|
 ຕາມການສຳຫຼວດກ່ຽວກັບສະພາບທາດບຳລຸງແລະສຸຂະພາບຂອງສາທາລະນະຊົນທີ່ອົງການທີ່ກ່ຽວຂ້ອງຂອງຈີນປະກາດໃນຫວ່າງມໍ່ໆນີ້ສະແດງໃຫ້ເຫັນວ່າ, ໄທບ້ານຢູ່ເຂດພາກກາງແລະພາກຕາເວັນຕົກຂອງຈີນໄດ້ຮັບເອົາທາດບຳລຸງບໍ່ພຽງພໍໂດຍທົ່ວໄປຍ້ອນທຸກຍາກແລະກິນອາຫານຢ່າງດຽວ; ສ່ວນໄທເມືອງຢູ່ເຂດເສດຖະກິດພັດທະນາທີ່ຢູ່ແຄມທະເລແລະຕົວເມືອງສ່ວນຫຼາຍພັດປະເຊີນກັບບັນຫາຮັບເອົາທາດບຳລຸງຫຼາຍເກີນຄວນຫຼືທາດບຳລຸງບໍ່ດຸນດຽງກັນ. ບໍ່ວ່າບັນຫາຫຍັງ, ກໍລ້ວນແຕ່ຈະມີຜົນສະທ້ອນບໍ່ດີຕໍ່ສຸຂະພາບທັງນັ້ນ. ສະນັ້ນ, ໃນດ້ານປົວແປງທາດບຳລຸງຂອງສາທາລະນະຊົນນັ້ນ, ຜູ້ຊ່ຽວຊານມີຂໍ້ສະເໜີຫຍັງແດ່? ລັດຖະບານຈີນໄດ້ໃຊ້ມາດຕະການຫຍັງແດ່?
ທ່ານຈຽງຈ້ຽງພິງ ຜູ້ຊ່ຽວຊານດ້ານທາດບຳລຸງຂອງຈີນຊີ້ອອກວ່າ, ການຮັບເອົາທາດບຳລຸງບໍ່ພຽງພໍຫຼືຮັບເອົາທາດບຳລຸງຫຼາຍເກີນໄປນັ້ນ, ລ້ວນແຕ່ແມ່ນປະກົດການທີ່ມີສະພາບທາດບຳລຸງບໍ່ດີ. ປັດຈຸບັນ, ສະພາບທາດບຳລຸງບໍ່ດີໄດ້ກະທົບກະເທືອນເຖິງສຸຂະພາບຂອງພົນລະເມືອງຈີນໂດຍກົງແລ້ວ.
ພະຍາດຊຳເຮື້ອຍ້ອນການກິນໄດ້ເພີ່ມຂຶ້ນຢ່າງວ່ອງໄວ, ຕົວຢ່າງຄືພະຍາດເສັ້ນເລືອດຫົວໃຈ, ເລືອດດັນສູງ, ພະຍາດເບົາຫວານ, ແລະພະຍາດອ້ວນເປັນຕົ້ນ. ຜູ້ເປັນພະຍາດເລືອດດັນສູງຂອງປະເທດຈີນມີ 160 ລ້ານຄົນ, ຜູ້ໜັກເກີນໄປແລະຄົນອ້ວນບວກເຂົ້າກັນແລ້ວມີເກືອບ 30% ຂອງຍອດຈຳນວນປະຊາກອນ. ສະພາບທາດບຳລຸງຂອງເດັກນ້ອຍແຮ່ງເຮັດໃຫ້ຄົນບໍ່ພໍໃຈນຳ, ລູກຜູ້ດຽວໃນຄອບຄົວໃນເມືອງຍ້ອນເລືອກກິນ ແລະມີທາດບຳລຸງຫຼາຍເກີນໄປ, ເຮັດໃຫ້ຈຳນວນເດັກນ້ອຍອ້ວນພວມເພີ່ມຂຶ້ນ, ພ້ອມກັນນັ້ນ, ອາຍຸເປັນພະຍາດໄວກາງຄົນບາງຊະນິດກໍໄດ້ເກີດຂຶ້ນກ່ອນໄວຫຼາຍປີ.
1 2 3
|
