"ເລີ່ມແຕ່'ສູນ'ຂອງທ່ານຊູມິງຟ່າງ"
-----------------------------------------------------------------------------------------------------------------
"ຂ້ອຍແມ່ນປະຊາຊົນຜູ້ໜຶ່ງ!"ນີ້ແມ່ນຄຳເວົ້າທີ່ຕິດປາກຂອງທ່ານຊູມິງຟ່າງ.ລາວໄດ້ນຳເອົາຍັດຕິດຂອງປະຊາຊົນທ້ອງຖິ່ນເຂົ້າຮ່ວມກອງປະຊຸມສະພາປະຊາຊົນແຫ່ງຊາດຈີນ, ນີ້ກໍແມ່ນຜູ້ແທນເຜົ່າກິ່ງຍື່ນຍັດຕິໃຫ້ສະພາປະຊາຊົນເປັນຄັ້ງທຳອິດ.
"ລັດຖະບານອີງຕາມຈຳນວນປະຊາກອນຂອງເຜົ່າ,ເຜົ່າກິ່ງຈິ່ງມີແຕ່ຜູ້ແທນຜູ້ດຽວເທົ່ານັ້ນ. ປີນີ້, ຂ້າພະເຈົ້າໄດ້ນຳເອົາຄວາມເຫັນປະມານ6ຂໍ້ມາ, ລ້ວນແຕ່ແມ່ນຂໍ້ສະເໜີ ທີ່ໃຫ້ລັດຖະບານອອກນະໂຍບາຍເພື່ອພັດທະນາເສດຖະກິດອ່າວພາກເໜືອ, ເປີດກວ້າງການຄ້າຊາຍແດນຕື່ມອີກ, ຍັງມີຂໍ້ສະເໜີກ່ຽວກັບການເຮັດໜັງສືທ່ອງທ່ຽວຢູ່ທ້ອງຖິ່ນ, ການປົກປັກຮັກສາແລະສືບທອດວັດທະນະທຳເຜົ່າກິ່ງຂອງພວກເຮົາ."
ເຜົ່າກິ່ງແມ່ນຊົນເຜົ່າທີ່ມີປະຊາກອນໜ້ອຍຂອງຈີນ, ສ່ວນຫຼາຍຕັ້ງພູມລຳເນົາຢູ່ຕາແສງຈ່ຽງພິງເມືອງຕຸ່ງຊິ່ງເຂດກວ່າງຊີ, ມີຊື່ວ່າ3ເກາະຂອງເຜົ່າກິ່ງ, 3ເກາະນີ້ລ້ວນແຕ່ແມ່ນຊາວເຜົ່າກິ່ງ, ທຸກເຊັ່ນຄົນກໍຫາປາເປັນອາຊີບ.ໃນຊຸມປີ1970, ຍ້ອນ ການຄົມມະນາຄົມບໍ່ສະດວກ, ຊາວເຜົ່າກິ່ງດຳລົງຊີວິດແບບເພິ່ງຕົນເອງ,ຖົມທະເລເຮັດເປັນນາ, ເອົາເກາະແລະແຜ່ນດິນເຊື່ອມຕໍ່ກັນ. ພາຍຫຼັງດຳເນີນການປະຕິຮູບແລະເປີດປະຕູສູ່ພາຍນອກແລ້ວ, ເຜົ່າກິ່ງມີຊີວິດການເປັນຢູ່ດີຂຶ້ນເປັນກ້າວໆ. ທີ່ມາຂອງລາຍຮັບຕົ້ນຕໍຂອງເຂົາເຈົ້າແມ່ນຫາປາ, ລ້ຽງປາ, ປຸງແຕ່ງຜະລິດຕະພັນ ທະເລ, ນອກນັ້ນກໍແມ່ນການຄ້າຂາຍຊາຍແດນ, ທ່ອງທ່ຽວແລະບໍລິການເຮືອນພັກຮ້ານອາຫານ.
ທ່ານຊູມິງຟ່າງກ່າວວ່າ, ປີກາຍນີ້, ເພີ່ນແມ່ນຕົວແທນຂອງເຜົ່າກິ່ງເຂົ້າຮ່ວມກອງປະຊຸມສະພາປະຊາຊົນເປັນຄັ້ງທຳອິດ, ບໍ່ມີປະສົບການ, ແລະກໍບໍ່ເຂົ້າໃຈຍັດຕິແລະຂໍ້ສະເໜີແມ່ນຫຍັງ, ເມື່ອຮອດປັກກິ່ງແລ້ວກໍຟັງຫຼາຍໆ,ເບີ່ງຫຼາຍໆ. ຫຼັງຈາກຜ່ານການອົບຮົມຈາກສະພາປະຊາຊົນ, ຮ່ຳຮຽນ, ອ່ານປື້ມ, ເບີ່ງເອກະ ສານແລ້ວຈິ່ງຄ່ອຍໆເຂົ້າໃຈ. ລັດຖະບານຍັງໄດ້ຈັດວາງຜູ້ແທນສະພາປະຊາຊົນໄປທັດສະນະສຶກສາຢູ່ແຫ່ງຕ່າງໆ, ເຮັດໃຫ້ເພີ່ນຮັບຮູ້ພາລະບົດບາດໜ້າທີ່ຂອງຜູ້ແທນສະພາປະຊາຊົນມີແນວໃດ. ຜ່ານການສຳຫຼວດຄົ້ນຄວ້າ,ອອກຂໍ້ສະເໜີຈຳນວນໜຶ່ງຕາມຄວາມຕ້ອງການຂອງການພັດທະນາທ້ອງຖິ່ນ, ກໍ່ກາຍເປັນຍັດຕິທີ່ນຳເອົາມາປັກກິ່ງ. ທ່ານກ່າວວ່າ,ປັດຈຸບັນ, ລະດັບຊີວິດການເປັນຢູ່ຂອງປະຊາ ຊົນເຜົ່າກິ່ງຍົກສູງຂຶ້ນຫຼາຍ, ສະນັ້ນວັດທະນະທຳຂອງເຜົ່າກິ່ງກໍຕ້ອງພັດທະນາໄປນຳ, ສິ່ງທີ່ສຳຄັນແມ່ນ, ວັດທະນະທຳເຜົ່າກິ່ງແມ່ນວັດທະນະທຳຂອງຊົນເຜົ່າທີ່ມີປະຊາກອນໜ້ອຍ, ຕ້ອງການສະໜັບສະໜູນ, ການປົກປັກຮັກສາແລະສືບທອດຈາກລັດ. ໃນນາມເປັນຜູ້ແທນສະພາປະຊາຊົນ, ກໍແມ່ນຜູ້ແທນຜູ້ໜຶ່ງຂອງເຜົ່າກິ່ງ, ໜ້າທີ່ສຳຄັນທີ່ສຸດຂອງເພີ່ນແມ່ນຮັກສາວັດທະນະທຳຊົນເຜົ່າຂອງຕົນໃຫ້ດີ,ເທຶ່ອນີ້ເພີ່ນໄດ້ນຳເອົາຍັດຕິສະບັບໜຶ່ງ,ຮຽກຮ້ອງໃຫ້ລັດຖະບານຟື້ນຟູແລະປົກປັກຮັກສາວັດທະນະທຳເຜົ່າກິ່ງ.ທ່ານກ່າວວ່າ:
"ໃນດ້ານການສືບທອດວັດທະນະທຳເຜົ່າກິ່ງ, ແມ່ນຢາກຮັກສາ'ນານຈື້'ແລະ'ຕູຈິງສຽນ'ເປັນຢ່າງດີ. ເພາະວ່າວັດທະນະທຳເຜົ່າກິ່ງຂອງພວກເຮົາແມ່ນມີປະຫວັດມາ500ກວ່າປີແລ້ວ, ປະຊາກອນຂອງພວກເຮົາໃນທົ່ວປະເທດມີໜ້ອຍ, ຖ້າ ວ່າວັດທະນະທຳຂອງພວກເຮົາບໍ່ໄດ້ຮັບການປົກປັກຮັກສາທີ່ດີ,ວັດທະນະທຳຂອງເຜົ່ານີ້ອາດຈະສູນເສຍໃນອະນາຄົດ. ສະນັ້ນຈິ່ງມີຂໍ້ສະເໜີຂໍ້ໜຶ່ງຕໍ່ລັດຖະບານ, ຢາກໃຫ້ເອົາວັດທະນະທຳປະຫວັດສາດຂອງພວກເຮົາເປັນມໍລະດົກວັດທະ ນະທຳທີ່ບໍ່ແມ່ນວັດຖຸເພື່ອປົກປັກຮັກສາໄວ້, ແລະຊ່ວຍປັບປຸງປື້ມ,ພິມຈຳໜ່າຍເພື່ອເຮັດວຽກການສືບທອດໃຫ້ດີ."
