|
ອີງຕາມຂໍ້ມູນເອກະສານທີ່ເຜີຍຄວາມລັບຈຳນວນໜຶ່ງຫຼັງສົງຄາມແລະການຄົ້ນຄວ້າຂອງຜູ້ຊ່ຽວຊານ,ໃນໄລຍະກອງທະຫານຍີ່ປຸນຮຸກຮານຈີນແຕ່ປີ1940ຫາປີ1942,ພວກມັນໄດ້ກໍ່ສົງຄາມເຊື້ອໂຣກຢ່າງຂະໜາດໃຫຍ່3ເທື່ອຢູ່ຈີນ,ຄືຢູ່ນະຄອນນິງໂປແຂວງເຈີ້ຈ່ຽງ,ເມືອງສາງເຕີແຂວງຫູນານ ພາກກາງຂອງຈີນ,ແລະເຂດແຄມທາງລົດໄຟທີ່ເຊື່ອມຕໍ່ແຂວງເຈີ້ຈ່ຽງກັບແຂວງຈ່ຽງຊີ.ສ່ວນສົງຄາມເຊື້ອໂຣກຂະໜາດນ້ອຍອື່ນໆຍິ່ງນັບບໍ່ຖ້ວນ.ຕາມສະຖິຕິ,ພຽງແຕ່ຊາວຈີນທີ່ຕາຍຍ້ອນສົງຄາມເຊື້ອໂຣກຂອງກອງທະຫານຍີ່ປຸ່ນທີ່ມີສຳເນົາເອກະສານໃຫ້ກວດກາໄດ້ນັ້ນກໍມີເຖິງ2ແສນ7ໝື່ນຄົນ.
ວັນທີ22ມີນາປີ2005,ສານຊັ້ນສູງໂຕກຽວໄດ້ສຳເລັດການໄຕ່ສວນຄະດີກ່າວຟ້ອງຂອງຜູ້ຖືກທຳຮ້າຍຈາກສົງຄາມເຊື້ອໂຣກຂອງກອງທະຫານເລກ731ຂອງກອງທະຫານຍີ່ປຸ່ນຮຸກຮານຈີນ.ໃນມື້ດຽວກັນ,ຜູ້ຕາງໜ້າຂອງຜູ້ຖືກທຳຮ້າຍໄດ້ຈັດການແຫ່ຂະບວນຢູ່ໂຕກຽວ,ທວງໃຫ້ລັດຖະບານຍີ່ປຸ່ນຕ້ອງກ້າວປະເຊີນກັບປະຫວັດສາດ,ສຳຫຼວດສະພາບການຂອງຜູ້ຖືກທຳຮ້າຍຢ່າງເອົາຈິງເອົາຈັງ,ຂໍຂະມາໂທດແລະໃຊ້ແທນຕໍ່ຜູ້ຖືກທຳຮ້າຍ.
ແຕ່ວ່າ,ໃນໄລຍະຍາວນານມານີ້,ລັດຖະບານຍີ່ປຸ່ນພັດຫຼົບຫຼີກໂທດກຳຂອງກອງທະຫານຍີ່ປຸ່ນຜູ້ຮຸກຮານຈີນທີ່ກໍ່ສົງຄາມເຊື້ອໂຣກແລະດຳເນີນການທົດລອງເຊຶ້ອໂຣກຕໍ່ຄົນ,ບໍ່ປະຕິເສດແລະກໍ່ບໍ່ຮັບຮອງ.ສະນັ້ນ,ເພື່ອຍຶດຖືຄວາມເປັນທຳຕໍ່ພີ່ນ້ອງຮ່ວມຊາດຈີນທີ່ຖືກທຳຮ້າຍແລະເສຍຊີວິດໃນສົງຄາມເຊື້ອໂຣກ.ຫວ່າງ8ປີກ່ອນ,ປະຊາຊົນຈີນໄດ້ຈັດຕັ້ງຄະນະຝ່າຍໂຈດກ່າວຟ້ອງທວງເອົາຄ່າໃຊ້ແທນຂອງຊາວຈີນຜູ້ຖືກທຳຮ້າຍໃນສົງຄາມເຊື້ອໂຣກຂອງກອງທະຫານຍີ່ປຸ່ນຜູ້ຮຸກຮານຈີນ.ທວງໃຫ້ລັດຖະບານຍີ່ປຸ່ນຮັບຮູ້ປະຫວັດສາດ,ແລະຫາບແບກໜ້າທີ່ຮັບຜິດຊອບຕໍ່ສົງຄາມ.ແຕ່ຈົນຮອດປັດຈຸບັນ,ສານຍີ່ປຸ່ນຍັງບໍ່ທັນໄດ້ທຳການຕັດສິນຢ່າງທ່ຽງທຳເທື່ອ.ຊາວຈີນເປັນຈຳນວນຫຼາຍທີ່ບໍ່ມີໂທດຫຍັງໄດ້ຕາຍຍ້ອນສົງຄາມເຊຶ້ອໂຣກທີ່ກອງທະຫານຍີ່ປຸ່ນກໍ່ຂຶ້ນ.ພວກຜູ້ລອດຕາຍຈາກສົງຄາມເຊື້ອໂຣກທີ່ນັບມື້ນັບ ແກ່ຊະລາຍັງຄົງຄອຍຖ້າຄວາມເປັນທຳທີ່ມາຊ້າ.
1 2 3 4 5 6 7 8
|
