|
ວັນນີ:ສະບາຍດີທ່ານຜູ່ຟັງທີ່ຮັກແພງ, ລາຍການຫ້ອງດົນຕີ 93 ທາງ cri fm 93mhz ໄດ້ວຽນມາພົບກັບທ່ານອີກແລ້ວ.
ຫນຸ່ມໃຫຍ່:ເຈົ້າສະບາຍດີທ່ານຜູ່ຟັງທີ່ຮັກແພງ, ຫນຸ່ມໃຫຍ່ອາລົມດີກັບວັນນີດີໃຈຫລາຍທີ່ໄດ້ພົບກັບທ່ານອີກແລ້ວ, ໃນລາຍການນີ້ທີ່ອອກອາກາດມື້ລະສອງເທື່ອ, ພວກເຮົາກໍ່ໄດ້ຈັດເອົາເພງມ່ວນໆຫລາຍໆເພງ, ແລະລົມເລື່ອງທີ່ເປັນຂໍ້ຄິດເລັກໆນ້ອຍໆສູ່ຟັງ.
ວັນນີ:ສຳລັບໃນລາຍການມື້ນີ້,ຜູ່ຟັງບາງທ່ານອາດຈະຮູ້ແລ້ວ, ພວກເຮົາຈະຈັດເອົາເລື່ອງກ່ຽວກັບງານໂອລິມປິກສູ່ຟັງ.ໃນຄໍລຳນີ້,ພວກເຣົາແມ່ນໄດ້ຫວນຄືນປະຫວັດສາດຂອງງານກິລາໂອລິມປິກ,ລາຍງານສະພາບຫລ້າສຸດຂອງການກະກຽມງານກິລາໂອລິມປິກປັກກິ່ງປີ 2008 ສູ່ຟັງ.
ຫນຸ່ມໃຫຍ່:ທ່ານຜູ່ຟັງ, ຕັ້ງແຕ່ຈັດງານກິລາໂອລິມປິກຄັ້ງປະຖົມມະເລີກເມື່ອປີ 1896 ເປັນຕົ້ນມາ,ໃນໄລຍະຮ້ອຍກວ່າປີມານີ້, ໄດ້ມີນັກກິລາຜູ່ດີເລີດຫລາຍໆຄົນກຳເນີດຢູ່ບົນເວທີງານກິລາໂອລິມປິກ.ສະນັ້ນ ໃນລາຍການມື້ນີ້ ຫນຸ່ມໃຫຍ່ກັບວັນນີກໍ່ຈະເລືອກເອົາເລື່ອງກ່ຽວກັບນັກກິລາຜູ່ດີເດັ່ນບາງຄົນມາເລົ່າສູ່ທ່ານຟັງ.
ວັນນີ:ອື່,ບັດນີ້ ວັນນີຈະເປີດເພງສູ່ຟັງກ່ອນ,ແລ້ວພວກເຮົາຈະເລົ່າເລື່ອງກ່ຽວກັບເຈຊີ.ໂອເວີສ ນັກກິລາແລ່ນແລະລານຂອງອາເມລິກາ ທີ່ຖືກຖືເປັນນັກກິລາຜູ່ຍິ່ງໃຫຍ່ຜູ່ຫນຶ່ງໃນປະຫວັດງານໂອລິມປິກສູ່ຟັງ.ເພງທຳອິດຈາກລາຍການຈະໃຫ້ຟັງເພງທີ່ມີຊື່ວ່າ 我最闪亮 ຂ້ອຍເດັ່ນກວ່າຫມູ່.
ຫນຸ່ມໃຫຍ່:ເພງທຳອິດຈາກລາຍການຜ່ານໄປແລ້ວ, ຄິດວ່າຄົງຈະຖືກໃຈທ່ານຢູ່ຕິ໋ເນາະ.ບັດນີ້ ວັນນີກັບຫນຸ່ມໃຫຍ່ຈະເລົ່າເລື່ອງຂອງເຈຊີ.ໂອເວີສສູ່ຟັງ.ໂອເວີສເກີດຢູ່ຄອບຄົວຂອງຊາວປູກດອກຝ້າຍທີ່ພາກໃຕ້ຂອງອາເມລິກາໃນປີ 1913,ແມ່ນລູກຫລານຂອງຂ້ອຍຂ້າຄົນຜິວດຳ.ລາວມີພອນສະຫວັນດ້ານກິລາມາແຕ່ເກີດ.ແຕ່ຈົນຮອດອາຍຸ 9 ປີ, ລາວຈິ່ງມີໂອກາດເຂົ້າຮ່ວມການກິລາ.ຍ້ອນຄອບຄົວທຸກຫລາຍ,ລາວຈິ່ງໄດ້ເລືອກລາຍການແລ່ນແລະລານທີ່ບໍ່ຈຳເປັນຊື້ເຄື່ອງຫລິ້ນກິລາ.ໃນເວລາເຂົ້າຮຽນຢູ່ໂຮງຮຽນມັດທະຍົມ,ລາວເຄີຍແລ່ນທັນສະຖິຕິໂລກໃນການແຂ່ງຂັນແລ່ນ 91 ແມັດໃນງານກິລາແລ່ນແລະລານຂອງນັກຮຽນປະຖົມແລະມັດທະຍົມຄື 9 ວິນາທີ 4.ລາວກໍ່ຖືກມະຫາວິທະຍາໄລລັດໂອເຮໂອຮັບເປັນນັກສຶກສາ,ແລະໄດ້ຮັບການອົບຮົມຢ່າງເປັນລະບົບ.ໃນງານກິລານັກສຶກສາມະຫາວິທະຍາໄລທົ່ວອາເມລິກາປີ 1935, ໂອເວີສໄດ້ເຂົ້າຮ່ວມການແຂ່ງຂັນຂອງ 4 ໂຄງການ,ສ່ວນການແຂ່ງຂັນຂອງ 4 ໂຄງການນີ້ລ້ວນແຕ່ຈັດຂຶ້ນໃນຕອນບ່າຍມື້ດຽວກັນ.ແຕ່ລາວໄດ້ໃຊ້ເວລາ 45 ນາທີ,ກໍ່ໄດ້ຮັບຜົນທີ່ສະເຫມີຫລືມ້າງສະຖິຕິໂລກ 6 ລາຍ.ອັນນີ້ຖືວ່າແມ່ນຜົນງານທີ່ບໍ່ປົກກະຕິຫລາຍ.
ວັນນີ:ກ່ອນຈັດງານກິລາໂອລິມປິກທີ່ແບກແລງໃນປີ 1936, ເຈຊີໂອເວີສກໍ່ໄດ້ສ້າງສະຖິຕິໂລກໃຫມ່ໃນການແລ່ນ 100 ແມັດດ້ວຍຜົນງານ 10 ວິນາທີ 2,ກາຍເປັນຄົນທີ່ແລ່ນໄວກວ່າຫມູ່ໃນໂລກ.ສະຖິຕິໂລກໄດ້ຮັກສາໄວ້ 21 ປີ,ສ່ວນຜົນງານເຕັ້ນໄກ 8 ແມັດ 13 ມີລິແມັດທີ່ລາວສ້າງໄວ້ນັ້ນກໍ່ໄດ້ຮັກສາໄວ້ເຖີງ 25 ປີພຸ້ນ.
ຫນຸ່ມໃຫຍ່:ໃນງານກິລາໂອລິມປິກທີ່ແບກແລງ,ໂອເວີສໄດ້ຮັບຫລຽນຄຳສີ່ຫລຽນໃນການແຂ່ງຂັນແລ່ນ 100 ແມັດ 200 ແມັດ ເຕັ້ນໄກ ແລ່ນຕໍ່ 4*100 ແມັດ.ສ່ວນໃນການແຂ່ງຂັນກະກຽມ ຮອບຄັດເລືອກ ແລະຮອບຊິງຊະນະເລີດຂອງການແຂ່ງຂັນສີ່ລາຍນີ້, ລາວກໍ່ໄດ້ສະເຫມີຫລືມ້າງສະຖິຕິໂລກຕັ້ງ 12 ເທື່ອ,ຄົນທັງຫລາຍກໍ່ພາກັນເອີ້ນລາວເປັນຟ້າຜ່າສີດຳແລະຈະຫລວດສີດຳ.
1 2 3 4
|
