|
|
 |
| (GMT+08:00)
2006-03-24 20:30:41
|
 |
|
ທ່ານອາປູລາຍຖີ.ມາຍຈຸ່ນ-ເຈົ້າຊາຍກາງຫາວ
cri
Author: mo
ປີກາຍນີ້, ເຂດຊິນຈ່ຽງເຜົ່າເວີຍວູເອີປົກຄອງຕົນເອງໄດ້ສະຫຼອງວັນສ້າງຕັ້ງຄົບຮອບ 50 ປີ. ທ່ານອາປູລາຍຖີ.ມາຍຈຸ່ນໄດ້ນຳເອົາຂອງຂວັນພິເສດກວ່າໝູ່ມາໃຫ້ບ້ານເກີດຂອງຕົນໃນປີນີ້, ຄືໄດ້ທ້າທາຍສະຖິຕິດາວາຈືຂອງໂລກຢ່າງສຳ ເລັດຜົນ. ທ່ານອາປູລາຍຖີ.ມາຍຈຸ່ນເວົ້າວ່າ:
"ໃຕ້ການສະໜັບສະໜູນຂອງຄະນະກາຍຍະສິນ, ຂ້າພະເຈົ້າໄດ້ກະກຽມເປັນເວລາ 7 ປີເຕັມໆ, ສຸດທ້າຍໄດ້ບັນລຸຄວາມຝັນຄືທຳລາຍສະຖິຕິໂລກ 7 ລາຍດ້ວຍສິລະປະດາວາຈື, ແລະຖືເປັນຂອງຂວັນມອບໃຫ້ແກ່ການສະຫຼອງເຂດປົກຄອງຕົນເອງສ້າງຂຶ້ນຄົບຮອບ 50 ປີ."
ເພື່ອມອບຂອງຂວັນດັ່ງກ່າວນີ້, ທ່ານອາປູລາຍຖີ.ມາຍຈຸ່ນໄດ້ດຳລົງຊີວິດຢູ່ກາງຫາວ 38 ມື້. ກາງເວັນ, ທ່ານໄດ້ຟ້ອນລຳທຳເພງຢູ່ເທິງເຊືອກເສັ້ນເຫຼັກກ້າທີ່ສູງຈາກໜ້າດິນ 28 ແມັດ; ກາງຄືນ, ກໍຜັກຜ່ອນໃນເຮືອນໄມ້ນ້ອຍໆຢູ່ສົ້ນເຊືອກ.
ທ່ານຢູທຽນຢົງ ຮອງປະທານສະມາຄົມນັກກາຍຍະສິນເຂດຊິນຈ່ຽງໄດ້ຊົມການສະແດງຂອງທ່ານອາປູລາຍຖີ.ມາຍຈຸ່ນທ້າທາຍສະຖິຕິໂລກຢູ່ກັບທີ່. ທ່ານຫວນຄືນວ່າ, ໃນຫຼາຍມື້ນັ້ນ, ທ່ານອາປູລາຍຖີ.ມາຍຈຸ່ນບໍ່ພຽງແຕ່ຕ້ອງຍ່າງຢູ່ເທິງເສັ້ນເຫຼັກກ້າ 6 ຊົ່ວໂມງຂຶ້ນໄປໃນທຸກມື້ເທົ່ານັ້ນ, ຍັງຕ້ອງດີດ"ເອີ້ວາພູ"ໄປພ້ອມກັນອີກດ້ວຍ. ລາງເທື່ອ ລົມແຮງຫຼາຍ, ເສັ້ນເຫຼັກກ້າແກວ່ງໄປແກວ່ງມາ, ແຕ່ທ່ານອາປູລາຍຖີ.ມາຍຈຸ່ນພັດສາມາດເອົາຜ້າມັດຕາສອງເບື້ອງ ແລ້ວຍ່າງຢູ່ເທິງເສັ້ນເຫຼັກຢ່າງສະບາຍ, ລາງເທື່ອຍັງເຕັ້ນລະບຳເຜົ່າເວີຍວູເອີ, ຍ້ອນການສະແດງຫວາດສຽວໂພດ, ມັກພາໃຫ້ຜູ້ຊົມຢູ່ລຸ່ມຮ້ອງຢ່າງຕື່ນຕົກໃຈຢູ່ເລື້ອຍໆ, ມີຜູ້ຊົມບາງຄົນຈົນບໍ່ກ້າມືນຕາ. ທ່ານຢູທຽນຢົງເວົ້າວ່າ:
"ການທ້າທາຍຂອບເຂດດຳລົງຊີວິດ 38 ມື້, ເວົ້າສຳລັບທ່ານແລ້ວແມ່ນຂະບວນການທີ່ຕື່ນເຕັ້ນຫວາດສຽວ, ຂ້າພະເຈົ້າເປັນຜູ້ຊົມກໍຮູ້ສຶກຕື່ນເຕັ້ນຄືກັນ. ລາງເທື່ອ, ຟ້າມືດໝົດແລ້ວ, ເບິ່ງບໍ່ເຫັນນິ້ວມື, ແຕ່ທ່ານຢູ່ເທິງເສັ້ນເຫຼັກທີ່ສູງຫຼາຍສິບແມັດ, ບໍ່ມີແສງເຍືອງຮຸ່ງ, ບໍ່ມີການປະກັນໄພຫຍັງ, ຈັ່ງແມ່ນອັນຕະລາຍທີ່ສຸດ."
ເຖິງວ່າຂະບວນການທ້າທາຍສະຖິຕິໂລກແມ່ນລຳບາກຫຼາຍ, ແຕ່ເມື່ອຫວນຄືນເລື້ອງນີ້ເທື່ອໃດ, ທ່ານອາປູລາຍຖີ.ມາຍຈຸ່ນກໍຮູ້ສຶກພາກພູມໃຈຫຼາຍ.
(ຈົບ)
1 2 3
|
|
|
