ຕອນບ່າຍວັນທີ 19 ສິງຫານີ້, ຢູ່ທີ່ປັກກິ່ງ, ທ່ານຫູຈີນທາວ, ປະທານປະເທດຈີນ, ທ່ານເວີ່ນເຈ່ຍປາວ, ນາຍົກລັດຖະມົນຕີຈີນຕ່າງໄດ້ພົບປະກັບທ່ານໂຈເຊັຟ ໄບເດັນ, ຮອງປະທານາທິບໍດີອາເມລິກາ.
ໃນການພົບປະ, ທ່ານຫູຈີນທາວກ່າວວ່າ, ຈີນຍິນດີຮ່ວມກັບອາເມລິກາ, ເພີ່ມທະວີການເຈລະຈາແລະປຶກສາຫາລືໃນລະດັບຕ່າງໆ, ເພີ່ມທະວີການໄປມາຫາສູ່ກັນຢ່າງມີໄມຕີຈິດລະຫວ່າງປະຊາຊົນສອງຊາດ, ພະຍາຍາມສ້າງຄວາມໄວ້ເນື້ອເຊື່ອໃຈດ້ານຍຸດທະສາດລະຫວ່າງປະເທດ, ສ້າງເນື້ອໃນຍຸດທະສາດຂອງການພົວພັນຄູ່ຮ່ວມມືລະຫວ່າງຈີນອາເມລິກາຢ່າງບໍ່ຢຸດຢັ້ງ. ປະຈຸບັນ, ຈີນແລະອາເມລິກາຕ້ອງຄວນປະຕິບັດຕາມຄວາມເຫັນເອກະສັນກັນ ທີ່ຮັບປະກັນການເຕີບໂຕແລະຊຸກຍູ້ຄວາມໝັ້ນຄົງ, ລົງເລິກການຮ່ວມມືລະຫວ່າງສອງຝ່າຍແລະກຸ່ມ 20 ປະເທດ ພາຍໃຕ້ຂອບຫຼາຍຝ່າຍ, ຮ່ວມກັນສ້າງຄວາມເຊື່ອໝັ້ນຕໍ່ຕະຫຼາດ.
ທ່ານໄບເດັນກ່າວວ່າ, ຫວັງໃຫ້ສອງຝ່າຍເພີ່ມຄວາມເຂົ້າໃຈແລະຄວາມໄວ້ເນື້ອເຊື່ອໃຈກັນ, ຊຳລະແກ້ໄຂບັນຫາອ່ອນໄຫວທີ່ສຳຄັນຕ່າງໆ, ຊຸກຍູ້ການໄປມາຫາສູ່ກັນຢ່າງມີໄມຕີຈິດລະຫວ່າງປະຊາຊົນສອງຊາດ, ເພີ່ມທະວີການຮ່ວມມືດ້ານເສດຖະກິດ, ການເຈລະຈາແລະການປຶກສາຫາລືໃນວຽກງານພາກພື້ນແລະທົ່ວໂລກ, ຮ່ວມກັນຮັບມືກັບສິ່ງທ້າທາຍທີ່ປະຊາຄົມໂລກປະເຊີນໜ້າ.
1 2 
