|
ປີນີ້ແມ່ນສົງຄາມຈີນຕໍ່ຕ້ານຍີ່ປຸ່ນແລະສົງຄາມຕ້ານຟັດຊິດໂລກໄດ້ຮັບໄຊຊະນະຄົບຮອບ60ປີ.ໃນສົງຄາມໂລກຄັ້ງທີສອງ, ປະເທດກໍ່ສົງຄາມເກືອບໝົດທຸກປະເທດລ້ວນແຕ່ມີພາຫະນະຫຼືແຜນການຜະລິດອາວຸດເຊື້ອໂຣກ.ແຕ່ວ່າ,ມີແຕ່ຍີ່ປຸ່ນເທົ່ານັ້ນໄດ້ໃຊ້ອາວຸດເຊື້ອໂຣກໃນສົງຄາມ.ສົງ ຄາມເຊື້ອໂຣກທີ່ກອງທະຫານຍີ່ປຸ່ນກໍ່ຂຶ້ນນັ້ນໄດ້ນຳເອົາໄພພິບັດອັນໜັກໜ່ວງມາສູ່ປະຊາຊົນຈີນ.ພວກເຮົາຈະພາທ່ານພ້ອມກັນຫວນຄືນປະຫວັດສາດທີ່ເຮັດໃຫ້ຄົນຟັງແລ້ວຮູ້ສຶກຂົນພອງສະຫຍອງເກົ້າ.
ພໍ່ເຖົ້າວາງປິງຫົງ ປີນີ້ອາຍຸ79ປີ, ເປັນຊາວບ້ານຂອງບ້ານສົງຊ່ານເມືອງຈິ່ນຮວາແຂວງເຈີ້ຈ່ຽງ ພາກຕາເວັນອອກຂອງຈີນ.ພໍ່ເຖົ້າແມ່ນໜຶ່ງໃນຜູ້ລອດຕາຍບໍ່ຫຼາຍໃນປັດຈຸບັນຈາກສົງຄາມເຊື້ອໂຣກທີ່ຍີ່ປຸ່ນກໍ່ຂຶ້ນ.ເຖິງວ່າເຫດການໜ້າສັງເວດໃນເມື່ອກ່ອນ ໄດ້ຜ່ານໄປ60ກວ່າປີແລ້ວກໍຕາມ,ແຕ່ກ່ຽວກັບສະພາບການໃນຄາວນັ້ນ,ພໍ່ເຖົ້າຍັງຈື່ໄດ້ຢ່າງແຈ່ມແຈ້ງ.ປີ1942,ຍ້ອນຖືກຜົນສະທ້ອນຈາກສົງຄາມ,ພໍ່ເຖົ້າວາງປີງຫົງທີ່ອາຍຸ16ປີໃນຄາວນັ້ນຈຳເປັນຕ້ອງເຊົາຮຽນແລະພັກຢູ່ເຮືອນ.ເລີ່ມແຕ່ເດືອນກັນຍາປີນັ້ນມາ,ພໍ່ເຖົ້າໄດ້ເຫັນຍົນຍີ່ປຸ່ນບິນເວີ່ນໄປມາຢູ່ເທິງທ້ອງຟ້າຂອງທ້ອງຖິ່ນຕົນ.ຍົນບິນຕ່ຳຫຼາຍ,ເລື່ອງທີ່ເຮັດໃຫ້ຊາວບ້ານຮູ້ສຶກປະຫຼາດໃຈນັ້ນແມ່ນ,ຍົນເຫຼົ່ານີ້ບໍ່ໄດ້ຖີ້ມລະເບີດ, ຫາກໄດ້ໂຮຍແປ້ງສີຂາວ.ພາຍລຸນມາ,ພະຍາດຕິດແປດທີ່ແປກສະຫຼາດຊະນິດໜຶ່ງກໍເລີຍແຜ່ລະບາດໃນທ້ອງຖິ່ນນີ້,ຊາວບ້ານທັງຫຼາຍເອີ້ນມັນເປັນພະຍຸ.ເພື່ອໜີໄພພະຍຸ,ພໍ່ເຖົ້າວາງປິງຫົງພ້ອມກັນກັບອ້າຍນ້ອງກໍຟ້າວໜີຈາກບ້ານ.ພໍ່ເຖົ້າຫວນຄືນວ່າ:
"ວັນທີ29ພະຈິກປີ1942,ແມ່ເຖົ້າຜູ້ໜຶ່ງທີ່ຢູ່ບ້ານໃກ້ມາເຮືອນຂ້ອຍແລະບອກແມ່ຂ້ອຍວ່າ:ຢູ່ບ້ານເຮົາ,ພະຍຸໄດ້ແຜ່ລະບາດຢ່າງຮ້າຍແຮງແລ້ວ,ມີຫຼາຍໆຄົນໄດ້ຕາຍຍ້ອນພະຍຸ.ເຈົ້າມີລູກຫຼາຍຄົນ,ເປັນຫຍັງບໍ່ໃຫ້ພວກເຂົາເຈົ້າໜີໄປບ້ານອື່ນ.ໃນຄາວນັ້ນ,ແມ່ຂ້ອຍຍັງລັ່ງເລໃຈຢູ່,ມື້ລຸນມາ,ກໍໄດ້ຍິນຂ່າວວ່າ,ແມ່ເຖົ້າຜູ້ທີ່ມາເຮືອນຂ້ອຍນັ້ນໄດ້ຕາຍຍ້ອນພະຍຸໃນມື້ຄືນນີ້.ດັ້ງນັ້ນ,ແມ່ຂ້ອຍຈິ່ງໃຈຮ້ອນຫຼາຍເລີຍຟ້າວໃຫ້ອ້າຍນ້ອງສອງຄົນພວກເຮົາໄປບ້ານອື່ນເພື່ອໜີໄພພະຍຸ."
ຫຼັງຈາກນັ້ນ1ເດືອນ,ເມື່ອສະພາບພະຍຸໄດ້ຄ່ອຍໆສະຫງົບລົງ,ພໍ່ເຖົ້າວາງປິງຫົງຈິ່ງໄດ້ເມືອບ້ານ.ແຕ່ໃນຕອນບ່າຍມື້ກັບບ້ານ,ພໍ່ເຖົ້າກໍ່ຮູ້ສຶກບໍ່ສະບາຍ.ພໍ່ເຖົ້າໄດ້ຫວນຄືນວ່າ:"ຫົວທີ,ຂ້ອຍເປັນໄຂ້ຮ້ອນ,ຢ້ານໜາວ,ຖັດມາ,ຂາເບື້ອງຂວາມີບ່ອນໜຶ່ງໃຄ່ຂຶ້ນ,ທັງຂະຫຍາຍໄວແລະເຈັບຫຼາຍ."
ພາຍລຸນມາ,ພໍ່ເຖົ້າວາງປີງຫົງເລີຍສະຫຼົບໄປ.ຍ້ອນວ່າໃນບ້ານຍັງມີຫຼາຍຄົນມີອາການເຈັບຄືກັນກັບພໍ່ເຖົ້າວາງປີງຫົງ,ສະນັ້ນ,ແມ່ຂອງເພິ່ນເລີຍຮຽນເອົາບົດຮຽນຂອງຜູ້ອື່ນ,ໃຫ້ພໍ່ເຖົ້າກິນເຫຼົ້າຂາວໜ້ອຍໜຶ່ງ,ແລ້ວໃຊ້ເຂັມແທງບ່ອນໃຄ່ເທິງຂາ,ບີບໃຫ້ເລືອດອອກແລ້ວເອົາເຫຼົ້າຂາວທາໃສ່ບ່ອນເຈັບອີກ.ເຮັດແນວນີ້ເປັນສອງມື້ສາມຄ່ຳ,ພໍ່ເຖົ້າວາງປີງຫົງໄດ້ລອດຕາຍຢ່າງອັດສະຈັນ.ຈາກນັ້ນຫຼາຍປີ,ພໍ່ເຖົ້າຈິ່ງຮູ້ວ່າທີ່ຈິງແລ້ວຕົນເອງເປັນຜູ້ຖືກເຄາະຮ້າຍຈາກສົງຄາມເຊື້ອໂຣກຄືກາລະໂຣກທີ່ກອງທະຫານຍີ່ປຸ່ນກໍ່ຂຶ້ນ.
ພໍ່ເຖົ້າວາງປິງຫົງເປັນຜູ້ໂຊກດີຫຼາຍ,ສ່ວນພໍ່ແມ່ປະຊາຊົນຈີນອື່ນໆນັບບໍ່ຖ້ວນພັດໄດ້ ລາຈາກໂລກໄປຍ້ອນສົງຄາມເຊື້ອໂຣກຂອງກອງທະຫານຍີ່ປຸ່ນ.ຕາມສະເໜີວ່າ,ຢູ່ບ້ານສົງຊ່ານຂອງພໍ່ເຖົ້າວາງປິງຫົງໄດ້ມີ403ຄົນຕາຍຍ້ອນກາລະໂຣກ,ນອກນີ້,ກາລະໂຣກໄດ້ແຜ່ລາມໄປຮອດ24ບ້ານ,ໃນທົ່ວເມືອງຈິ່ນຮວາໄດ້ມີ6ພັນກວ່າຄົນຕາຍຍ້ອນສົງຄາມເຊື້ອໂຣກ.ຕົວເລກດັ່ງກ່າວພຽງແຕ່ແມ່ນຈຳນວນຜູ້ຕາຍທີ່ສຳຫຼວດ ຊື່ແລະນາມສະກຸນໄດ້,ສ່ວນ ຜູ້ຕາຍທີ່ບໍ່ຮູ້ຊື່ແລະສຳຫຼວດບໍ່ໄດ້ບໍ່ວວມຢູ່ໃນຕົວເລກດັ່ງກ່າວ.
ພໍ່ເຖົ້າຜູ້ໜຶ່ງທີ່ຖືກທຳຮ້າຍຂອງບ້ານສົງຊ່ານພວມເຫຼົ່າມະຫັນຕະໄພກາລະໂຣກໃນສະໄໝຍີ່ປຸ່ນຮຸກຮານຈີນສູ່ຄົນທັງຫຼາຍຟັງ.
1 2 3 4 5 6 7 8
|
