|
ເຂດເຜົ່າຈວ້າງປົກຄອງຕົນເອງ ກວາງຊີ ຕັ້ງຢູ່ພາກໃຕ້ຂອງຈີນ,ມີຊົນເຜົ່າໜຶ່ງໃນເຂດນີ້ທີ່ແຕກຕ່າງຈາກເຜົ່າອື່ນຊື່ວ່າເຜົ່າຢ້າວທູ,ແມ່ນສາຂາໜຶ່ງຂອງເຜົ່າຢ້າວ,ເຜົ່າຢ້າວທູມີປະຊາກອນ6000ກວ່າຄົນ.ພວກເຂົາເຈົ້າ ດຳລົງຊີວິດໃນພູຜາປ່າດົງມາແຕ່ດຶກດຳບັນ, ຫ່າງເຫີນຈາກໂລກພາຍນອກເປັນເວລາດົນນານ,ສະພາບການດຳລງຊີວິດຫຼ້າຫຼັງຫຼາຍ.ໃນບໍ່ເທົ່າໃດປີມານີ້,ໃຕ້ການຊ່ອຍເຫຼືອຂອງອຳນາດການປົກຄອງທ້ອງຖິ່ນແລະຄວາມພະຍາຍາມຂອງເຜົ່າຢ້າວທູ,ສະພາບຊີວິດການເປັນຢູ່ຂອງຊາວເຜົ່າຢ້າວທູໄດ້ຮັບການປັບປຸງໃຫ້ດີຂຶ້ນຢ່າງຫຼວງຫຼາຍ.
ບ້ານຊືຕົ່ງທີ່ຕັ້ງຢູ່ໃນພູຜາປ່າດົງ
ບ້ານຊືຕົ່ງເມືອງເຮີໂຈ່ວແມ່ນບ້ານເຜົ່າຢ້າວທູ,ມີປະຊາຊົນ1800ກວ່າຄົນ.ບ້ານນີ້ຕັ້ງຢູ່ໃນພູຜາປ່າດົງ,ສູງກວ່າໜ້ານ້ຳທະເລຫຼາຍ,ທາງພູຄົດລ້ຽວກ້ຽວກອດ.ແຕ່ວ່າ,ໃນມື້ທີ່ນັກຂ່າວໄປຮອດບ້ານຊືຕົ່ງ,ບ້ານ ທີ່ເຄີຍງຽບສະຫງົບພັດໄດ້ມີບັນຍາກາດຟົດຟືນເປັນພິເສດ,ເພາະວ່າ,ມື້ນັ້ນຄ້ອມພໍດີມີບ່າວສາວເຜົ່າຢ້າວທູຄູ່ໜຶ່ງຈັດງານກິນດອງ.
ບ້ານຊືຕົ່ງ
ບັນຍາກາດຂອງງານດອງຈັ່ງແມ່ນຟົດຟື້ນມ່ວນຊື່ນຫຼາຍ,ໃນບ້ານຂອງທ້າວເຟິ້ງທຽນເຕີຜູ່ເປັນເຈົ້າບ່າວມີຄົນມາອວຍພອນຢ່າງຫຼວງຫຼາຍ,ແຂກຄົນນັ່ງເຕັມຫ້ອງ.ເຈົ້າເຮືອນທີ່ມັກແຂກມັກຄົນໄດ້ຈັດພາເຂົ້າຍາວຂອງຊາວເຜົ່າຢ້າວທູມາຕ້ອນຮັບ.ເຂົາເຈົ້າເຊີນຊວນແຂກທີ່ມາອວຍພອນນັ້ນດື່ມນ້ຳຊາແລະເຫຼົ້າ,ພ້ອມທັງຮ້ອງເພງອວຍພອນທີ່ມ່ວນຊື່ນຫຼາຍເພງ.
ພາເຂົ້າຍາວຂອງເຜົ່າຢ້າວທູ
ຕັ້ງແຕ່ສະໄໝບູຮານມານີ້,ງານກິນດອງກໍແມ່ນເລື່ອງທີ່ຊາວເຜົ່າຢ້າວທູຖືສຳຄັນທີ່ສຸດ,ເຂົາເຈົ້າມີ ປະເພນີອັນໜຶ່ງ,ຄືໃນມື້ແຕ່ງງານ,ຄັນບໍ່ມີເງິນພໍທີ່ຈະຈັດພາເຂົ້າລ້ຽງແຂກ,ເຖິງວ່າຮອດຍາມເຖົ້າແກ່ຊະລາແລ້ວກໍຕ້ອງໄດ້ຈັດພາເຂົ້າອີກ.ຄູ່ຜົວເມຍລາງຄົນໃນຍາມຍັງມີຊີວິດບໍ່ມີຄວາມສາມາດຈັດພາເຂົ້າ,ເມື່ອເຖິງແກ່ກຳແລ້ວ,ຍັງຕ້ອງໃຫ້ລູກຫຼານຂອງພວກເຂົາເຈົ້າຈັດໃຫ້.ສະນັ້ນ,ບາງຄົນຕ້ອງເຮັດວຽກຢ່າງທຸກຍາກລຳບາກ,ລາງຄົນກໍ່ຕ້ອງເປັນໜີ້ເປັນສິນເພື່ອມາຈັດພາເຂົ້າລ້ຽງແຂກໃຫ້ໄດ້.
1 2 3
|
