|
ວັງໂພທາລາກໍ່ຂຶ້ນຕາມພູດອຍ,ຕຶກຫຼາຍຫຼັງສະຫຼັບຊັບຊ້ອນກັນ,ຫໍໂຮງທັງສູງທັງຊັນ,ສະຫງ່າຜ່າເຜີຍທີ່ສຸດ,ທາສີແດງ,ສີຂາວແລະສີເຫຼືອງກົມກຽວກັນຢ່າງແຈ່ມແຈ້ງ,ວັງໂປຕາລາກໍ່ຂຶ້ນໂດຍແບ່ງເປັນພາກສ່ວນແຕ່ລະຊັ້ນສ້າງຄວບກັນທັງໝົດເຫຼົ່ານີ້ໄດ້ສະແດງໃຫ້ເຫັນສີສັນພິເສດທີ່ຕິດໃຈຄົນຂອງສະຖາປັດຕະຍະກຳບູຮານຊົນເຜົ່າຕິເບດ.ວັງໂປຕາລາແມ່ນຕົວແທນທີ່ດີເລີດຂອງສິ່ງກໍ່ສ້າງແບບຕິເບດ,ກໍ່ແມ່ນຍອດຍິ່ງຂອງສິ່ງກໍ່ສ້າງບູຮານຂອງປະຊາຊົນຈີນ.
ການອອກແບບແລະການກໍ່ສ້າງຂອງວັງແມ່ນອີງຕາມກົດເກນສ່ອງແສງຕາເວັນຂອງເຂດພູພຽງ,ພື້ນຝາທັງກວ້າງທັງໝັ້ນຄົງ,ຢູ່ໃຕ້ພື້ນຝາມີຂຸມໃຕ້ດິນແລະປ່ອງອາກາດລຸລ່ວງທີ່ໄປ ທົ່ວທຸກທິດໄດ້.ໃນຫໍໂຮງຂອງວັງມີເສົາ,ຂື່ແລະໄມ້ກອນເປັນຕົ້ນ,ປະກອບເປັນໂຄງຄ້ຳປະກັນຄວາມແໝ້ນແກ່ນ.ດິນທີ່ປູພື້ນແລະຫຼັງຄານັ້ນແມ່ນດິນແຂງຊະນິດໜຶ່ງເອີ້ນວ່າ"ອາເອີກາ",ຢູ່ເພດານຂອງຫໍໂຮງແລະຫ້ອງນອນຕ່າງໆລ້ວນແຕ່ມີປ່ອງຢ້ຽມ,ແລ້ວຈະໄດ້ຮັບແສງແລະປັບອາກາດກໍ່ໄດ້.ຢູ່ເທິງເສົາແລະຂື່ໃນວັງໄດ້ແກະສະຫຼັກຮູບຫຼາຍຊະນິດ,ເນື້ອທີ່ຮູບແຕ້ມຝາຜະໜັງສີກໍມີ2500ກວ່າຕາແມັດ.
ໃນວັງຍັງໄດ້ເກັບມ້ຽນພາບ"ຖາງຂາ"ທີ່ແຕ້ມຢູ່ເທິງຜ້າຝ້າຍຫຼືຜ້າໃໝເຊິ່ງມີສີສັນພິເສດຂອງຕິເບດ,ພ້ອມດ້ວຍວັດຖຸບູຮານທຸກສະໄໝ.ປີ1961,ວັງໂພທາລາໄດ້ຈັດເປັນບ່ອນສຳຄັນເພື່ອອະນຸລັກວັດຖຸບູຮານລະດັບຊາດ,ແລະໄດ້ຮັບການປະຕິສັງຂອນຢ່າງຮອບດ້ານໃນປີ1989.
ຕາມເລົ່າລືກັນວ່າ,ເມື່ອຄ.ສ.ສັດຕະວັດທີ7,ສົມເດັດຊົງຈັນກັນບູ ເຈົ້າຊີວິດ ຕິເບດໃນຄາວນັ້ນເພື່ອອະພິເສດສົມລົດກັບເຈົ້າຍິງເວີນເຊີງລາຊະວົງທາງ,ຊົງໄດ້ສ້າງວັງ9ຊັ້ນທີ່ມີ1000ຫ້ອງຢູ່ເທິງພູຮົງຊ່ານເຊິ່ງສູງກວ່າລະດັບນ້ຳທະເລ3700ກວ່າແມັດຂອງເມືອງລາຊາເປັນພິເສດ,ຕັ້ງຊື່ວ່າວັງໂປຕາລາ.ເມື່ອລາຊະອານາຈັກຕິເບດທີ່ສົມເດັດຊົງຈັນກັນບູຊົງສ້າງຕັ້ງຂຶ້ນໄດ້ສະຫວັນຄົດແລ້ວ,ໂຮງສ່ວນຫຼາຍຂອງວັງບູຮານກໍ່ໄດ້ຖືກທຳລາຍໃນແປວໄຟສົງຄາມ,ຈົນຮອດສະຕະວັດທີ17,ຫຼັງຈາກພະດາໄລລາມາອົງທີ5ສ້າງຕັ້ງລາຊະວົງເກີຕ່ານໂພ່ຈ່າງແລະໄດ້ຮັບລາຊະວົງເຊັ່ນພະລາຊະທາມຍົດບັນສັກໃຫ້ເປັນຫົວໜ້າທາງການເມືອງແລະສາດສະໜາຂອງທ້ອງຖິ່ນຕິເບດຢ່າງເປັນທາງການແລ້ວ,ຈິ່ງໄດ້ເລິ່ມສ້າງວັງໂປຕາລາຄືນໃໝ່,ໃນປີ1645.ຫຼັງຈາກນັ້ນ,ພະດາໄລລາມາທຸກອົງກໍ່ໄດ້ຂະຫຍາຍສ້າງວັງໂປຕາລາ,ຈິ່ງໄດ້ມີຂະໜາດຄືໃນປັດຈຸບັນ.
ຫໍໂຮງຊ້ອນກັນ,ຄົດລ້ຽວກ້ຽວກອດ,ເຊື່ອມໂຍງເຂົ້າກັບພູເຂົາຢ່າງມີຊີວິດຊີວາ,ນີ້ແມ່ນພາບພົດໂດຍກົງກວ່າໝູ່ຂອງຄົນທັງຫຼາຍທີ່ມີຕໍ່ວັງໂປຕາລາ.ເບິ່ງຢູ່ຂ້າງນອກ,ວັງໂປຕາລາມີ13ຊັ້ນ,ຈາກຕີນພູຈົນເຖິງຈອມພູ.ສິ່ງກໍ່ສ້າງກວມລວມຕົ້ນຕໍປະກອບດ້ວຍວັງຂາວທີ່ຢູ່ຕິດເວັນອອກ ເຊິ່ງເປັນບ່ອນຢູ່ຂອງພະດາໄລລາມາ,ວັງແດງທີ່ຢູ່ຕິດກາງ ເຊິ່ງເປັນຫໍໄຫວ້ພະແລະຫໍທາດບັນຈຸສົບຂອງພະດາໄລລາມາທຸກອົງ ພ້ອມດ້ວຍກຸດີສີຂາວທີ່ຢູ່ດ້ານຕາເວັນຕົກ ເຊີ່ງເປັນບ່ອນພັກຂອງພະລາມາຜູ້ໃກ້ຊິດທີ່ຮັບໃຊ້ພະດາໄລລາມາ.ຢູ່ໜ້າວັງແດງຍັງມີກຳແພງສີຂາວ ເອີ້ນວ່າແທ່ນຕາກແດດພະ,ແມ່ນບ່ອນແຂວນພະພຸດທະຮູບແຜ່ນໃຫຍ່ໃນວັນບຸນທາງພຸດທະສາດສະໜາ
ໃນຖານະທີ່ເປັນແດນສັກສິດຂອງພຸດທະສາດສະໜານິກາຍຕິເບດ,ແຕ່ລະປີ,ມີຄົນນັບບໍ່ຖ້ວນໄປນະມັດສະການແລະທ່ອງທ່ຽວຢູ່ວັງໂປຕາລາ.ຕາມທຳມະດາ,ພວກເຂົາເຈົ້າຈະເລິ່ມຍ່າງແຕ່ສີລາຈາລຶກທີ່ບໍ່ແກະສະຫັຼກຕົວໜັງສືຢູ່ຕີນພູ,ຜ່ານທາງຄ້ອຍທີ່ປູດ້ວຍຫີນອັນຄົດລ້ຽວ,ຈົນຮອດປະຕູໃຫຍ່ດ້ານຕາເວັນອອກທີ່ມີຮູບແຕ້ມຝາຜະໜັງຈະຕຸນັກອົງຄະລັກພະພຸດທະເຈົ້າ,ຈາກປະຕູດັ່ງກ່າວຜ່ານອຸໂມງຂອງວັງທີ່ໜາ4ແມັດກໍເຂົ້າສູ່ຫໍໂຮງໃຫຍ່ໄດ້.
1 2 3
|
