|
ນະຄອນລານໂຈ່ວແມ່ນເມືອງເອກຂອງແຂວງກ່ານຊູ້ ພາກຕາເວັນຕົກສຽງເໜືອຂອງຈີນ.ເມື່ອເວົ້າເຖິງນະຄອນລານໂຈ່ວ,ຄົນຈີນຫຼາຍໆຄົນຍ່ອມຈະຄຶດເຖິງໝີ່ດຶງໃສ່ຊີ້ນງົວເຊິ່ງເປັນອາຫານທີ່ມີສີສັນພິເສດກວ່າໝູ່ຂອງນະຄອນດັ່ງກ່າວ.
ຢູ່ນະຄອນລານໂຈ່ວ,ຢູ່ໃສກໍໄດ້ເຫັນຮ້ານຂາຍໝີ່ດຶງໃສ່ຊີ້ນງົວຂອງຊາວມຸສລິມ,ໃນຮ້ານຂາຍໝີ່ໄດ້ເຕັມໄປດ້ວຍລູກຄ້າ,ກິ່ນຫອມຂອງໝີ່ດຶງໃສ່ຊີ້ນງົວໄດ້ສົ່ງອອກມາຈາກຮ້ານ,ອັນໄດ້ກາຍເປັນສະພາບທີ່ໄດ້ເຫັນທຸກໆຕອນຮຸ່ງເຊົ້າຢູ່ເມືອງລານໂຈ່ວ.ບໍ່ວ່າຄົນໄປເຂົ້າການຢ່າງຟ້າວຟັງ,ຫຼືວ່າຜູ້ເຖົ້າຜູ້ແກ່ທີ່ທ່ຽວຫຼີ້ນໃນຕອນເຊົ້າ,ນັກຮຽນທີ່ພາຍກະເປົາໜັງສືໄປເຂົ້າຮຽນ,ລ້ວນແຕ່ມັກກິນໝີ່ດຶງທີ່ເປັນອາຫານເຊົ້າ,ແລ້ວຈິ່ງເລີ່ມເຮັດວຽກຂອງໃຜຂອງລາວໃນມື້ໜຶ່ງ.
ໃນໝູ່ຄົນທີ່ກິນໝີ່ໃນຮ້ານຂາຍໝີ່,ນັກຂ່າວໄດ້ເຫັນໝົດຄອບຄົວຂອງທ່ານສືເຟິ່ງເລື້ອຍໆ.ທ່ານສືເຟິ່ງເຮັດວຽກຢູ່ສຳນັກວັດທະນະທຳນະຄອນລານໂຈ່ວ.ເມຍຂອງທ່ານເປັນສະມຸບັນຊີ,ນາງສືຢົງຢົງ ລູກສາວຂອງທ່ານພວມຮຽນຢູ່ມະຫາວິທະຍາໄລລານໂຈ່ວ.ປັດຈຸບັນ,ເງື່ອນໄຂຊີວິດການເປັນຢູ່ດີຂຶ້ນແລ້ວ,ໄປກິນເຂົ້າຢູ່ຮ້ານອາຫານຈັກຄາບແມ່ນເລື່ອງທຳມະດາ.ແຕ່ວ່າ,ໝົດຄອບຄົວຍັງຄົງເຫັນວ່າໝີ່ດຶງໃສ່ຊີ້ນງົວແມ່ນຖືກປາກທີ່ສຸດ.ທ່ານສືເຟິ່ງເວົ້າວ່າ:
"ຂ້າພະເຈົ້າໄດ້ດຳລົງຊີວິດຢູ່ນະຄອນລານໂຈ່ວເປັນເວລາ30ກວ່າປີແລ້ວ,ມັກກິນໝີ່ດຶງໃສ່ຊີ້ນງົວເກືອບທຸກມື້,ໂດຍສະເພາະແມ່ນເມື່ອໄປເຮັດວຽກຢູ່ຕ່າງຖິ່ນ,ຫຼາຍມື້ບໍ່ໄດ້ກິນໝີ່ດຶງໃສ່ຊີ້ນງົວ,ເມື່ອກັບມາຮອດນະຄອນລານໂຈ່ວແລ້ວ,ກໍຟ້າວຢາກໄປກິນໝີ່ດຶງໃສ່ຊີ້ນງົວໂລດ."
ໝີ່ດຶງໃສ່ຊີ້ນງົວສ່ວນຫຼາຍມັກໃຊ້ຖ້ວຍໃຫຍ່,ໃນຖ້ວຍມີສີສີ່ຊະນິດຄືແກງຊີ້ນງົວທີ່ສີສົດໃສ,ຕ່ອນຜັກກາດຫົວສີຂາວ,ນ້ຳມັນໝາກເຜັດສີແດງ,ແລະຜັກຫອມສີຂຽວ,ສີສັນພິເສດນີ້ພາໃຫ້ຄົນເບິ່ງແລ້ວກໍຢາກກິນ.ທ່ານສືເຟິ່ງເວົ້າວ່າ,ເມື່ອກິນໝີ່ດຶງທີ່ໃສ່ໝາກເຜັດ,ບາງທີຈົນເຫື່ອໄຫຼໄຄຍ້ອຍ,ຈັ່ງແມ່ນສະບາຍອົກສະບາຍໃຈແທ້,ໝີ່ດຶງຖ້ວຍໃຫຍ່ໆນີ້ເສຍເງິນພຽງ2ຢວນປາຍເທົ່ານັ້ນ.
1 2 3
|
