|
ວັນທີ8ສິງຫາປີນີ້ແມ່ນວັນລະລຶກການນັບເວລາຖອຍຫຼັງ ອີກສອງປີຂອງງານກິລາໂອລິມປິກປັກກິ່ງ.ກ່ອນວັນດັ່ງກ່າວ,ຢູ່ສວນຊົນເຜົ່າຈີນທີ່ຖືກເອີ້ນເປັນ"ຫໍພິພິດທະພັນຊົນເຜົ່າຈີນ"ເຊິ່ງຕັ້ງຢູ່ພາກຕາເວັນອອກສຽງເໜືອນະຄອນຫຼວງປັກກິ່ງ,ໄດ້ຈັດໃຫ້ມີການກິລາຊົນເຜົ່າສ່ວນໜ້ອຍຕ່າງໆເຊັ່ນເຕັ້ນກະທົບໄມ້,ປີນພູມີດ,ມວຍປ້ຳເປັນຕົ້ນເພື່ອຕ້ອນຮັບວັນລະລຶກດັ່ງກ່າວ.
ວັນທີ7ສິງຫາ,ຢູ່ສວນຊົນເຜົ່າຈີນ,ຊາວໜຸ່ມບັນດາຊົນເຜົ່າສ່ວນໜ້ອຍໄດ້ຖືສິ່ງນຳໂຊກງານກິລາໂອລິມປີກປີ2008ຟ້ອນລຳທຳເພງ.
ຕອນຮຸ່ງເຊົ້າ,ເວລາທີ່ຊາວເມືອງປັກກິ່ງຍັງບໍ່ທັນຕື່ນນອນ,ນັກກິລາຊົນເຜົ່າສ່ວນໜ້ອຍທີ່ໃສ່ຊຸດຊົນເຜົ່າ160ກວ່າຄົນໄດ້ເຕົ້າໂຮມກັນເຕັ້ນກາຍຍະກຳຊົນເຜົ່າຢູ່ສະໜາມຫຼວງນອກປະຕູເໜືອຂອງສວນຊົນເຜົ່າຈີນ.ພວກນັກກິລາມີກິລິຍາທາທາງເປັນເອກະພາບກັນຢ່າງມີລະບຽບ,ພ້ອມທັງປ່ຽນຮູບຖັນແຖວເລື້ອຍໆ.ເພື່ອຕ້ອນຮັບວັນທີ8ສິງຫາ ວັນລະລຶກການນັບເວລາຖອຍຫຼັງອີກສອງປີຂອງງານກິລາໂອລິມປິກປັກກິ່ງ,ຊົນເຜົ່າສ່ວນໜ້ອຍໃນສວນຊົນເຜົ່າຈີນໄດ້ເປັນເຈົ້າການຈັດກິດຈະກຳ ຫັດກາຍທົ່ວປວງຊົນ.ກາຍຍະກຳຊົນເຜົ່າຊຸດດັ່ງກ່າວແມ່ນພວກເຂົາເຈົ້າປະດິດແຕ່ງລວມໝູ່,ອັນໄດ້ປະສານສົມທົບຈັງຫວະການຟ້ອນຂອງ8ຊົນເຜົ່າສ່ວນໜ້ອຍຂອງຈີນຄືເຜົ່າຕິເບດ,ເຜົ່າມົງໂກນ,ເຜົ່ານາຊີເປັນຕົ້ນ,ມັນບໍ່ພຽງແຕ່ມີທ່າທາງຟ້ອນງາມ,ຍັງຮຽນງ່າຍຫັດງ່າຍ.
ພາຍຫຼັງການສະແດງກາຍຍະກຳແລ້ວແລ້ວ,ນັກຂ່າວໄດ້ຕິດຕາມນັກກິລາຊົນເຜົ່າສ່ວນໜ້ອຍເຫຼົ່ານີ້ເຂົ້າໄປໃນສວນຊົນເຜົ່າຈີນ.ສວນນີ້ສົມເປັນມະຫາຄອບຄົວຂອງຊົນເຜົ່າສ່ວນໜ້ອຍ.ຢູ່ແຫ່ງນີ້,ນັກທ່ອງທ່ຽວບໍ່ພຽງແຕ່ຈະໄດ້ເຫັນພາບທິວທັດທຳມະຊາດແລະສິ່ງກໍ່ສ້າງບ້ານຊ່ອງຂອງຊົນເຜົ່າສ່ວນໜ້ອຍເທົ່ານັ້ນ,ຍັງຈະໄດ້ຊົມຮີດຄອງປະເພນີຂອງ ເຂົາເຈົ້າອີກດ້ວຍ.
ຢູ່ສວນດັ່ງກ່າວ,ສິ່ງທີ່ຈະໄດ້ເຫັນກ່ອນໝູ່ແມ່ນເຂດສວນເຜົ່າຕິເບດ,ໃນເຂດສວນດັ່ງກ່າວ,ບ່າວຕິເບດສອງຄົນທີ່ຮ່າງກາຍລ້ຳສັນພວມແຂ່ງຂັນຢາເຈ່ຍຂອງເຜົ່າຕິເບດ.ຢາເຈ່ຍແມ່ນ ກິລາທີ່ນິຍົມກັນໂດຍທົ່ວໄປຢູ່ເຂດເຜົ່າຕິເບດຈີນແລະໄດ້ຮັບຄວາມນິຍົມຊົມຊອບກວ່າໝູ່ຈາກຊາວເຜົ່າຕິເບດ.ສ່ວນຫຼາຍແມ່ນສອງຄົນແຂ່ງກັນດ້ວຍການເອົາເຊືອກເຮັດເປັນບ້ວງສຸບໃສ່ຄໍ,ພາດລົງມາຕາມທ້ອງແລ້ວສອດຜ່ານຫວ່າງຂາ,ສອງມືຈັບໜ້າດິນແລ້ວຫັນຫຼັງໃສ່ກັນ.ຢູ່ກາງເຊືອກໄດ້ມັດຜ້າແດງຜືນໜຶ່ງ.ເມື່ອໄດ້ຍິນຄຳສັ່ງໃຫ້ເລີ່ມຕົ້ນ,ສອງຄົນກໍຈະອອກແຮງສຸດຂີດຄານໄປ ທິດທາງທີ່ກົງກັນຂ້າມ,ຜູ່ໃດດຶງເຊືອກໃຫ້ຜ້າແດງກາຍເສັ້ນກຳນົດ,ຜູ່ນັ້ນກໍຈະໄດ້ຮັບໄຊຊະນະ.ບຶດໜຶ່ງ,ບາວຜູ່ໜຶ່ງທີ່ຊື່ວ່າສາຍຢາງຈຽນໂຊກໄດ້ຮັບໄຊຊະນະ,ລາວບອກນັກຂ່າວດ້ວຍຄວາມດີໃຈວ່າ,ການໄດ້ຮັບໄຊຊະນະໃນການແຂ່ງຂັນຢາເຈ່ຍ,ຕາມຊາວເຜົ່າຕິເບດເຫັນວ່າຍັງມີຄວາມໝາຍສຳຄັນອີກອັນໜຶ່ງ:
"ນີ້ແມ່ນການແຂ່ງຂັນສຳລັບຊາວໜຸ່ມ,ຜູ່ທີ່ໄດ້ຮັບໄຊຊະນະກໍຖືກເອີ້ນເປັນຜູ່ກ້າຫານ,ທັງຈະເປັນຜູ່ທີ່ຖືກຕາຕ້ອງໃຈຂອງຜູ່ສາວທັງຫຼາຍ"
1 2 3
|
