ໂດຍມີພໍ່ສອນແບບຈັບມືເຮັດຕົວຈິງ,ທ່ານຢາງຟູສີໄດ້ກຳເຕັກນິກເຮັດທະນູຢ່າງໄວວາ,ທະນູທີ່ທ່ານເຮັດນັ້ນກໍໄດ້ລາຄາດີໃນທ້ອງຕະຫຼາດ.ທະນູຂອງທ່ານ,ລາຄາທຳມະດາແມ່ນ100ຮອດ200ຢວນ,ທະນູທີ່ເຮັດພິເສດຕົວຢ່າງຄືໜ້າເຂົາຄວາຍດຳ,ຄັນໜຶ່ງຕ້ອງໜຶ່ງພັນ,ສອງພັນຢວນ.ແຕ່ວ່າ,ເມື່ອພິຈາລະນາເຖິງເວລາແລະເຫື່ອແຮງທີ່ໃຊ້ໃນການເຮັດທະນູແລ້ວ,ລາຄາດັ່ງກ່າວຖືວ່າບໍ່ແພງ.ທ່ານຢາງຟູສີເວົ້າວ່າ,ການເຮັດທະນູດັ້ງເດີມກິນເວລາແລະເຫື່ອແຮງຫຼາຍ.ປັດຈຸບັນ,ທ່ານເຮັດທະນູ10ກວ່າຄັນ,ຕ້ອງໃຊ້ເວລາປະມານ4ເດືອນ.ສະນັ້ນ,ແຕ່ປີ1998ຮອດປັດຈຸບັນ,ທ່ານເຮັດທະນູສຳເລັດພຽງ200,300ຄັນເທົ່ານັ້ນ.
ຍ້ອນວ່າຈຸດພິເສດຂອງສີມືດັ່ງກ່າວ, ທະນູເຜົ່າມັງຊູທີ່ທ່ານຢາງຟູສີເຮັດນັ້ນໄດ້ດຶງດູດເອົາຜູ່ນິຍົມທະນູຈຳນວນຫຼວງຫຼາຍທີ່ມາຈາກແຫ່ງຕ່າງໆພາຍໃນປະເທດຈີນແລະຕ່າງປະເທດ.ນອກຈາກມີຜູ່ຊື້ທະນູເພື່ອສະສົມແລ້ວ,ຍັງມີຄົນເດີນທາງໄກ,ມາຫາທ່ານຢາງຟູສີເພື່ອຖອດຖອນບົດຮຽນເຮັດທະນູ.ຄົນສ່ວນຫຼາຍທີ່ມັກທະນູຂອງທ່ານລ້ວນແຕ່ແມ່ນຍ້ອນວ່າໃນສີມືດັ້ງເດີມຊະນິດນີ້ ມີວັດທະນະທຳເຜົ່າມັງຊູ.
ເຖິງວ່າມີຫຼາຍໆຄົນ ສົນໃຈທີ່ສຸດຕໍ່ໜ້າທະນູຂອງທ່ານຢາງຟູສີ,ແຕ່ທ່ານພັດວາງເງື່ອນໄຂສູງສຳລັບການຄັດເລືອກລູກສິດ.ທ່ານເຫັນວ່າ,ປະຖົມປັດໄຈໃນການຮຽນສີມືດັ່ງກ່າວແມ່ນຕ້ອງຮູ້ລັກສະນະວັດທະນະທຳແລະສິລະປະຂອງສີມືດັ່ງກ່າວ,ບໍ່ຄວນຖືສີມືດັ່ງກ່າວເປັນພາຫະນະລ້ຽງຊີບເທົ່ານັ້ນ.ທ່ານຢາງຟູສີມີລູກຊາຍຜູ່ໜຶ່ງ,ປີນີ້,ພໍດີຮອດຍາມເສັງເຂົ້າມະຫາວິທະຍາໄລ,ລູກບໍ່ໄດ້ເວົ້າວ່າຈະສືບທອດສີມືຂອງທ່ານຫຼືບໍ່,ແຕ່ທ່ານກໍ່ບໍ່ບັງຄັບລູກ,ທ່ານຫວັງໃຫ້ລູກເລືອກເອົາເສັ້ນທາງທີ່ຕົນມັກ.
ຈົນຮອດປັດຈຸບັນ,ທ່ານຢາງຟູສີຍັງບໍ່ທັນຊອກໄດ້ຜູ່ສືບທອດທີ່ເໝາະສົມເທື່ອ.ແຕ່ ທ່ານຢາງຟູສີບໍ່ໄດ້ເປັນຫ່ວງ.ທ່ານເວົ້າວ່າ: "ຜູ່ສືບທອດທີ່ເໝາະສົມຈະຊອກໄດ້ແນ່ນອນ,ຂ້ອຍມີຄວາມໝັ້ນໃຈ.ເພາະປີນີ້,ອາຍຸຂ້ອຍຫາກໍ່40ກວ່າປີ,ຍັງມີເວລາຢູ່.ທະແນມແຕ່ຂ້ອຍເຫັນວ່າເຂົາມີຄວາມສາມາດ,ບໍ່ວ່າເຂົາມີວົງຕະກຸນຫຍັງ,ຂ້ອຍກໍສອນສີມືທັງໝົດໃຫ້ເຂົາເປັນໄດ້."
ປີນີ້, ທະນູເຜົ່າມັງຊູດັ້ງເດີມຂອງທ່ານຢາງຟູສີຖືກສະເໜີຈັດເຂົ້າບັນຊີລາຍຊື່ມໍລະດົກວັດທະນະທຳທີ່ບໍ່ແມ່ນວັດຖຸທີ່ຈະຍື່ນໃຫ້ສະຫະປະຊາຊາດ.ສະຖາບັນຄົ້ນຄວ້າສິລະປະກຳຈີນກໍໄດ້ເຊື້ອເຊີນທ່ານຢາງຟູສີເປັນນັກຄົ້ນຄວ້າ, ອຳນວຍໂອກາດໃຫ້ທ່ານສະແດງສີມືຂອງຕົນ,ຍັງສະໜອງເງື່ອນໄຂເຮັດວຽກທີ່ສະດວກກວ່າເກົ່າໃຫ້ທ່ານ.ທ່ານຢາງຟູສີເວົ້າວ່າ,ຕໍ່ໄປພາຍໜ້າ,ທ່ານຍັງຈະເຮັດຂໍ້ມູນຕົວໜັງສື,ອັດເຄື່ອງສຽງແລະເຄື່ອງພາບຈຳນວນໜຶ່ງ,ເພື່ອບັນທຶກເຕັກນິກເຮັດທະນູດັ້ງເດີມ.ເຮັດແນວນີ້,ເຖິງວ່າຜູ່ທີ່ກຳສີມືຊະນິດນີ້ລ້ວນແຕ່ລ່ວງລັບໄປກໍຕາມ,ຄົນຮຸ່ນຫຼັງຍັງສາມາດຟື້ນຟູສີມືຕາມຂໍ້ມູນເຫຼົ່ານີ້ໄດ້.
1 2 3
|
