|
ການຍ່າງແບບຄ່ຽມໆຢູ່ເທິງແທ່ນເດີນແບບ, ແລະຕໍ່ໜ້າແສງໄຟຖ່າຍຮູບຈົນນັບບໍ່ຖ້ວນ, ນີ້ກໍແມ່ນວຽກງານເດີນແບບ, ອາຊີບໜຶ່ງທີ່ບ່າວສາວນັບບໍ່ຖ້ວນຂອງຈີນປາຖະໜາຫາທີ່ສຸດ.
ນາງສູງ 1.80 ແມັດ, ມີຜົມສີດຳຍາວໆ, ຕາມົນ, ເຕັມໄປດ້ວຍຊີວິດຊີວາ. ຈະໃຊ້ຄຳວ່າ"ມີສະເໜເລີດໝູ່"ມາວາດພາບນາງແບບຈ່າງອີງຊ້ຽນທີ່ອາຍຸ 20 ປີນັ້ນກໍ່ບໍ່ແມ່ນຄຳຍ້ອງເກີນຄວນ. ນາງຈ່າງອີງຊ້ຽນມາຈາກແຂວງຫຼຽວນິງ ພາກຕາເວັນອອກສຽງເໜືອຂອງຈີນ ແມ່ນແຊ່ມປ່ຽນຂອງການແຂ່ງຂັນຜູ້ເດີນແບບອາຊີບຄັ້ງທີ 6 ຂອງຈີນ, ປັດຈຸບັນ, ນາງໄດ້ເຊັນສັນຍາກັບບໍລິສັດຜູ້ເດີນແບບຫຼັງໜຶ່ງທີ່ມີຊື່ສຽງຂອງປັກກິ່ງ.
"ພວກເຂົາເຈົ້າເຫັນວ່າ, ຂ້ອຍມີອະນາຄົດຫຼາຍໃນຂະແໜງການນີ້, ຄວາມສູງແລະໜ້າຕາເປັນຕົ້ນ ລ້ວນແຕ່ຖືກມາດຖານເປັນນາງແບບອາຊີບ. ອາດເວົ້າໄດ້ວ່າ, ຂ້ອຍນຸ່ງສົ້ງເສື້ອປະເພດໃດກໍເໝາະ, ແຕ່ຂ້ອຍມັກກວ່າໝູ່ນັ້ນແມ່ນສົ້ງເສື້ອທີ່ງາມໄປອີກຢ່າງໜຶ່ງແລະມີເອກະລັກພິເສດ."
ນາງຈ່າງອີງຊ້ຽນເລີ່ມສຳຜັດກັບຂະແໜງການຜູ້ເດີນແບບແມ່ນໃນຍາມຮຽນຢູ່ໂຮງຮຽນມັດທະຍົມ. ເວລານັ້ນ, ຢູ່ມໍ່ເຮືອນຂອງນາງ, ມີອົງການອົບຮົມຜູ້ເດີນແບບບໍ່ໜ້ອຍ, ຜູ້ສາວທີ່ມີເງື່ອນໄຂດີຫຼາຍໆຄົນລ້ວນແຕ່ສະໝັກຊື່ເຂົ້າຮ່ວມການອົບຮົມ, ນາງຈ່າງອີງຊ້ຽນກໍໄດ້ເຂົ້າຮ່ວມການອົບຮົມແນວນີ້. ພາຍຫຼັງມາ, ໃຕ້ການສະໜັບສະໜູນຂອງພໍ່ແມ່, ນາງໄດ້ເສັງເຂົ້າໂຮງຮຽນອົບຮົມຜູ້ເດີນແບບວິຊາສະເພາະ, ເລີ່ມເປັນນາງແບບອາຊີບ.
ປັດຈຸບັນ, ຢູ່ຈີນ, ຜູ້ເດີນແບບແຟຊັນວິຊາສະເພາະຄືນາງຈ່າງອີງຊ້ຽນໄດ້ມີ 5 ໝື່ນກວ່າຄົນແລ້ວ, ບໍລິສັດນາຍໜ້າຜູ້ເດີນແບບກໍມີ 5 ພັນກວ່າຫຼັງແລ້ວ. ຕໍ່ຄຳເວົ້າທີ່ວ່າເປັນຫຍັງຈຶ່ງຢາກເປັນນາງແບບ, ນາງອູສຽວເສີນ ນາງແບບເວົ້າຢ່າງກົງໄປກົງມາທີ່ສຸດວ່າ:
"ຍ້ອນວ່າຢູ່ໂທລະພາບໄດ້ເຫັນນາງແບບທີ່ມີຊື່ສຽງເລື້ອຍໆ, ເລີຍອິດສານຳພວກເຂົາເຈົ້າຫຼາຍ. ຮູ້ສຶກວ່າ, ຂະແໜງການນີ້ປະຈັກຕາຫຼາຍ, ຢູ່ທາງລຸ່ມ ມີແສງກ້ອງຖ່າຍຮູບສ່ອງໃສ່ຢ່າງຫຼວງຫຼາຍ, ການເດີນຢູ່ເທິງແທ່ນ, ແມ່ນຍາມທີ່ຂ້ອຍເຊື່ອໝັ້ນຕົນເອງທີ່ສຸດ."
1 2 3
|
