ກອງປະຊຸມບໍ່ເປັນທາງການຂອງຜູ້ນຳເອເປັກຄັ້ງທີ16ອັດລົງແລ້ວ
-----------------------------------------------------------------------------------------------------------------
"ຖະແຫຼງການລີມາ" ທີ່ປະກາດໃນເວລາກອງປະຊຸມສິ້ນສຸດລົງໃນວັນທີ 23 ພະຈິກນີ້ຊີ້ອອກວ່າ, ວິກິດການການເງິນທົ່ວໂລກໃນປະຈຸບັນແມ່ນສິ່ງທ້າທາຍຕໍ່ເສດຖະກິດທີ່ໜັກໜ່ວງກວ່າໝູ່ທີ່ທົ່ວໂລກພວມປະເຊີນຢູ່, ສະມາຊິກອົງການເອເປັກຈະຮັບມືກັບສະພາບການທີ່ເສດຖະກິດທົ່ວໂລກຊຸດໂຊມລົງທີ່ຈະມາເຖິງໃນໄວໆນີ້ຢ່າງວ່ອງໄວແລະຂາດຕົວ, ອົງການເອເປັກຍິນດີຕ້ອນຮັບແຜນການກະຕຸ້ນເງິນຕາແລະການເງິນຂອງສະມາຊິກຕ່າງໆ, ແລະຈະໃຊ້ມາດຕະການເສດຖະກິດແລະການເງິນອັນຈຳເປັນທຸກຢ່າງຮັບມືກັບວິກິດການ. ຖະແຫຼງການຍັງໄດ້ບັນລະຍາຍຫຼັກໝັ້ນກ່ຽວກັບຫົວຂໍ້ຫາລືຕ່າງໆ, ຄື: ເສດຖະກິດພາກພື້ນເຊື່ອມໂຍງເຂົ້າກັນ, ຄວາມປອດໄພດ້ານອາຫານ, ຄວາມປອດໄພຂອງມະນຸດແລະການປ່ຽນແປງຂອງດິນຟ້າອາກາດ.
ກອງປະຊຸມເທື່ອນີ້ແມ່ນເວທີອີກແຫ່ງໜຶ່ງຂອງຜູ້ນຳຫຼືຜູ້ແທນສະມາຊິກອົງການເອເປັກຕ່າງໆເພື່ອຫາລືສະຖານະການເສດຖະກິດທົ່ວໂລກຫຼັງຈາກກອງປະຊຸມສຸດຍອດອາຊີເອີລົບທີ່ປັກກິ່ງແລະກອງປະຊຸມສຸດຍອດຕະຫຼາດການເງິນແລະເສດຖະກິດໂລກຂອງຜູ້ນຳກຸ່ມ 20 ປະເທດຫຼື G20 ທີ່ວໍຊິງຕັນ, ຖະແຫຼງການກ່ຽວກັບເສດຖະກິດທົ່ວໂລກທີ່ບັນດາສະມາຊິດຮ່ວມການຖະແຫຼງອອກມານັ້ນກໍ່ແມ່ນເນື້ອໃນເພີ່ມຕື່ມທີ່ດີຕໍ່ຖະແຫຼງການວໍຊິງຕັນ. ໃນຖານະເປັນອົງການຮ່ວມມືເສດຖະກິດລັກສະນະພາກພື້ນໃຫຍ່ກວ່າໝູ່ໃນໂລກ, ອົງການເອເປັກມີໜ້າທີ່ຮັບຜິດຊອບສຳຄັນໃນດ້ານການສະກັດກັ້ນວິກິດການການເງິນແລະຊຸກຍູ້ການພັດທະນາເສດຖະກິດຂອງໂລກ. ໂດຍຜ່ານກອງປະຊຸມເທື່ອນີ້, ຜູ້ນຳສະມາຊິກອົງການເອເປັກໄດ້ບັນລຸຄວາມເຫັນທີ່ເປັນເອກະສັນກັນຢ່າງສູງກ່ຽວກັບບັນຫາຕ່າງໆ, ເຊັ່ນ: ການຊຸກຍູ້ການຮ່ວມມືສາກົນ, ຄັດຄ້ານລັດທິປົກປ້ອງການຄ້າ, ຊຸກຍູ້ການຄ້າແລະການລົງທຶນຫັນເປັນເສລີເປັນຕົ້ນ, ບໍ່ພຽງແຕ່ເຮັດໃຫ້ສະມາຊິກຕ່າງໆເພີ່ມຄວາມໄວ້ເນື້ອເຊື່ອໃຈກັນແລະສາມັກຄີກັນ, ທັງຍັງໄດ້ເພີ່ມທະວີຄວາມໝັ້ນໃຈຂອງປະຊາຄົມໂລກຕໍ່ການສະກັດກັ້ນຄວາມປັ່ນປ່ວນດ້ານການເງິນທົ່ວໂລກແລະຊຸກຍູ້ການພັດທະນາເສດຖະກິດໂລກ.
ພ້ອມກັນນັ້ນ, ໃນສະມາຊິກອົງການເອເປັກ, ປະເທດພວມພັດທະນາແລະອົງກອນເສດຖະກິດຈະເລີນໃໝ່ກວມເອົາຈຳນວນຫຼວງຫຼາຍ, ສະມາຊິກເຫຼົ່ານີ້ຈະໄດ້ຮັບສິດປະກອບຄຳຄິດຄຳເຫັນໃນການປະຕິຮູບລະບົບການເງິນສາກົນຫຼາຍກວ່າເກົ່າຫຼືບໍ່, ສາມາດຫຼຸດພົ້ນອອກຈາກວິກິດການການເງິນໃນປະຈຸບັນຫຼືບໍ່ກໍ່ແມ່ນຂໍກະແຈຕັດສິນການພັດທະນາຂອງອົງການເອເປັກ.
