|
ປີ 2002, ຢູ່ເມືອງລານໂຈວແຂວງການຊູ້ ພາກຕາເວັນຕົກສຽງເໜືອຂອງຈີນ, ສູນທາດບຳລຸງແລະການພັດທະນາສາທາລະນະຊົນແຫ່ງຊາດຈີນໄດ້ເລີ່ມດຳເນີນວຽກງານທົດລອງເສີມທາດບຳລຸງໃສ່ແປ້ງເຂົ້າບະເລ. ໂດຍແນ່ໃສ່ສະພາບທາດບຳລຸງຂອງພົນລະເມືອງທ້ອງຖິ່ນ, ໃນແປ້ງເຂົ້າບະເລເສີມໄດ້ເພີ່ມທາດບຳລຸງຕ່າງໆເຊັ່ນທາດເຫຼັກ ທາດສັງກະສີ ແລະວີຕາມິນEເປັນຕົ້ນ. ຊາວກະສິກອນ 1 ພັນກວ່າຄົນຢູ່ຊານເມືອງລານໂຈວໄດ້ກິນແປ້ງເຂົ້າບະເລທີ່ເສີມທາດບຳລຸງນັ້ນດ້ວຍຄວາມສະໝັກໃຈ.
 ໃນເວລາຫາກໍ່ເລີ່ມຕົ້ນ, ຊາວກະສິກອນທັງຫຼາຍບໍ່ຮູ້ສຶກວ່າ, ແປ້ງເຂົ້າບະເລເສີມມີຫຍັງຕ່າງກັນກັບແປ້ງເຂົ້າບະເລທຳມະດາ, ຍ້ອນວ່າລົດຊາດຄືກັນໝົດ. ແຕ່ຫຼັງຈາກກິນແປ້ງເຂົ້າບະເລເສີມ 3 ປີແລ້ວ, ໄທບ້ານທັງຫຼາຍຮູ້ສຶກວ່າ ຕົນເອງໄດ້ມີການປ່ຽນແປງ. ນາງເສີນກຸ້ຍລານ ທີ່ຢູ່ບ້ານຢາເຖົາບອກນັກຂ່າວວ່າ:
ແຕ່ກ່ອນ, ຕາຂ້ອຍມັກແຫ້ງ, ຮິມສົບຮິມປາກມັກເປື່ອຍ, ໜັງຕີນໜັງມືມັກຕົກ, ບໍ່ມີເຫື່ອມີແຮງ, ມັກເປັນຫວັດ. ເມື່ອກິນແປ້ງເຂົ້າບະເລເສີມທາດບຳລຸງແລ້ວ, ອາການເຫຼົ່ານີ້ໄດ້ຫາຍໄປໝົດ, ຮູ້ສຶກມີເຫື່ອມີແຮງຫຼາຍ.
ປັດຈຸບັນ, ແປ້ງເຂົ້າບະເລເສີມໄດ້ຖືກຈຳໜ່າຍຢູ່ 19 ແຂວງແລະກຳແພງນະຄອນຂອງຈີນ, ເຂົ້າສານເສີມກໍໄດ້ຖືກນຳໄປຂາຍຢູ່ຕະຫຼາດໃນຫວ່າງມໍ່ໆນີ້ແລ້ວ. ຕາມຊາບວ່າ, ຕໍ່ໄປພາຍໜ້າ, ຝ່າຍທີ່ກ່ຽວຂ້ອງຂອງຈີນຍັງຈະສືບຕໍ່ອອກແຮງຊຸກຍູ້ວຽກງານເສີມທາດບຳລຸງໃສ່ອາຫານເຊັ່ນນ້ຳມັນກິນ ເກືອ ແລະນ້ຳສະອີວເປັນຕົ້ນ, ທັງແນະນຳໃຫ້ໄທເມືອງຈີນກິນອາຫານເສີມເຫຼົ່ານີ້ໃຫ້ຫຼາຍ.
ທ່ານອີສຽວຕົ່ງ ຜູ້ຊ່ຽວຊານຂອງສູນທາດບຳລຸງແລະການພັດທະນາສາທາລະນະຊົນແຫ່ງຊາດຈີນສະເໜີວ່າ, ໃນດ້ານປົວແປງທາດບຳລຸງຂອງສາທາລະນະຊົນໃຫ້ດີຂຶ້ນ, ລັດຖະບານຄວນມີການປະກອບສ່ວນຫຼາຍກວ່າເກົ່າ.
ເມື່ອເບິ່ງຈາກແງ່ທາງລັດແລ້ວເຫັນວ່າ, ມີວຽກງານສອງດ້ານນີ້ຕ້ອງເພີ່ມທະວີ: ໜຶ່ງ, ແມ່ນຊຸກຢູ້ການເຜີຍແຜ່ອາຫານເສີມແລະອາຫານທີ່ມີທາດບຳລຸງອື່ນໆ, ເພື່ອຕາບຈູນທາດບຳລຸງບໍ່ພຽງພໍຂອງໄທເມືອງ; ສອງ, ຕ້ອງກຳກັບຝູງຄົນຈຸດໜັກ, ຕົວຢ່າງຄືສາທາລະນະຊົນໃນເຂດທຸກຍາກ, ເຮັດແນວນີ້ຈະມີຜົນດີທີ່ສຸດຕໍ່ການແກ້ໄຂການໝູນວຽນໃນແງ່ຮ້າຍທີ່ເປັນພະຍາດຍ້ອນຄວາມທຸກຍາກ, ແລະຍ້ອນເປັນພະຍາດແລ້ວພາໃຫ້ທຸກຍາກຄືນໃນເຂດທຸກຍາກປັດຈຸບັນ.
ຍ້ອນວ່າການຂາດຄວາມຮູ້ກ່ຽວກັບທາດບຳລຸງແມ່ນມູນເຫດສຳຄັນອີກອັນໜຶ່ງທີ່ເຮັດໃຫ້ໄທເມືອງຈີນມີສະພາບທາດບຳລຸງບໍ່ດີ. ສະນັ້ນ, ຜູ້ຊ່ຽວຊານທີ່ກ່ຽວຂ້ອງຊີ້ອອກວ່າ, ຈີນຄວນສ້າງລະບົບໃຫ້ຄຳປຶກສາລະດັບຜູ້ຊ່ຽວຊານດ້ານທາດບຳລຸງໂດຍໄວ, ເຮັດໃຫ້ໄທເມືອງຈີນມີນັກໂພດຊະນາການຊີ້ນຳດ້ານການຮັບເອົາທາດບຳລຸງໂດຍຈຳເພາະຄືກັນກັບເຈັບໄຂ້ແລ້ວຕ້ອງໄປຫາໝໍ.
ເອົາລະທ່ານຜູ້ຟັງທີ່ເຄົາລົບ, ລາຍການສຸກສາລາພາກນີ້ຂໍຈົບລົງທໍ່ນີ້, ຂອບໃຈທີ່ທ່ານຮັບຟັງ, ສະບາຍດີ.
1 2 3
|
