ວັນເດັກນ້ອຍປີນີ້ ລະດົມໃຫ້ເດັກນ້ອຍພະຍາຍາມສູ້ຊົນຍ້ອນໄພແຜ່ນດິນໄຫວ
-----------------------------------------------------------------------------------------------------------------
ວັນເດັກນ້ອຍສາກົນ"1ມິຖຸນາ"ຫາກໍ່ຜ່ານໄປ,ແຕ່ວັນເດັກນ້ອຍປີນີ້ ເວົ້າສຳລັບເດັກນ້ອຍຢູ່ເຂດປະສົບໄພແຜ່ນດິນໄຫວເວີ້ນຊ່ວນແຂວງເສສວນຈີນແລ້ວແມ່ນວັນບຸນທີ່ບໍ່ທຳມະດາ.ໃນລາຍການມື້ນີ້,ນັກຂ່າວCRIຈະພາທ່ານຜູ່ຟັງໄປສຳຜັດກັບເດັກນ້ອຍທີ່ຢູ່ໂຮງຮຽນຕູບຜ້າເຕັ້ນເຂດຈ້າວຈຽວເມືອງສືຝ່າງແຂວງເສສວນ,ເພື່ອເບິ່ງການສະຫຼອງວັນເດັກນ້ອຍປີນີ້ທີ່ບໍ່ທຳມະດາຂອງເຂົາເຈົ້າວ່າເປັນແນວໃດ.
ທ່ານຜູ່ຟັງ,ທີ່ຟັງມານັ້ນແມ່ນສຽງຂອງຄູສອນທີ່ໂຮງຮຽນຕູບຜ້າເຕັ້ນເຂດຈ້າວຈຽວເມືອງສືຝ່າງຮ້ອງຊື່ນັກຮຽນກ່ອນຈະເລີ່ມຮຽນ.ກ່ອນນີ້ເຄິ່ງເດືອນປາຍ,ເດັກນ້ອຍຂອງໂຮງຮຽນເຂດຈ້າວຈຽວກຳລັງກະກຽມສະຫຼອງວັນບຸນຂອງຕົນຢ່າງເບີກບານມ່ວນຊື່ນ,ແຕ່ແຜ່ນດິນໄຫວໃນເມື່ອບໍ່ດົນມານີ້ພັດຝັງທຸກຢ່າງທີ່ສວຍງາມ.
ຫຼັງຈາກເກີດແຜ່ນດິນໄຫວໃນ"ວັນທີ12ພຶດສະພາ"ແລ້ວ,ປະຊາຊົນຜູ່ປະສົບໄພຈຳນວນຫຼວງຫຼາຍໄດ້ຍົກຍ້າຍໄປຢູ່ເຂດຈ້າວຈຽວ.ໂຮງຮຽນສູນກາງເຂດຈ້າວຈຽວກາຍເປັນຈຸດລວມສູນຂອງປະຊາຊົນທີ່ປະສົບໄພ.ຍ້ອນວ່າຍັງມີແຮງສັ່ນສະເທືອນຕາມມາເລື້ອຍໆ,ເພື່ອຮັບປະກັນຊີວິດການເປັນຢູ່ປະຈຳວັນຂອງປະຊາຊົນແລະໃຫ້ເດັກນ້ອຍໄດ້ຮ່ຳຮຽນ,ໜ່ວຍກວດສຸຂະພາບຂອງກຸ່ມບໍລິສັດປະກັນໄພປະຊາຊົນຈີນໄດ້ກາງຕູບຜ້າເຕັ້ນຫຼາຍສິບຕູບຢູ່ແຫ່ງນີ້,ສ້າງໂຮງຮຽນຕູບຜ້າເຕັ້ນຊົ່ວຄາວ.
ນາງຖຽນຖຽນອາຍຸ9ປີແມ່ນເດັກຍິງທີ່ອາຍ.ແຜ່ນດິນໄຫວຄັ້ງນີ້ຍິ່ງເຮັດໃຫ້ນາງ ບໍ່ມັກປາກເວົ້າ.ເວລາໝູ່ເພື່ອນຫຼິ້ນນຳກັນໃນໂມງເລີກຫຼິ້ນ,ນາງຖຽນຖຽນມັກເກັບຕົວຢູ່ງຽບໆບໍ່ເວົ້າຫຍັງ.ແຕ່ວ່າ ເມື່ອນັກຂ່າວໄປຖາມຄວາມຕ້ອງການຂອງນາງໃນວັນເດັກນ້ອຍທີ1ມິຖຸນາປີນີ້,ນາງພັດບອກຄວາມມຸ່ງຫວັງຂອງຕົນຢ່າງ ກ້າຫານສູ່ຟັງວ່າ:
"ເມື່ອຂ້ອຍໃຫຍ່ຂຶ້ນມາ,ຂ້ອຍຢາກເປັນແພດ.ເພາະວ່າຖ້າເກີດແຜ່ນດິນໄຫວອີກ,ຂ້ອຍສາມາດຊ່ວຍກູ້ຊີວິດຄົນຫຼາຍກວ່າ."
ເມື່ອທຽບກັບນາງຖຽນຖຽນອາຍຸ9ປີ,ນາງເຢີ້ນຢົງພີງອາຍຸ15ປີຈະມີຈິດໃຈເປັນຜູ່ໃຫຍ່ກວ່າ.ແຜ່ນດິນໄຫວເຮັດໃຫ້ເຮືອນຂອງນາງລົ້ມເພພັງໝົດ.ປະຈຸບັນ ນາງພັກຢູ່ໃນຕູບຜ້າເຕັ້ນຊົ່ວຄາວນຳພໍ່ແມ່ແລະປູ່.ໃນຖານະເປັນນັກຮຽນອາຍຸສູງກວ່າໝູ່ໃນໂຮງຮຽນຕູບຜ້າເຕັ້ນ,ນາງເວົ້າວ່າ,ວັນເດັກນ້ອຍປີນີ້ເຮັດໃຫ້ນາງເປັນຜູ່ໃຫຍ່ໄວ.
"ຂ້ອຍຮູ້ສຶກວ່າ,ສະຖານທີ່ແຫ່ງນີ້ໄດ້ສະເທືອນໃຈຂ້ອຍຫຼາຍ.ໂດຍສະເພາະແມ່ນຄູຫຼາຍຄົນ,ພວກເພິ່ນແມ່ນອາສາສະໝັກ.ຂ້ອຍຈື່ໄດ້ວ່າ ມີຄູຜູ່ໜຶ່ງ, ພີ່ນ້ອງຂອງເພິ່ນກໍ່ປະສົບໄພເຊັ່ນກັນ,ໃນເວລາຫຼິ້ນນຳພວກເຮົາ,ເພິ່ນເບິ່ງແຍງພວກເຮົາດີທີ່ສຸດ.ຂ້ອຍຫວັງໃຫ້ໄພທຳມະຊາດເທື່ອນີ້ສິ້ນສຸດລົງໂດຍໄວ,ພວກເຮົາຈຶ່ງຈະໄດ້ກັບຄືນສູ່ໂຮງຮຽນໂດຍໄວ."