|
|
 |
| (GMT+08:00)
2006-03-02 17:28:54
|
 |
|
ຊີມອາຫານພື້ນເມືອງປັກກິ່ງທີ່ມີປະຫວັດຮ້ອຍປີ
cri
Author: da
ເມື່ອກິນລວກພຸງ"ປ້າວຕູ"ແລ້ວ,ຖ້າທ່ານຢາກກິນຂອງຫວານຫຼັງອາຫານ,ພວກເຮົາກໍຂໍແນະນຳໃຫ້ທ່ານຊີມໂຟຼມາ,ຊຶ່ງເປັນອາຫານພື້ນເມືອງອີກຊະນິດໜຶ່ງຂອງປັກກິ່ງ.ເມື່ອທຽບກັບໂຟຼມາຂອງຕ່າງປະເທດແລ້ວ,ໂຟຼມາຂອງປັກກິ່ງຄ້າຍຄືນົມສົ້ມ,ຂາວ ລະອຽດ ອ່ອນນຸ້ມ ທັງມີລົດຊາດຫວານ ຫອມ.
ທ່ານເວີ້ຍກວາງລູ້ ອາຍຸ 73 ປີ ເຈົ້າຂອງຮ້ານຮຸ່ນທີສາມຂອງຮ້ານອາຫານ"ໜາຍລ້າວເວີ້ຍ" ຮ້ານໂຟຼມາເກົ່າທີ່ມີປະຫວັດຮ້ອຍປີຢູ່ປັກກິ່ງໄດ້ແນະນຳວ່າ,ໂຟຼມາແມ່ນອາຫານພະລາຊະວັງຊະນິດໜຶ່ງ:
"ປູ່ຂອງຂ້າພະເຈົ້າໄດ້ຮູ້ຈັກກັບເພື່ອນຜູ້ໜຶ່ງທີ່ເຮັດວຽກຢູ່ຄົວພະກະຍາຫານ ຄືເຮືອນຄົວຂອງເຈົ້າຊີວິດ,ຄາວນັ້ນ ຄອບຄົວຂອງຂ້າພະເຈົ້າທຸກຍາກຫຼາຍ,ເພື່ອນຜູ້ນີ້ກໍສອນໃຫ້ປູ່ຂອງຂ້າພະເຈົ້າເຮັດອາຫານສອງເຢື່ອງເພື່ອຫາລ້ຽງຊີບລ້ຽງຄອບຄົວ.ສະນັ້ນ ອາຫານໂຟຼມາແມ່ນອາຫານໃນພະລາຊະວັງແທ້ໆ."
ສຳລັບວິທີເຮັດໂຟຼມາ,ທ່ານເວີ້ຍແນະນຳວ່າ,ນົມສົດແມ່ນເຄື່ອງປຸງຫຼັກ,ໃສ່ເຂົ້າເຫຼົ້າໝາກໜ້ອຍໜຶ່ງເພື່ອໃຫ້ມັນແຂ້ນ,ແລ້ວເອົາໃສ່ເຕົາອົບ,ອົບປະມານໜຶ່ງຊົ່ວໂມງ,ສຸດທ້າຍຍັງຕ້ອງໃສ່ຕູ້ເຢັນໃຫ້ມັນເຢັນລົງ.ໂຟຼມາຊະນິດນີ້ມີຈຸດພິເສດກວ່າໝູ່ກໍແມ່ນ,ໃນເວລາກິນມີກິ່ນຫອມນ້ຳນົມ ທັງມີກິ່ນຫອມເຂົ້າເຫຼົ້າໝາກ,ທັງຫອມທັງຫວານ.ຖ້າໃສ່ໃນໝາກໄມ້ແຫ້ງຫຼາຍຢ່າງເຊັ່ນ:ໝາກອະງຸ່ນແຫ້ງ ໃນແກ່ນໝາກໂມແລະອື່ນໆ,ກໍແຮ່ງມີລົດຊາດພິເສດ.ໃນຫຼາຍປີມານີ້,ໂຟຼມາຂອງຮ້ານເວີ້ຍມີຊື່ສຽງໃນນະຄອນປັກກິ່ງ,ຜູ້ທີ່ມັກມາກິນເລື້ອຍໆ ສ່ວນຫຼາຍແມ່ນບຸກຄົນວັດທະນະທຳທີ່ມີຊື່ສຽງແລະລູກຫຼານເຊື້ອເຈົ້າ.ທ່ານຝູອີ ເຈົ້າຊີວິດອົງສຸດທ້າຍຂອງຈີນແລະທ່ານຝູເຈ ນ້ອງຊາຍເພິ່ນ ລ້ວນແຕ່ແມ່ນຂາປະຈຳຂອງຮ້ານໂຟຼມາ"ໜາຍລ້າວເວີ້ຍ",ກ່ອນທ່ານຝູອີຈະເຖິງແກ່ກຳ,ເພິ່ນຍັງສັ່ງໃຫ້ຄົນໄປຊື້ໂຟຼມາໜາຍລ້າວເວີ້ຍມາໃຫ້ກິນ.
ຕໍ່ໄປພວກເຮົາຈະແນະນຳນ້ຳໝາກຖົ່ວເນົ່າ ເຄື່ອງດື່ມດັ້ງເດີມຊະນິດໜຶ່ງຂອງປັກກິ່ງທີ່ແກ້ມັນແລະຊ່ອຍຍ່ອຍອາຫານໄດ້.ຕາມຄົ້ນຄວ້າກັນວ່າ,ນ້ຳໝາກຖົ່ວເນົ່າຊະນິດນີ້ມີປະຫວັດສອງຮ້ອຍກວ່າປີແລ້ວ.ນ້ຳໝາກຖົ່ວເນົ່າຕ່າງກັບນ້ຳເຕົາຮູ້,ນ້ຳເຕົາຮູ້ແມ່ນເອົາໝາກຖົ່ວເຫຼືອງໝ່າ,ແລ້ວໂມ້ໃສ່ນ້ຳ,ແລ້ວຕອງເອົາແຕ່ນ້ຳ,ສ່ວນນ້ຳໝາກຖົ່ວເນົ່າພັດແມ່ນເອົາກາກໝາກຖົ່ວຂຽວມາໝັກໃຫ້ຂຶ້ນແລະຕອງເອົານ້ຳ.ຄົນປັກກິ່ງມັກດື່ມນ້ຳໝາກຖົ່ວເນົ່າ,ທັງຖືເປັນການສະເຫວີຍສຸກຢ່າງໜຶ່ງ.ຕາມໜ້ານ້ຳໝາກຖົ່ວເນົ່າມີຝອດຂາວຄືກາເຟ"ຄາປູ່ສິໂນ",ແຕ່ບໍ່ຫວານດມີລົດສົ້ມ.ຢູ່ຮ້ານນ້ຳໝາກຖົ່ວເນົ່າຈິນສິ່ນ ຮ້ານນ້ຳໝາກຖົ່ວເນົ່າລົດເດີມຢູ່ປັກກິ່ງ,ລຸງວັງຢູ້ຍມິງ ລູກຄ້າຂອງຮ້ານແນະນຳວ່າ,ຄອບຄົວເພິ່ນຢູ່ປັກກິ່ງມາຫຼາຍເຊັ່ນຄົນ,ໝົດຄອບຄົວມັກກິນນ້ຳໝາກຖົ່ວເນົ່າສູ່ຄົນ".
"ນີ້ກໍຍ້ອນຄວາມຊິນເຄີຍ,ຂ້າພະເຈົ້າກິນນ້ຳໝາກຖົ່ວເນົ່າມາແຕ່ນ້ອຍ.ກິນນ້ຳໝາກຖົ່ວເນົ່າພາໃຫ້ກິນເຂົ້າແຊບ,ກິນໃນຍາມຮ້ອນ ຍັງແກ້ຮ້ອນໄດ້.ເວລາຜ່ານຮ້ານນີ້ເທື່ອໃດ ຂ້າພະເຈົ້າກໍຕ້ອງແວະເຂົ້າມາກິນ."
ເຈົ້າຂອງຮ້ານນ້ຳໝາກຖົ່ວເນົ່າຈິນສິ່ນແນະນຳວ່າ,ມີຫຼາຍໆຄົນຕັ້ງມາກິນນ້ຳໝາກຖົ່ວເນົ່າ,ຈົນລາງເທື່ອຄ່ຳແລ້ວ ກໍປິດຮ້ານຕາມເວລາບໍ່ໄດ້.
ທ່ານຜູ້ຟັງ,ອາຫານພື້ນເມືອງປັກກິ່ງທີ່ມີຊື່ສຽງນອກຈາກທີ່ແນະນຳມາແລ້ວ,ຍັງມີຫຼາຍຢ່າງຄືເຂົ້າໜົມຕັດທີ່ເຮັດດ້ວຍແປ້ງຖົ່ວລັນເຕົ໋າ,ໝາກໄມ້ຊຸບນ້ຳຕານຂ້ຽວ,ນ້ຳບ້ວຍກິ່ນກຸຫຼາບແລະດອກອົບເຊີຍ,ເຕົາຮູ້ໝາກອານມັງເປັນຕົ້ນ,ຖ້າມີໂອກາດທ່ານຕ້ອງມາຊີມອາຫານພື້ນເມືອງປັກກິ່ງແດ່ເດີ້.
1 2 3
|
|
|
