ການຢ້ຽມຢາມໄຕ້ຫວັນເທື່ອທຳອິດຂອງທ່ານເສິນຢຸນລິນ ປະທານສະມາຄົມການພົວພັນສອງຝັ່ງຊ່ອງແຄບໄຕ້ຫວັນຂອງແຜ່ນດິນໃຫຍ່ຈີນ
-----------------------------------------------------------------------------------------------------------------
ໃນເວລາເຮັດວຽກງານໄຕ້ຫວັນ15ປີມານີ້,ທ່ານເສິນຢຸນລິນໄດ້ກາຍເປັນເພື່ອນທີ່ດີຂອງບຸກຄົນສຳຄັນຂອງວົງການການເມືອງຂອງໄຕ້ຫວັນຫຼາຍຄົນຍ້ອນມີນິໄສເປັນຄົນຈິງໃຈແລະມີຄວາມກະຕືລືລົ້ນ.
ໃນງານລ້ຽງຕ້ອນຮັບທີ່ທ່ານຊົ້ງສູຢູຈັດໃຫ້ນັ້ນ,ທ່ານເສິນຢຸນລິນໄດ້ເຮັດໃຫ້ປະຊາຊົນໄຕ້ຫວັນຕື້ນຕັນໃຈດ້ວຍເລື່ອງໜຶ່ງ.ທ່ານເສິນຢຸນລິນກ່າວວ່າ,ຫວ່າງມໍ່ໆນີ້,ທ່ານໄດ້ເອົາໃຈໃສ່ວ່າ,ຍ້ອນໄດ້ຮັບຜົນກະທົບຈາກພາຍຸຫຼາຍເທື່ອ,ໝາກກ້ຽງຂອງພາກໃຕ້ໄຕ້ຫວັນຖືກຄ້າງໃນສາງ,ຂາຍບໍ່ອອກ,ລາຄາຕົກແຮງ.ທ່ານກໍ່ຫາລືກັບກຸ່ມບໍລິສັດໃຫຍ່ທີ່ເຮັດທຸລະກິດຈຳໜ່າຍໝາກໄມ້ໄຕ້ຫວັນໂດຍສະເພາະຂອງແຜ່ນດິນໃຫຍ່,ຈະເກັບຊື້ໝາກກ້ຽງທີ່ຄ້າງໃນສາງເຫຼົ່ານີ້,ເພື່ອແກ້ໄຂຄວາມຫຍຸ້ງຍາກຂອງພີ່ນ້ອງພາກໃຕ້ໄຕ້ຫວັນ.ທ່ານເສິນຢຸນລິນເວົ້າດ້ວຍຄວາມເປັນຫ່ວງຢ່າງເລິກເຊິ່ງວ່າ:
"ໄຕ້ຫວັນເປັນບ່ອນທີ່ມັກມີພາຍຸຫຼາຍ,ແຜ່ນດິນໃຫຍ່ມີພີ່ນ້ອງຮ່ວມຊາດ1ຕື້300ລ້ານຄົນ,ເປັນຕະຫຼາດບໍລິໂພກອັນໃຫຍ່ຫຼວງ.ເວລາໃດພວກທ່ານມີຄວາມຫຍຸ້ງຍາກ,ຜະລິດຕະພັນກະສິກຳຂອງພວກທ່ານກໍ່ສາມາດຜ່ານດ່ານໂດຍບໍ່ເກັບພາສີ,ເພາະວ່າແມ່ນອ້າຍນ້ອງມີຄວາມຫຍຸ້ງຍາກ.ພວກຂ້າພະເຈົ້າກໍ່ຫວັງຢ່າງຈິງໃຈວ່າຜະລິດຕະພັນຂອງພວກທ່ານຈະຂາຍໄດ້ລາຄາດີ."
ຄືນວັນທີ16ພະຈິກປີກາຍນີ້,ກ່ອນທ່ານເສິນຢຸນລິນຈະອອກຈາກໄຕ້ຫວັນ,ສະມາຄົມການພົວພັນສອງຝັ່ງຊ່ອງແຄບໄຕ້ຫວັນໄດ້ຈັດງານລ້ຽງອາຫານຄ່ຳເພື່ອສະແດງຄວາມຂອບໃຈ.ທ່ານເສິນຢຸນລິນໄດ້ກ່າວຄຳປາໄສວ່າ,ໃນຫຼາຍມື້ທີ່ຢູ່ໄຕ້ຫວັນ,ທ່ານໄດ້ຮູ້ສຶກຢ່າງແຮ້ງກ້າວ່າ,ປະຊາຊົນໄຕ້ຫວັນເອົາໃຈໃສ່ນຳສະມາຄົມການພົວພັນລະຫວ່າງສອງຝັ່ງຊ່ອງແຄບໄຕ້ຫວັນກັບມູນິທິແລກປ່ຽນສອງຝັ່ງຊ່ອງແຄບໄຕ້ຫວັນ,ຫວັງຢາກໄດ້ເຫັນສອງຝັ່ງລົງເລິກການແລກປ່ຽນກັນ,ບັນລຸການໄດ້ຮັບຜົນປະໂຫຍດນຳກັນ,ຊຸກຍູ້ໃຫ້ການພົວພັນລະຫວ່າງສອງຝັ່ງພັດທະນາໂດຍສັນຕິ.ຄວາມເອົາໃຈໃສ່ແລະຄວາມຄອງຄອຍແບບນີ້ຍ່ອມຈະກາຍເປັນແຮງຊຸກດັນອັນແຂງແຮງໃນການຊຸກຍູ້ສອງຝັ່ງປຶກສາຫາລືຕໍ່ໄປ.
ວັນທີ26ເມສານີ້,ຜູ່ນຳຂອງສະມາຄົມການພົວພັນລະຫວ່າງສອງຝັ່ງຊ່ອງແຄບໄຕ້ຫວັນຂອງແຜ່ນດິນໃຫຍ່ກັບມູນນິທິແລກປ່ຽນສອງຝັ່ງຊ່ອງແຄບໄຕ້ຫວັນໄດ້ຈັດການເຈລະຈາເທື່ອທີສາມ,ປຶກສາຫາລືຫຼາຍຫົວຂໍ້ເຊັ່ນຖ້ຽວບິນໂດຍກົງປົກກະຕິລະຫວ່າງສອງຝັ່ງ,ການຮ່ວມມືດ້ານການເງິນລະຫວ່າງສອຝັ່ງ,ຮ່ວມກັນຕໍ່ຕ້ານອາຊະຍາກຳແລະການຊ່ວຍເຫຼືອເຊິ່ງກັນແລະກັນໃນດ້ານຕຸລາການ.ໃນ6ເດືອນທ້າຍປີນີ້,ທ່ານເສິນຢຸນລິນຍັງຈະໄປໄຕ້ຫວັນເທື່ອທີສອງເພື່ອເຈລະຈາກັບຜູ່ນຳມູນນິທິແລກປ່ຽນສອງຝັ່ງຊ່ອງແຄບໄຕ້ຫວັນເປັນເທື່ອທີສອງໃນປີນີ້.ຄຽງຄູ່ກັບການປຶກສາຫາລືເປັນປະຈຳລະຫວ່າງສອງອົງການດັ່ງກ່າວກ້າວສູ່ລວງເລິກ,ໝາກຜົນຂອງການເຈລະຈາຈະນັບມື້ນັບຫຼາຍຂຶ້ນ,ພີ່ນ້ອງຮ່ວມຊາດສອງຝັ່ງຈະໄດ້ຮັບຜົນປະໂຫຍດນັບມື້ນັບຫຼາຍໃນດ້ານຕ່າງໆເຊັ່ນການທ່ອງທ່ຽວ,ການແລກປ່ຽນດ້ານເສດຖະກິດການຄ້າແລະອື່ນໆ.
