ນັກທຸລະກິດໄຕ້ຫວັນມັກເຂົ້າສູ່ຕະຫຼາດແຂວງຮູເປເພື່ອຫາຊ່ອງທາງທຸລະກິດໃນວິກິດການ
-----------------------------------------------------------------------------------------------------------------
ຫວ່າງມໍ່ໆນີ້, "ສັບປະດາໄຕ້ຫວັນ ອູຮ້ານ·ຮູເປ"ຄັ້ງທີ 6 ໄດ້ຈັດຂຶ້ນຢູ່ເມືອງອູຮ້ານຂອງແຂວງຮູເປພາກກາງຂອງຈີນ. ບັນດາຊ່ຽວຊານ ນັກວິຊາການ ແລະ ຜູ້ມີຊື່ສຽງຂອງວົງການການຄ້າເກືອບພັນຄົນຂອງສອງຝັ່ງຊ່ອງແຄບໄຕຫວັນໄດ້ມາເຕົ້າໂຮມກັນຢູ່ແຫ່ງນີ້,ເພື່ອກັນຫາລືວິທີຮັບມືກັບວິກິດການການເງິນສາກົນ,ສະແຫວງຫາໂອກາດທຸລະກິດໃໝ່ເຂົ້າສູ່ຕະຫຼາດແຂວງຮູເປ.
ໃນຖານະທີ່ເປັນແຂວງສຳຄັນທີ່ຢູ່ພາກກາງຂອງຈີນ, ເງື່ອນໄຂດ້ານທີ່ຕັ້ງອັນພິເສດ ແລະ ທ່າແຮງເສດຖະກິດສັງລວມທີ່ນັບມື້ນັບພົ້ນເດັ່ນຂອງແຂວງຮູເປໄດ້ດຶງດູດນັກທຸລະກິດຈຳນວນຫຼວງຫຼາຍໄປລົງທຶນສ້າງໂຮງງານຢູ່ບ່ອນນັ້ນ, ໃນນັ້ນກໍ່ລວມທັງວິສາຫະກິດໄຕ້ຫວັນຫຼາຍແຫ່ງ.ຈົນຮອດທ້າຍປີ2008,ວິສາຫະກິດ ໄຕ້ຫວັນຂອງແຂວງຮູເປໄດ້ມີ2000ແຫ່ງແລ້ວ, ມູນຄ່າການລົງທຶນຫຼາຍກວ່າ 5 ຕື້ໂດລາ. ວິສາຫະກິດໄຕ້ຫວັນສ່ວນຫຼາຍທີ່ຢູ່ແຂວງຮູເປໄດ້ພັດທະນາຢ່າງວ່ອງໄວ, ກຸ່ມບໍລິສັດທົງອີ່ຂອງໄຕ້ຫວັນກໍ່ແມ່ນແຫ່ງໜຶ່ງ. ກຸ່ມບໍລິສັດແຫ່ງນີ້ແມ່ນວິສາຫະກິດທີ່ປຸງແຕ່ງ ຈຳໜ່າຍອາຫານ, ສິບກວ່າປີກ່ອນໄດ້ລົງທຶນ 50 ລ້ານໂດລາສ້າງຕັ້ງບໍລິສັດແຫ່ງໜຶ່ງຢູ່ເມືອງອູຮ້ານ. ປີກາຍນີ້, ກຸ່ມບໍລິສັດທົງອີ່ຂອງອູຮ້ານສາມາດຈຳໜ່າຍໄດ້ສູງເຖິງ 600 ລ້ານກວ່າຢວນ, ກາຍເປັນວິສາຫະກິດທີ່ໄດ້ຮັບກຳໄລຫຼາຍກວ່າໝູ່ໃນວິສາຫະກິດ 40 ກວ່າແຫ່ງຂອງໄຕ້ຫວັນທີ່ລົງທຶນຢູ່ແຜ່ນດິນໃຫຍ່ຈີນ. ທ່ານລີນຊ່າງເຊີ່ງ ຜູ້ອຳນວຍການໃຫຍ່ຂອງກຸ່ມບໍລິສັດທົງອີ່ເບິ່ງໃນແງ່ດີຕໍ່ກຳລັງແຮງບົ່ມຊ້ອນຂອງພາກກາງຂອງຈີນ ໂດຍສະເພາະແມ່ນແຂວງຮູເປ, ໃຕ້ສະພາບວິກິດການການເງິນສາກົນ, ທ່າແຮງຂອງແຂວງຮູເປ ໂດຍສະເພາະແມ່ນເມືອງອູຮ້ານກໍ່ຍິ່ງໄດ້ສະແດງອອກມາ.
"ວິກິດການການເງິນເຮັດໃຫ້ຫຼາຍຄົນພິຈາລະນາເຖິງການດຳລົງຊີວິດຂອງຕົນຄືນໃໝ່, ການພິຈາລະນານີ້ຍ່ອມຈະແມ່ນຮູບການດຳລົງຊີວິດຕົວຈິງ, ບໍ່ແມ່ນຫຼູຫຼາເກີນໄປ. ທິດທາງທີ່ຖືກກັບຕົວຈິງອັນນີ້ກໍ່ແມ່ນເງື່ອນໄຂດີທີ່ສຸດທີ່ເຮັດໃຫ້ອູຮ້ານເຕີບໂຕຢ່າງວ່ອງໄວຢູ່ພາກກາງຂອງຈີນ. ສະນັ້ນ, ຂ້ອຍເບິ່ງໃນແງ່ດີວ່າເມືອງອູຮ້ານຈະສາມາດເຕີບໂຕໄວ."
ຕ່າງກັນກັບກຸ່ມບໍລິສັດທົງອີ່ໄດ້ລົງທຶນຢູ່ແຂວງຮູເປເປັນເວລາດົນແລ້ວນັ້ນ, ຫຼັງຈາກວິກິດການການເງິນເກີດຂຶ້ນແລ້ວ, ນັກທຸລະກິດໄຕ້ຫວັນຈຳນວນໜຶ່ງປະກົດເຫັນວ່າແຂວງຮູເປແມ່ນ"ບ່ອນທີວິເສດຫຼາຍ".
ບຸກຄົນວົງການຕ່າງໆຂອງໄຕ້ຫວັນທີ່ມາເຂົ້າຮ່ວມ"ສັບປະດາໄຕ້ຫວັນ"ຄັ້ງນີ້,ມີຫຼາຍຄົນແມ່ນມາຮອດແຂວງຮູເປເປັນເທື່ອທຳອິດ. ທີ່ຕັ້ງຂອງເຂດແຄວ້ນທີ່ດີງາມ, ຕົ້ນທຶນດ້ານແຮງງານທີ່ອ່າວຖືກ, ຄົມມະນາຄົມທີ່ສະດວກ, ຊັບພະຍາກອນອັນສົມບູນ ແລະ ຕະຫຼາດທີ່ມີຊ່ອງທາງອັນກວ້າງຂວາງຂອງແຂວງຮູເປໄດ້ສ້າງຄວາມປະທັບໃຈອັນເລິກເຊິ່ງໃຫ້ເຂົາເຈົ້າ.
ທ່ານລ້າຍເຈີ້ງອີ້ ປະທານຄະນະອຳນວຍການຂອງກຸ່ມບໍລິສັດຊັບສິນຕາດິນຊ່ຽງລີນ ທີ່ມີຊື່ສຽງຢູ່ໄຕ້ຫວັນເຫັນວ່າ, ປັດຈຸບັນ, ແຜ່ນດິນໃຫຍ່ຈີນໄດ້ນັບມື້ນັບເພິ່ມທະວີການໃຊ້ງົບປະມານ ແລະ ການສະໜັບສະໜູນຕໍ່ພາກກາງ ແລະ ພາກຕາເວັນຕົກຂອງຈີນ, ພ້ອມກັນນັ້ນ, ພາກກາງຂອງຈີນກໍ່ມີກຳລັງແຮງບົ່ມຊ້ອນຂອງການລົງທຶນພັດທະນາ ແລະ ກຸ່ມຄົນບໍລິໂພກອັນໃຫຍ່ຫຼວງ. ປັດໄຈເຫຼົ່ານີ້ ເຮັດໃຫ້ຄວາມໝັ້ນໃຈທີ່ລົງທຶນຢູ່ແຂວງຮູເປຂອງທ່ານບໍ່ມີການປ່ຽນແປງ.ທ່ານກ່າວວ່າ,
"ຂ້ອຍຮູ້ສຶກວ່າບ່ອນນີ້ແມ່ນຕົວເມືອງອະນາຄົດທີ່ມີກຳລັງແຮງບົ່ມຊ້ອນຫຼາຍ!"
ຜູ້ຮັບຜິດຊອບຂອງວິສາຫະກິດໄຕ້ຫວັນທີ່ລົງທຶນຢູ່ແຂວງຮູເປມາດົນແລ້ວຈຳນວນຫຼາຍກໍ່ກ່າວວ່າ, ເຖິງວ່າວິກິດການການເງິນເຮັດໃຫ້ຕະຫຼາດສົ່ງອອກຊຸດໂຊມລົງ,ແຕ່ນະໂຍບາຍອັນຕັ້ງໜ້າຕ່າງໆຂອງແຜ່ນດິນໃຫຍ່ຈີນໄດ້ກະຕຸ້ນຕະຫຼາດພາຍໃນປະເທດຂອງຈີນຂະຫຍາຍຕົວຢ່າງບໍ່ຢຸດຢັ້ງ, ໂຮງງານບໍ່ພຽງແຕ່ບໍ່ຕ້ອງການຢຸດຕິການຜະລິດເທົ່ານັ້ນ,ແຕ່ການອີງໃສ່ຕະຫຼາດພາຍໃນປະເທດໄດ້ສ້າງໂອກາດທີ່ເຕີບໂຕຢ່າງຕໍ່ເນື່ອງ ແລະ ພັດທະນາຄວາມສາມາດການຜະລິດ.
