ສະບາຍດີທ່ານຜູ້ຟັງທີ່ເຄົາລົບ, ໂດຍຕອບສະໜອງຕາມຄຳເຊີນຂອງທ່ານບາຣັກ ໂອບາມາ, ປະທານາທິບໍດີອາເມລິກາ, ທ່ານຫູຈິນທາວ, ປະທານປະເທດຈີນ ຈະໄປຢ້ຽມຢາມອາເມລິກາທາງລັດຖະກິດແຕ່ວັນທີ 18 ຫາວັນທີ 21 ມັງກອນນີ້. ໃນກອງປະຊຸມຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 12 ມັງກອນນີ້, ທ່ານຊຸ່ຍທ່ຽນຄາຍ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນ ກ່າວວ່າ, ຈີນຫວັງວ່າທ່ານປະທານຫູຈິນທາວໄປຢ້ຽມຢາມອາເມລິກາເທື່ອນີ້ ຈະຊຸກຍູ້ການພົວພັນທີ່ຕັ້ງໜ້າ, ການຮ່ວມມືແລະຮອບດ້ານລະຫວ່າງຈີນກັບອາເມລິກາໃຫ້ຂະຫຍາຍຕົວຕື່ມອີກ, ກຳນົດທິດຂະຫຍາຍຕົວຂອງການພົວພັນລະຫວ່າງສອງປະເທດໃນຍຸກໃໝ່. ຕໍ່ໄປເຊີນຟັງລາຍລະອຽດຂອງຂ່າວ.
ວັນທີ 12 ມັງກອນນີ້, ໃນກອງປະຊຸມຂ່າວທີ່ມີນັກຂ່າວພາຍໃນແລະຕ່າງປະເທດເຂົ້າຮ່ວມ, ທ່ານຊຸ່ຍທ່ຽນຄາຍ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນ ໄດ້ແນະນຳແຜນການເດີນທາງໄປຢ້ຽມຢາມອາເມລິກາຂອງທ່ານຫູຈິນທາວ, ແລະຕອບຄຳຖາມຂອງນັກຂ່າວກ່ຽວກັບບັນຫາການຮ່ວມມືສອງຝ່າຍແລະຫຼາຍຝ່າຍລະຫວ່າງຈີນກັບອາເມລິກາ. ທ່ານກ່າວເນັ້ນວ່າ: "ປັດຈຸ ບັນ, ສະຖານະການສາກົນຍັງສືບຕໍ່ມີການປ່ຽນແປງຢ່າງສັບສົນແລະເລິກເຊິ່ງ, ສິ່ງທ້າທາຍໃນທົ່ວໂລກນັບມື້ນັບເພີ່ມຂຶ້ນ, ປະເທດຕ່າງໆມີຄວາມເພິ່ງພາອາໄສເຊິ່ງກັນແລະກັນຍິ່ງແໜ້ນແຟ້ນກວ່າເກົ່າ. ໃນຖານະທີ່ເປັນປະເທດກຳລັງພັດທະນາທີ່ໃຫຍ່ກວ່າໝູ່ ແລະ ເປັນປະເທດທີ່ພັດທະນາແລ້ວທີ່ໃຫຍ່ກວ່າໝູ່ໃນໂລກ, ຈີນແລະອາເມລິກາມີຜົນປະໂຫຍດຮ່ວມຢ່າງກວ້າງຂວາງ, ປະເຊີນໜ້າກັບສິ່ງທ້າທາຍຫຼາຍຢ່າງ ແລະ ມີຄວາມຮັບຜິດຊອບທີ່ສຳຄັນຮ່ວມກັນ ໃນບັນຫາສຳຄັນຕ່າງໆທີ່ກ່ຽວພັນເຖິງສັນ ຕິພາບແລະການພັດທະນາຂອງໂລກ, ໂດຍສະເພາະແມ່ນພາກພື້ນອາຊີປາຊີຟິກ. ການພົວພັນລະຫວ່າງຈີນກັບອາເມລິກາ ກາຍເປັນໜຶ່ງໃນການພົວພັນລະຫວ່າງສອງຝ່າຍທີ່ສຳຄັນກວ່າໝູ່ໃນໂລກ.
ທ່ານຊຸ່ຍທ່ຽນຄາຍກ່າວວ່າ,ນັບແຕ່ປະທານາທິບໍດີໂອບາມາຂຶ້ນຮັບຕຳແໜ່ງເປັນເວລາ 2 ປີມານີ້, ລວມໂດຍແລ້ວ,ການພົວພັນລະຫວ່າງຈີນ-ອາເມລິກາໄດ້ຮັກສາທ່ວງທ່າຂະຫຍາຍຕົວທີ່ດີ, ແລະໄດ້ຮັບຄວາມຄືບໜ້າອັນຕັ້ງໜ້າໃໝ່. ແຕ່ຍ້ອນສະພາຕົວຈິງແຫ່ງຊາດມີຄວາມແຕກຕ່າງກັນ, ຈີນກັບອາເມລິກາມີຄວາມຮູ້ສຶກ ແລະ ຄວາມເຫັນທີ່ຕ່າງກັນໃນບັນຫາ, ຈິ່ງຈະຫຼີກເວັ້ນບໍ່ໄດ້ທີ່ລະຫວ່າງສອງປະເທດ ຈະເກີດມີບັນຫາແລະ ຄວາມຂັດແຍ່ງທີ່ຕ້ອງຕິດຕໍ່ປະສານງານກັນ. ທ່ານຊຸ່ຍທ່ຽນຄາຍກ່າວເນັ້ນວ່າ, ສອງຝ່າຍຄວນແກ້ໄຂບັນຫາ ແລະ ຄວາມຂັດແຍ່ງດ້ວຍຈິດໃຈທີ່ເຄົາລົບເຊິ່ງກັນແລະກັນ ແລະ ເພິ່ມທະວີຄວາມໄວ້ເນື້ອເຊື່ອໃຈກັນ,ແລະພະຍາຍາມໃຫ້ໄດ້ຮັບໝາກຜົນທີ່ຕ່າງຝ່າຍຕ່າງມີຜົນປະໂຫຍດ.
ກ່ຽວກັບບັນຫານີວເຄຼຍແຫຼມເກົາຫຼີຈະຖືກຈັດເຂົ້າໃນຫົວຂໍ້ການພົບປະເຈລະຈາລະຫວ່າງປະມຸກລັດຈີນ-ອາເມລິກາຫຼືບໍ່ນັ້ນ, ທ່ານຊຸ່ຍທ່ຽນຄາຍກ່າວວ່າ, ໃນການພົບປະເຈລະຈາລະຫວ່າງປະມຸກລັດຈີນ-ອາເມລິກາ ສອງຝ່າຍຈະແລກປ່ຽນຄວາມຄິດຄວາມເຫັນກ່ຽວກັບບັນຫາສາກົນ ແລະ ພາກພື້ນທີ່ສຳຄັນຢ່າງເລິກເຊິ່ງ,ໃນນັ້ນແນ່ນອນຈະລວມທັງສະຖານະການໃນແຫຼມເກົາຫຼີ. ທ່ານກ່າວເນັ້ນວ່າ,ຈີນ ກັບ ອາເມລິກາ ພ້ອມທັງຝ່າຍຕ່າງໆທີ່ກ່ຽວຂ້ອງມີຜົນປະໂຫຍດຮ່ວມຢ່າງກວ້າງຂວາງ ແລະ ເປົ້າໝາຍຮ່ວມໃນບັນຫາແຫຼມເກົາຫຼີ, ວຽກງານຮີບດ່ວນທີ່ສຸດໃນປະຈຸບັນແມ່ນໃຊ້ການສົນທະນາເຮັດໃຫ້ສະຖານະການຜ່ອນຄາຍລົງ. ທ່ານກ່າວເນັ້ນຕື່ມວ່າ, ຈີນຢາກຮ່ວມມືກັບອາເມລິກາຢ່າງມີປະສິດທິຜົນຢູ່ພາກພື້ນອາຊີ-ປາຊິຟິກ, ເພື່ອຮ່ວມກັນຊຸກຍູ້ສັນຕິພາບ,ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນອາຊີ-ປາຊິຟິກ.
1 2 
