ການຢ້ຽມຢາມໄຕ້ຫວັນເທື່ອທຳອິດຂອງທ່ານເສິນຢຸນລິນ ປະທານສະມາຄົມການພົວພັນສອງຝັ່ງຊ່ອງແຄບໄຕ້ຫວັນຂອງແຜ່ນດິນໃຫຍ່ຈີນ
-----------------------------------------------------------------------------------------------------------------
ເມື່ອກ່າວເຖິງທ່ານເສິນຢຸນລິນ ປະທານສະມາຄົມການພົວພັນສອງຝັ່ງຊ່ອງແຄບໄຕ້ຫວັນຂອງແຜ່ນດິນໃຫຍ່ຈີນແລ້ວ,ມີເວລາຄັ້ງປະຫວັດການອັນໜຶ່ງທີ່ໜ້າຈື່ຈຳ,ຄືເວລາ11ໂມງ48ນາທີ ຂອງວັນທີ3ພະຈິກປີ2008,ທ່ານໄດ້ນຳພາຄະນະຜູ່ແທນສະມາຄົມການພົວພັນສອງຝັ່ງຊ່ອງແຄບໄຕ້ຫວັນຂອງແຜ່ນດິນໃຫຍ່ຈີນຂີ່ຍົນເໝົາຂອງບໍລິສັດສາຍການບິນສາກົນຈີນໄປຮອດສະໜາມບິນທາວຢວນຂອງໄຕເປ.ນີ້ແມ່ນເຈົ້າໜ້າທີ່ລະດັບສູງສຸດຂອງຄະນະຈັດຕັ້ງທີ່ໄດ້ຮັບສິດມອບໝາຍຂອງແຜ່ນດິນໃຫຍ່ຈີນຢ້ຽມຢາມໄຕ້ຫວັນເທື່ອທຳອິດ,ແລະກໍ່ແມ່ນແຜ່ນດິນໃຫຍ່ຈີນສົ່ງຄະນະຜູ່ແທນຂະໜາດໃຫຍ່ຢ້ຽມຢາມໄຕ້ຫວັນເປັນເທື່ອທຳອິດເພື່ອດຳເນີນການປຶກສາຫາລືແລະສົນທະນາກັນ.ວົງການຕ່າງໆຂອງໄຕ້ຫວັນຈະເບິ່ງການຢ້ຽມຢາມເທື່ອນີ້ຂອງຄະນະຜູ່ແທນແຜ່ນດິນໃຫຍ່ແນວໃດ?ຈະຕີລາຄາແນວໃດຕໍ່ທ່ານເສິນຢຸນລິນທີ່ເປັນຫົວໜ້າຄະນະຜູ່ແທນ. ທ່ານເສິນຢຸນລິນທີ່ໄດ້ເຮັດວຽກງານກ່ຽວກັບໄຕ້ຫວັນມາເປັນເວລາ15ປີແລ້ວນັ້ນມີຄວາມຮັກແພງແນວໃດຕໍ່ໄຕ້ຫວັນ? ນັກຂ່າວCRIຈະໃຊ້ປະສົບການຂອງຕົນເລົ່າສູ່ຟັງກ່ຽວກັບການຢ້ຽມຢາມໄຕ້ຫວັນເທື່ອທຳອິດຂອງທ່ານເສິນຢຸນລິນ ປະທານສະມາຄົມການພົວພັນສອງຝັ່ງຊ່ອງແຄບໄຕ້ຫວັນຂອງແຜ່ນດິນໃຫຍ່ຈີນ.
"ປະທານເສິນ,ໄຊໂຍ,ປະທານເສິນ,ໄຊໂຍ"
ກ່ອນທ່ານເສິນຢຸນລິນຢ້ຽມຢາມໄຕ້ຫວັນປະມານເຄິ່ງເດືອນ, ທ່ານຈ່າງໝິງຊິງ ຮອງປະທານສະມາຄົມການພົວພັນສອງຝັ່ງຊ່ອງແຄບໄຕ້ຫວັນຂອງແຜ່ນດິນໃຫຍ່ຈີນທີ່ໄປໄຕ້ຫວັນດຳເນີນການແລກປ່ຽນດ້ານວິຊາການໃນນາມເປັນຫົວໜ້າສະຖາບັນການຂ່າວຂອງມະຫາວິທະຍາໄລເຊ້ຍເມິນຂອງຈີນໄດ້ຮັບບາດເຈັບຍ້ອນຖືກກຸ່ມຫົວຮຸນແຮງທຳຮ້າຍຢູ່ເມືອງໄຕນາມຂອງໄຕ້ຫວັນ.ສະນັ້ນ,ໃນການຢ້ຽມຢາມໄຕ້ຫວັນເທື່ອນີ້ຂອງທ່ານເສິນຢຸນລິນ,ໂດຍສະເພາະແມ່ນບັນຫາຄວາມປອດໄພໄດ້ຮັບຄວາມເປັນຫ່ວງຫຼາຍຈາກວົງການຕ່າງໆ.ໃນມື້ທີ່ຄະນະຜູ່ແທນໄປຮອດໄຕເປ,ເຖິງວ່າມີຄົນສະແດງການປະທ້ວງຕໍ່ການໄປຢ້ຽມຢາມຂອງທ່ານເສິນຢຸນລິນກໍ່ຕາມ,ແຕ່ປະຊາຊົນໄຕ້ຫວັນສ່ວນຫຼາຍໄດ້ສະແດງຄວາມຊົມເຊີຍຕໍ່ຝ່າຍແຜ່ນດິນໃຫຍ່ທີ່ສະແດງຄວາມປາຖະໜາທີ່ຕັ້ງໜ້າຊຸກຍູ້ການພັດທະນາຂອງສອງຝັ່ງ.
ປີ1994,ທ່ານເສິນຢຸນລິນເລີ່ມດຳລົງຕຳແໜ່ງຮອງຫົວໜ້າຫ້ອງການວຽກງານໄຕ້ຫວັນຂອງລັດຖະບານຈີນ,ຫຼັງຈາກນັ້ນ3ປີ,ທ່ານດຳລົງຕຳແໜ່ງຫົວໜ້າຫ້ອງການດັ່ງກ່າວ.ເດືອນມິຖຸນາປີ2008,ທ່ານເສິນຢຸນລິນທີ່ພົ້ນຈາກຕຳແໜ່ງຫົວໜ້າຫ້ອງການວຽກງານໄຕ້ຫວັນລັດຖະບານຈີນ,ແລ້ວໄດ້ຮັບເລືອກຕັ້ງເປັນປະທານສະມາຄົມການພົວພັນສອງຝັ່ງຊ່ອງແຄບໄຕ້ຫວັນ.ພ້ອມດຽວກັນນັ້ນ,ການປຶກສາຫາລືກັນລະຫວ່າງສະມາຄົມການພົວພັນສອງຝັ່ງຊ່ອງແຄບໄຕ້ຫວັນຂອງແຜ່ນດິນໃຫຍ່ຈີນກັບມູນນິທິແລກປ່ຽນສອງຝັ່ງຊ່ອງແຄບໄຕ້ຫວັນທີ່ໄດ້ຢຸດສະງັກມາເປັນເວລາ10ປີນັ້ນໄດ້ຮັບການຟື້ນຟູຄືນໃໝ່.ໃນນາມເປັນປະທານສະມາຄົມການພົວພັນສອງຝັ່ງຊ່ອງແຄບໄຕ້ຫວັນ,ທ່ານເສິນຢຸນລິນກັບທ່ານຈ່ຽງປິງຄຸນ ປະທານມູນິທິແລກປ່ຽນລະຫວ່າງສອງຝັ່ງຊ່ອງແຄບໄຕ້ຫວັນຄົນປັດຈຸບັນໄດ້ຮ່ວມກັນເປັນປະທານກອງປະຊຸມສອງອົງການດັ່ງກ່າວຢູ່ປັກກິ່ງ,ໄດ້ເຊັນສັນຍາຫຼາຍສະບັບເຊັ່ນປະຊາຊົນແຜ່ນດິນໃຫຍ່ໄປທ່ຽວໄຕ້ຫວັນແລະຖ້ຽວບິນເໝົາລຳໃນທ້າຍສັບປະດາເປັນຕົ້ນ,ແລະຕົກລົງວ່າການປຶກສາຫາລືລະຫວ່າງສອງອົງການນີ້ຄວນຈັດເປັນປະຈຳປີລະສອງເທື່ອ,ຜັດປ່ຽນກັນຈັດການເຈລະຈາຢູ່ແຜ່ນດິນໃຫຍ່ແລະໄຕ້ຫວັນ.ການຢ້ຽມຢາມໄຕເປເທື່ອນີ້ຂອງທ່ານເສິນຢຸນລິນເປັນການສືບຕໍ່ການປຶກສາຫາລືເປັນປະຈຳລະຫວ່າງສອງອົງການ,ແລະກໍ່ແມ່ນເທື່ອທຳອິດທີ່ຜູ່ນຳສອງອົງການດຳເນີນການພົບປະເຈລະຈາຢູ່ໄຕ້ຫວັນນັບແຕ່ສອງອົງການດັ່ງກ່າວສ້າງຕັ້ງຂຶ້ນມານີ້.ວັນທີ4ພະຈິກ2008,ທ່ານເສິນຢຸນລິນກັບທ່ານຈ່ຽງປິງຄຸນໄດ້ຈັດການເຈລະຈາຢູ່ໄຕເປແລະໄດ້ເຊັນຂໍ້ສະເໜີ4ຫົວຂໍ້ຄືການຂົນສົ່ງທາງອາກາດ, ທາງທະເລ,ໄປສະນີແລະຄວາມປອດໄພຂອງອາຫານລະຫວ່າງສອງຝັ່ງຊ່ອງແຄບໄຕ້ຫວັນ.ການໄປມາຫາສູ່ກັນໂດຍກົງດ້ານການໄປສະນີ,ການຄ້າ,ການເດີນເຮືອລະຫວ່າງສອງຝັ່ງທີ່ປະຊາຊົນສອງຝັ່ງຄອງຄອຍມາເປັນເວລາ30ປີນັ້ນໄດ້ບັນລຸຜົນເປັນຈິງໂດຍພື້ນຖານແລ້ວ.ຕາມການສຳຫຼວດຂອງສື່ມວນຊົນໄຕ້ຫວັນ,ໃນຜູ່ໃຫ້ຄຳຕອບການສຳຫຼວດມີ56%ຮູ້ສຶກດີໃຈຫຼາຍທີ່ໄດ້ເຫັນສອງຝັ່ງເຊັນສັນຍາເຫຼົ່ານີ້.ມີ50%ເຫັນວ່າສັນຍາເຫຼົ່ານີ້ມີຜົນດີຕໍ່ການພັດທະນາຂອງໄຕ້ຫວັນ.ທ່ານເສິນຢຸນລິນເວົ້າດ້ວຍຄວາມຮູ້ສຶກອັນເລິກເຊິ່ງວ່າ"ທ່ານມີຄວາມຝັນຫຼາຍອັນພັນແນວ,ແຕ່ວ່າການໄປໄຕ້ຫວັນຮ່ວມກັບຜູ່ນຳມູນິທິແລກປ່ຽນສອງຝັ່ງລົງນາມເຊັນສັນຍາ4ສະບັບນັ້ນໄດ້ເຮັດໃຫ້ຄວາມຝັນທີ່ດີງາມທີ່ສຸດຂອງທ່ານໄດ້ບັນລຸຜົນເປັນຈິງ.ທ່ານບອກວ່າ:
"ຄຽງຄູ່ກັບການເຈລະຈາລະຫວ່າງສະມາຄົມການພົວພັນສອງຝັ່ງຊ່ອງແຄບໄຕ້ຫວັນກັບມູນິທິແລກປ່ຽນສອງຝັ່ງຊ່ອງແຄບໄຕ້ຫວັນໄດ້ຮັບໝາກຜົນນັບມື້ນັບຫຼາຍຂຶ້ນ,ພີ່ນ້ອງຮ່ວມຊາດໄຕ້ຫວັນຫຼາຍກວ່າເກົ່າຈະໄດ້ສຳຜັດດ້ວຍຕົນເອງໃນການປະຕິບັດຕົວຈິງວ່າສັນຍາເຫຼົ່ານີ້ເວົ້າສຳລັບເຂົາເຈົ້າແລະພີ່ນ້ອງຮ່ວມຊາດທັງສອງຝັ່ງແລ້ວລ້ວນແຕ່ແມ່ນມີຜົນດີ,ຈະມີພີ່ນ້ອງຮ່ວມຊາດໄຕ້ຫວັນນັບມື້ນັບຫຼາຍສະໜັບສະໜູນແລະເຂົ້າໃຈພວກຂ້າພະເຈົ້າ.ນີ້ເຮັດໃຫ້ພວກຂ້າພະເຈົ້າເຊື່ອໝັ້ນວ່າເສັ້ນທາງແຫ່ງການພັດທະນາໂດຍສັນຕິລະຫວ່າງສອງຝັ່ງຈະນັບມື້ນັບກວ້າງອອກ,ນີ້ແມ່ນບາດກ້າວທີ່ບໍ່ວ່າການລົບກວນທຳລາຍໃດໆກໍ່ບໍ່ສາມາດກີດຂວາງໄດ້."
