|
ຢູ່ແຂວງເຈີ້ຈ່ຽງພາກຕາເວັນອອກຂອງຈີນມີເມືອງໜຶ່ງຊື່ວ່າ"ຫຼົງຢິວ".ເມື່ອ 10 ກວ່າປີກ່ອນ,ຢູ່ເມືອງຫຼົງຢິວໄດ້ປະກົດເຫັນຖ້ຳຫີນຂະໜາດໃຫຍ່ຢູ່ໃຕ້ດິນຫຼາຍແຫ່ງ,ວົງການວິຊາການໃຫ້ຄວາມສົນໃຈຫຼາຍຕໍ່ເລື່ອງນີ້,ນັກທ່ອງທ່ຽວຈຳນວນຫຼວງຫຼາຍກໍພາກັນໄປທ່ຽວຊົມ.ໃນລາຍການມື້ນີ້,ດາລາວັນຈະພາທ່ານໄປທ່ຽວຊົມຖ້ຳຫີນທີ່ອັດສະຈັນເຫຼົ່ານີ້.
ຖ້ຳຫີນຫຼົງຢິວຢູ່ບ້ານພູດອຍ"ສືຢຽນເປ້" ພາກເໜືອເມືອງຫຼົງຢິວ,ຂີ່ລົດຈາກເທດສະບານເມືອງ 5 ນາທີກໍໄປຮອດບ້ານນີ້. ຖ້ຳຫີນຫຼົງຢິວຢູ່ດ້ານຫຼັງມີພູ,ຢູ່ທາງໜ້າມີແມ່ນ້ຳ,ຢູ່ອ້ອມຂ້າງຖ້ຳມີຕົ້ນໄມ້ຂຽວອຸ່ມທຸ່ມ.ແຕ່ກ່ອນ,ຊາວບ້ານກໍປະກົດເຫັນວ່າ,ໃນພູມີໜອງນ້ຳຫຼາຍບ່ອນ,ນ້ຳໃສສະອາດດີ,ໜອງເລິກຈົນບໍ່ເຫັນພື້ນ.ໃນລະດູຮ້ອນປີ 1992,ຊາວບ້ານບໍ່ເທົ່າໃດຄົນຢາກລະບາຍນ້ຳນີ້ໃສ່ນາ.ສະນັ້ນ ຈຶ່ງຕົກລົງສູບນ້ຳຂອງໜອງນ້ຳແຫ່ງໜຶ່ງ.ກ່ອນອື່ນ ພວກເຂົາເຈົ້າໄດ້ເລືອກໜອງແຫ່ງໜຶ່ງທີ່ເນື້ອທີ່ໜ້ານ້ຳກວ້າງພຽງແຕ່ 20 ຕາແມັດ,ໃຊ້ຈັກສູບນ້ຳ ສູບຮອດມື້ທີ 4 ,ຢູ່ໃນນ້ຳໄດ້ເຫັນຂັ້ນໄດຫີນໂພ່ອອກມາ,ເມື່ອຮອດມື້ທີ 9 ,ກໍເຫັນເສົາຫີນຮູບສັນປາອັນໃຫຍ່ຫຼວງສອງເສົາໂພ່ຂຶ້ນອອກຈາກນ້ຳ.ມື້ທີ 17 ,ຫ້ອງຫີນໃຕ້ດິນທີ່ກວ້າງໃຫຍ່ກໍ່ປະກົດຕົວອອກມາ.
ເມື່ອໄດ້ພົບເຫັນຖ້ຳຫີນດັ່ງກ່າວ,ຊາວບ້ານສືຢຽນເປ້ຮູ້ສຶກແປກໃຈຫຼາຍ,ເຂົາເຈົ້າໄດ້ອອກແຮງສຸດຂີດສູບນ້ຳຂອງໜອງ 7 ແຫ່ງ,ຖ້ຳຫີນ 7 ແຫ່ງກໍ່ໄດ້ປະກົດຕົວອອກໃສຄືກັນ.ຖ້ຳຫີນ 7 ແຫ່ງດັ່ງກ່າວລຽນກັນເປັນແຖວ,ມີລັກສະນະຄືກັນ,ແຕ່ກວມເນື້ອທີ່ຕ່າງກັນ. ສິ່ງທີ່ແປກປະຫຼາດນັ້ນແມ່ນ,ຢູ່ໃນ ຖ້ຳຫີນ 7 ແຫ່ງມີພຽງແຕ່ຮູບຄວັດຫີນອົງໜຶ່ງທໍ່ນັ້ນ,ບໍ່ມີວັດຖຸບູຮານຫຍັງອີກເລີຍ.ໃນເວລາໃຫ້ສຳພາດຕໍ່ນັກຂ່າວ ທ່ານວັງສື່ຈິ້ງ ບັນດິດສະພາວິສະວະກຳຈີນເວົ້າວ່າ,ຊາວບ້ານສືຢຽນເປ້ບໍ່ນຶກບໍ່ຝັນວ່າ,ສິ່ງທີ່ພວກເຂົາເຈົ້າຄົ້ນພົບ ນັ້ນແມ່ນກຸ່ມຖ້ຳຫີນໃຕ້ດິນທີ່ມະນຸດກໍ່ສ້າງໃຫຍ່ກວ່າໝູ່ໃນໂລກ.
 "ມາເທື່ອທຳອິດ ຂ້າພະເຈົ້າກໍຍ້ອງຍໍກຸ່ມຖ້ຳຫີນໃຕ້ດິນທີ່ຄົນຈີນສະໄໝບູຮານກໍ່ສ້າງ,ພວກຂ້າພະເຈົ້າຄຶດບໍ່ອອກເລີຍວ່າ,ບົດຮຽນແລະປັນຍາຂອງພວກເຂົາເຈົ້າໄດ້ບັນລຸລະດັບສູງປານນີ້ໄດ້ແນວໃດ,ອາດເວົ້າໄດ້ວ່າ ເປັນງານສີມືທີ່ປານີດເໜືອທຳມະຊາດອີ່ຫຼີ."
ທ່ານວັງສື່ຈິ້ງເວົ້າວ່າ,ເມື່ອສັງເກດເບິ່ງຖ້ຳທີ່ໄດ້ຖືກຂຸດຄົ້ນແລ້ວ,ແຕ່ລະຖ້ຳກໍແມ່ນຫ້ອງໃຫຍ່ໃຕ້ດິນຫ້ອງໜຶ່ງ,ແຕ່ລະຫ້ອງກວມເນື້ອທີ່ 1 ພັນຕາແມັດເປັນຢ່າງໜ້ອຍ,ໃນແຕ່ລະຫ້ອງມີສະນ້ຳຫີນແລະເປີ້ນຫີນ1ຫາ2ບ່ອນ;ມີເສົາຫີນຄ້ຳຫຼັງຄາຖ້ຳ,ມີເສົາຈັກເສົາຕ້ອງເບິ່ງເນື້ອທີ່ຂອງຖ້ຳຈະກວ້າງຊ່ຳໃດ,ຫຼາຍທີ່ສຸດມີ 4 ເສົາ,ໜ້ອຍທີ່ສຸດມີ 1 ເສົາ.ຖ້ຳຫີນມີຮູບເໝືອນດັ່ງຖ້ວຍທີ່ຂວ້ຳລົງ.ໃນຖ້ຳຫີນຍັງມີຂັ້ນໄດຫີນ,ເນັ່ງໄປສູ່ທາງນອກ.ສິ່ງທີ່ເຮັດໃຫ້ຄົນແຮ່ງແປກໃຈນັ້ນແມ່ນ,ທີ່ຕັ້ງຂອງ 7 ຖ້ຳຫີນເໝືອນດັ່ງຮູບດາວໄຖ 7 ດາວ.ຢູ່ເທິງຝາຖ້ຳ,ຍັງມີຮູບແຕ້ມທີ່ອັດສະຈັນ.ຢູ່ເທິງຝາຖ້ຳບາງແຫ່ງໄດ້ຄວັດຮູບສັດຄື ມ້າ ນົກແລະປາ;ແຕ່ບາງບ່ອນພັດຄວັດສັດຊະນິດແປກໆ,ເຊັ່ນວ່າ ນົກຍາວກວ່າຮ່າງກາຍຕັ້ງຫຼາຍເທົ່າ.
ໃນບໍລິເວນບໍ່ເຖິງ 1 ກິໂລຕາແມັດຂອງຖ້ຳ 7 ແຫ່ງດັ່ງກ່າວ,ຍັງໄດ້ພົບເຫັນຖ້ຳຮູບຄ້າຍຄືກັນ 24 ແຫ່ງ.ທ່ານຢາງລິນເຕີ ຮອງປະທານສະມາຄົມພະລັງວິທະຍາແລະສະມາຄົມວິສະວະກຳດ້ານຫີນຂອງຈີນໄດ້ໄປສຳຫຼວດຖ້ຳຫີນຫຼົງຢິວຫຼາຍເທື່ອແລ້ວ.ທ່ານເວົ້າວ່າ,ເມື່ອສັງເກດເບິ່ງແລ້ວ,ຖ້ຳຫີນທຸກແຫ່ງລ້ວນແຕ່ມີການອອກແບບຢ່າງລະອຽດ,ຖ້ຳໄດ້ຕິດກັບຖ້ຳອື່ນຢູ່ 4 ທິດແລະຢູ່ລຸ່ມຢູ່ເທິງ,ແຕ່ລະຖ້ຳໄປຖ້ຳອື່ນບໍ່ໄດ້,ເຕັກນິກວັດແທກຢູ່ໃຕ້ດິນທີ່ລະອຽດປານີດແບບນີ້,ເຮັດໃຫ້ຄົນຍຸກປະຈຸບັນທີ່ມີເຕັກນິກທັນສະໄໝງຶດງໍ້ຫຼາຍ.ທ່ານເວົ້າວ່າ:
"ມາສຳຫຼວດຖ້ຳຫີນເທື່ອໃດ ຂ້າພະເຈົ້າກໍຮູ້ສຶກງຶດງໍ້ທີ່ສຸດ,ຖ້ຳຫີນຫຼົງຢິວແມ່ນຊ່າງຈີນໃນສະໄໝບູຮານປະດິດສ້າງໄວ້,ມີຄຸນຄ່າຫຼາຍທີ່ສຸດຕໍ່ການສ່ອງແສງໃຫ້ເຫັນປະຫວັດອະລະຍະທຳສະໄໝບູຮານຂອງຈີນ."
1 2 3
|
