|
|
 |
| (GMT+08:00)
2006-06-01 21:01:01
|
 |
|
ທ່ຽວວັດຝາເມີນ
cri
Author: da
|
ແຂວງສານຊີ່ຕັ້ງຢູ່ພາກຕາເວັນຕົກສຽງເໜືອຂອງຈີນ,ໃນ3000ກວ່າປີມານີ້,ເຄີຍມີ 12 ລາຊະວົງຕັ້ງລາຊະທານີຢູ່ແຫ່ງນີ້.ນັບມາຮອດປະຈຸບັນ,ຢູ່ແຫ່ງນີ້ຍັງຮັກສາໄວ້ບູຮານນະສະຖານແລະວັດຖຸບູຮານຈຳນວນຫຼວງຫຼາຍ.ໃນບູຮານນະສະຖານເຫຼົ່ານີ້,ວັດຝາເມີນທີ່ມີປະຫວັດ 1700 ກວ່າປີແມ່ນໜ້າໄປທ່ຽວ.ໃນລາຍການມື້ນີ້,ພວກເຮົາຈະພາທ່ານໄປທ່ຽວວັດຝາເມີນ.
ວັດຝາເມີນຕັ້ງຢູ່ເມືອງວັດຝາເມີນນະຄອນເປົາຈີທີ່ຢູ່ພາກຕາເວັນຕົກນະຄອນສີ່ອ່ານ ເທດສະບານແຂວງສານຊີ່,ຫ່າງຈາກສີ່ອ່ານ 100 ກິໂລແມັດ,ຂັບລົດຈາກສີ່ອ່ານໄປວັດຝາເມີນ,ໃຊ້ເວລາ 3 ຊົ່ວໂມງກໍໄປຮອດ.ວັດຝາເມີນກວມເນື້ອທີ່ບໍ່ຮອດ 7 ເຮັກຕາ,ມີເດີ່ນວັດ 24 ແຫ່ງ.ວັດນີ້ສ້າງຕັ້ງຂຶ້ນເມື່ອ 1700 ປີກ່ອນ,ໃນຄາວນັ້ນ ສາສະໜາພຸດຫາກໍ່ເຜີຍແຜ່ເຂົ້າຈີນບໍ່ດົນ.ຕາມເລົ່າລືກັນວ່າ,ພາຍຫຼັງພະສາກະຍະມູນີ ພະພຸດທະເຈົ້າປະລິນິພານແລ້ວ,ພະວໍລະກາຍຖືກເຜົາແລ້ວກາຍເປັນພະສາລີລິກະທາດ,ແລ້ວຖືກຄົນຮຸ້ນຫຼັງແບ່ງເປັນ 8 ໝື່ນ 4 ພັນສ່ວນເຊື່ອງໄວ້ໃນທາດພຸດທະສາສະໜາຢູ່ແຫ່ງຕ່າງໆຂອງໂລກ,ທາດຢູ່ໃນວັດຝາເມີນກໍແມ່ນແຫ່ງໜຶ່ງ.
ທາດຢູ່ໃນວັດຝາເມີນຫຼັງນີ້ແມ່ນທາດດິນຈີ່ຮູບ 8 ຫຼ່ຽມສູງ 13 ຊັ້ນ.ຍ້ອນວ່າດົນແລ້ວບໍ່ໄດ້ປະຕິສັງຂອນ,ໄດ້ເພພັງລົງເຄິ່ງໜຶ່ງເມື່ອປີ 1981.ເມື່ອປີ 1987,ຈີນຕົກລົງມ້າງທາດທີ່ເພພັງ,ແລະສ້າງທາດຫຼັງນີ້ຄືນໃໝ່ຢູ່ບ່ອນເກົ່າ,ໃນເວລາຊຳລະພື້ນທາດ,ຄົນທັງຫຼາຍໄດ້ປະກົດເຫັນວັງໃຕ້ດິນທີ່ຖືກປິດມາເປັນເວລາພັນກວ່າປີແລ້ວນັ້ນໂດຍບັງເອີນ,ໄດ້ຂຸດພົບວັດຖຸບູຮານອັນລ້ຳຄ່າ 2000 ກວ່າອັນ.ຜ່ານຈາກການວັດແທກ,ວັງໃຕ້ດິນມີເນື້ອທີ່ 30 ກວ່າຕາລາງແມັດ,ແມ່ນວັງໃຕ້ດິນໃນທາດພຸດທະສາສະໜາທີ່ໃຫຍ່ກວ່າໝູ່ທີ່ປະກົດເຫັນຢູ່ຈີນນັ້ນມາຮອດປະຈຸບັນ.ເມື່ອຜູ້ຊ່ຽວຊານວັດຖຸບູຮານກວດສອບແລ້ວເຫັນວ່າ,ໃນວັດຖຸບູຮານທີ່ຂຸດອອກຈາກວັງໃຕ້ດິນນັ້ນ ມີສາລີລິກະທາດພະຄຸລີຂອງພະພຸດທະເຈົ້າທີ່ມີພຽງອັນດຽວໃນໂລກປະຈຸບັນ,ອາດເວົ້າໄດ້ວ່າແມ່ນຂອງສັກສິດສູງສຸດໃນວົງການພຸດທະສາສະໜາໃນສະເພາະໜ້ານີ້.ການພົບເຫັນດັ່ງກ່າວເຄີຍດົ່ງດັງໃນຊົ່ວໄລຍະໜຶ່ງ,ຖືກຖືເປັນການປະກົດເຫັນທາງດ້ານບູຮານນະຄະດີທີ່ສຳຄັນກວ່າໝູ່ຂອງຈີນໃນສະຕະວັດທີ 20.
ຄັນຊັ້ນ,ຢູ່ໃນວັງໃຕ້ດິນວັດຝາເມີນ ເປັນຫຍັງຈິ່ງມີວັດຖຸບູຮານອັນປະເສີດຫຼາຍຄືແນວນີ້?ທ່ານຢາວອິນລຽງ ເຈົ້າຄອງນະຄອນປາວຈີ່ແນະນຳວ່າ, ເມື່ອ 1300 ປີກ່ອນ ວັດຝາເມີນແມ່ນວັງຫຼວງຂອງລາຊະວົງຖາງ,ເຄີຍມີເຈົ້າຊີວິດລາຊະວົງຖາງຫຼາຍອົງມາບູຊາພະສາລີລິກະທາດພະຄຸລີຢູ່ວັດຝາເມີນ,ພະອົງເຫຼົ່ານີ້ຍັງເຄີຍເອົາພະສາລີລິກະທາດພະຄຸລີໃສ່ເຂົ້າໃນດອກບົວທີ່ເຮັດດ້ວຍຄຳປີວແລະອັນເຊີນເຂົ້າພະລາຊະວັງເພື່ອບູຊາ,ພະລາຊະວັງຍັງໄດ້ພະລາຊະທານເພັດນິນຈິນດາຈຳນວນຫຼວງຫຼາຍໃຫ້ວັດຝາເມີນ.
ຄ.ສ.ປີ874,ໃນເວລາສົ່ງພະສາລີລິກະທາດທີ່ອັນເຊີນໄປບູຊານັ້ນຄືນໃຫ້ວັດຝາເມີນ,ເຈົ້າຊີວິດລາຊະວົງຖາງອົງໜຶ່ງໄດ້ເອົາເຄື່ອງຄຳເຄື່ອງເງິນ ເຄື່ອງແກ້ວ ເຄື່ອງເຄືອບ ເພັດນິນຈິນດາແລະເຄື່ອງປັ່ນທໍທີ່ເຈົ້າຊີວິດທຸກອົງກອ່ນບູຊານັ້ນ ພ້ອມດ້ວຍພະສາລີລິກະທາດໄປເຊື່ອງໄວ້ໃນວັງໃຕ້ດິນວັດຝາເມີນ,ແລ້ວປິດປະຕູຂອງວັງໃຕ້ດິນໄວ້.ພາຍຫຼັງມາ,ເພັດນິນຈິນດາເຫຼົ່ານີ້ແລະວັງໃຕ້ດິນຄ່ອຍໆຖືກຄົນລືມ,ຈົນຮອດປີ 1987 ໃນເວລາຝາຫີນຮູບ 4 ຫຼ່ຽມທີ່ອັດປ່ອງຢ້ຽມວັງໃຕ້ດິນຖືກຍ້າຍ,ປະຕູຫີນຂອງວັງໃຕ້ດິນທີ່ປິດມາພັນກວ່າປີຖືກເປີດ,ເພັດນິນຈິນດາເຫຼົ່ານີ້ຈຶ່ງເຫຼື້ອມຍິບຍັບຄືນໃໝ່.
1 2 3
|
|
|
