ກອງປະຊຸມບໍ່ເປັນທາງການຂອງຜູ້ນຳເອເປັກຄັ້ງທີ16ອັດລົງແລ້ວ
-----------------------------------------------------------------------------------------------------------------
ຕາມຂ່າວCRI:ວັນທີ23ພະຈິກນີ້,ກອງປະຊຸມບໍ່ເປັນທາງການຂອງຜູ້ນຳອົງ ການຮ່ວມມືດ້ານເສດຖະກິດອາຊີປາຊີຟິກຫຼືເອເປັກຄັ້ງທີ16ທີ່ດຳເນີນເປັນເວລາ2ວັນຢູ່ນະຄອງຫຼວງລີມາຂອງເປຣູໄດ້ອັດລົງ.ກອງປະຊຸມໄດ້ອອກຖະແຫຼງການລີມາແລະຖະແຫຼງການກ່ຽວກັບສະຖານະການເສດຖະກິດທົ່ວໂລກຂອງຜູ້ນຳອົງການເອເປັກທີ່ໄດ້ບັນລະຍາຍຄວາມເຫັນທີ່ເປັນເອກະສັນກັນຂອງສະມາຊິກຕ່າງໆກ່ຽວກັບສະຖານະການເສດຖະກິດໂລກ,ການເຈລະຈາຮອບໂດຮາ,ຄວາມປອດໄພທາງອາຫານ,ຄວາມປອດໄພຂອງພະລັງງານ,ເສດຖະກິດພາກພື້ນເຊື່ອມໂຍງເຂົ້າກັນ,ແລະການປ່ຽນແປງຂອງດິນຟ້າອາກາດ,ໃຫ້ຄຳໝັ້ນສັນຍາວ່າ,ຈະນຳໃຊ້ມາດຕະການທີ່ຈຳເປັນ,ຮ່ວມມືເຊິ່ງກັນແລະກັນ,ເຄື່ອນໄຫວຢ່າງຮອບດ້ານແລະປະສານງານກັນເພື່ອຮັບມືກັບວິກິດການການເງິນທົ່ວໂລກໃນປະຈຸບັນ.
ໃນຖະແຫຼງການທີ່ຜູ້ນຳສະມາຊິກ 22 ປະເທດປະກາດກ່ຽວກັບສະຖານະການເສດຖະກິດທົ່ວໂລກ, ບັນດາສະມາຊິກອົງການເອເປັກກ່າວວ່າ, ສະໜັບສະໜູນຖະແຫຼງການທີ່ກອງປະຊຸມສຸດຍອດຕະຫຼາດການເງິນແລະເສດຖະກິດໂລກຂອງຜູ້ນຳກຸ່ມ 20 ປະເທດຫຼື G20 ປະກາດໃນຫວ່າງມໍ່ໆນີ້ແລະ "ແຜນການເຄື່ອນໄຫວ" ກ່ຽວກັບການປະຕິຮູບຕະຫຼາດການເງິນ, ແລະກ່າວເນັ້ນວ່າ, ສະມາຊິກອົງການເອເປັກຄັດຄ້ານລັດທິປົກປ້ອງການຄ້າດ້ວຍຮູບການຕ່າງໆ, ແລະໃຫ້ຄຳໝັ້ນສັນຍາວ່າຈະປະສານງານຢ່າງໃກ້ຊິດ, ໃຊ້ການເຄື່ອນໄຫວຮອບດ້ານແລະປະສານສົມທົບກັນຕື່ມອີກເພື່ອຮັບມືກັບວິກິດການການເງິນສາກົນໃນປະຈຸບັນ. ຜູ້ນຳຂອງເອເປັກຍັງໄດ້ໃຫ້ຄຳໝັ້ນສັນຍາໃນຖະແຫຼງການວ່າ, ໃນ 12 ເດືອນຕໍ່ໄປ, ຈະຫຼີກເວັ້ນບໍ່ສ້າງສິ່ງກີດຂວາງໃໝ່ຕໍ່ການລົງທຶນແລະການຄ້າສິນຄ້າແລະບໍລິການຕື່ມອີກ, ບໍ່ປະຕິບັດມາດຕະການທີ່ຝ່າຝືນລະບຽບການຂອງອົງການການຄ້າໂລກເຊິ່ງລວມທັງມາດຕະການກະຕຸ້ນການຄ້າຂາອອກໃນຂົງເຂດຕ່າງໆ.
