າເຊ້ຍຊູສິນເວົ້າວ່າ:
"ມື້ນັ້ນ,ທະຫານຍີ່ປຸ່ນໄດ້ເຄາະປະຕູເຮືອນຂ້ອຍໝົດແຮງ,ພໍ່ຂ້ອຍໄຂປະຕູ,ພວກທະຫານຍີ່ປຸ່ນກໍ່ຫຼູ່ເຂົ້າເຮືອນຂ້ອຍກໍຍິງພໍ່ຂ້ອຍຕາຍກັບບ່ອນ.ເວລານັ້ນ,ແມ່ຂ້ອຍອູ້ມນ້ອງຜູ້ໜຶ່ງທີ່ຍັງກິນນົມຢູ່ລີ້ຢູ່ກ້ອງໂຕະ,ແມ່ຂ້ອຍຖືກພວກມັນລາກອອກຈາກກ້ອງໂຕະ,ພວກມັນໃຊ້ກະປີ່ແທງນ້ອງຂອງຂ້ອຍຕາຍ,ແລ້ວຈີກເສື້ອຜ້າແມ່ຂ້ອຍຈົນກ້ຽວ.ເອື້ອຍນ້ອງພວກຂ້ອຍອີກ4ຄົນລີ້ຢູ່ເທິງຕຽງ,ພວກມັນລາກເອົາເອື້ອຍກົກຂ້ອຍໄປໄວ້ຢູ່ເທິງໂຕະ,ຂົ່ມຂືນເອື້ອຍຜູ້ທີສອງຂອງຂ້ອຍຢູ່ເທິງຕຽງ,ຍັງເອົາກະປີ່ ແທງຂ້ອຍຕັ້ງສາມບາດ."
ຕອນເຊົ້າວັນທີ13ທັນວາປີ2004,ຢູ່ຫໍລະລຶກພີ່ນ້ອງຮ່ວມຊາດຜູ້ປະສົບເຄາະຮ້າຍ
ຍ້ອນເຫດການສັງຫານໂຫດທີ່ນານກິ່ງຂອງກອງທະຫານຍີ່ປຸ່ນຜູ້ຮຸກຮານຈີນ,
ແມ່ເຖົ້າເຊ້ຍຊູສິນຜູ້ລອດຕາຍຈາກເຫດການສັງຫານໂຫດທີ່ນານກິ່ງໄດ້ໄວ້ອາ
ໄລເຖິງດວງວິນຍານຂອງຜູ້ປະສົບເຄາະຮ້າຍໃນເຫດການດັ່ງກ່າວ
ກໍແມ່ນເປັນແນວນີ້ແຫຼະ,ໃນຕອນເຊົ້າວັນທີ13ທັນວາປີ1937,ທະຫານຍີ່ປຸ່ນກອງໜຶ່ງໄດ້ບຸກເຂົ້າເຮືອນຂອງແມ່ເຖົ້າເຊ້ຍຊູສິນ,ເຂັ່ນຂ້າ7ຄົນໃນຈຳນວນ9ຄົນຂອງຄອບຄົວແມ່ເຖົ້າເຊ້ຍຊູສິນຢ່າງບໍ່ມີເຫດຜົນຈັກເມັດ.ໃນນັ້ນ,ແມ່ແລະເອື້ອຍສອງຄົນຂອງແມ່ເຖົ້າເຊ້ຍຊູສິນຖືກພວກທະຫານຍີ່ປຸ່ນຂົ່ມຂືນຊຳເລົາຕາມໆກັນແລ້ວຖືກຂ້າຖີ້ມ.ໝົດຄອບຄົວມີແຕ່ນາງເຊ້ຍຊູສິນທີ່ອາຍຸ8ປີແລະນາງເຊ້ຍຊູຢຸນທີ່ອາຍຸ4ປີລອດຕາຍເທົ່ານັ້ນ.ພາຍຫຼັງທະຫານຍີ່ປຸ່ນໄປແລ້ວ,ເດັກຍິງສອງຄົນອາໄສແຕ່ເຂົ້າຂົ້ວແລະເຂົ້າແຫ້ມພຽງໜ້ອຍດຽວໃນເຮືອນ,ໄດ້ດຳລົງຊີວິດຢ່າງລຳບາກກາກກຳເປັນເວລາ14ມື້ຢູ່ກອງຊາກສົບຍາດພີ່ນ້ອງ,ຈົນຮອດຖືກຜູ້ຢູ່ ຂ້າງບ້ານພົບເຫັນຈິ່ງໄດ້ຮັບການກອບກູ້.
60ກວ່າປີມານີ້,ເມື່ອຄິດເຖິງປະສົບການຕອນນັ້ນ,ແມ່ເຖົ້າເຊ້ຍຊູສິນກໍນ້ຳຕາຍຶມອອກ,ໃນທີ່ສຸດໄດ້ເປັນພະຍາດຕາຢ່າງໜັກໜ່ວງ.ແຕ່ວ່າ,ເລື່ອງທີ່ເຮັດໃຫ້ແມ່ເຖົ້າຄຽດແຄ້ນທີ່ສຸດນັ້ນແມ່ນປະເທດທີ່ກໍ່ໄພພິບັດບັ້ນນີ້ພັດໄດ້ສົ່ງຂ່າວອອກມາເລື້ອຍໆວ່າຈະບໍ່ຮັບຮູ້ປະຫວັດສາດຕອນນັ້ນ ,ພວກປີກຂວາຍີ່ປຸ່ນຈຳນວນໜຶ່ງຈົນກະທັ້ງໃສ່ຮ້າຍປ້າຍສີວ່າແມ່ເຖົ້າເຊ້ຍຊູສິນ ຕັ້ງແກ້ງປັ່ນແຕ່ງປະຫວັດສາດ.ແມ່ເຖົ້າເຊ້ຍຊູສິນເວົ້າວ່າ,ທະແນມແຕ່ເພິ່ນຍັງມີຊີວິດຢູ່ມື້ໜຶ່ງ,ແມ່ເຖົ້າກໍເປັນສັກຂີພິຍານທີ່ຍັງມີຊີວິດຢູ່ເພື່ອພິສູດການສັງຫານໂຫດຂອງຍີ່ປຸ່ນທີ່ນານກິ່ງ,ແມ່ເຖົ້າກໍຈະເລົ່າເລື່ອງຈິງປະຫວັດສາດສູ່ປະຊາຊົນທົ່ວໂລກຟັງ.
1 2 3 4 5
|
