ນັກທຸລະກິດໄຕ້ຫວັນມັກເຂົ້າສູ່ຕະຫຼາດແຂວງຮູເປເພື່ອຫາຊ່ອງທາງທຸລະກິດໃນວິກິດການ
-----------------------------------------------------------------------------------------------------------------
ທ່ານຊ່ຽນຈ້ຽນ ຜູ້ອຳນວຍການໃຫຍ່ຂອງກຸ່ມບໍລິສັດວິທະຍາສາດເຕັກໂນໂລຢີກວ້ານເຈ໋ໄຕ້ຫວັນບອກນັກຂ່າວວ່າ, ໂດຍອີງໃສ່ມາດຕະການ"ສົ່ງເຄື່ອງໃຊ້ໄຟຟ້າໃນເຮືອນໄປສູ່ຊົນນະບົດ"ທີ່ແຜ່ນດິນໃຫຍ່ຈີນປະຕິບັດໃນຫວ່າງມໍ່ໆນີ້, ມູນຄ່າຈຳໜ່າຍຢູ່ແຜ່ນດິນໃຫຍ່ຈີນໃນປີນີ້ຂອງບໍລິສັດວິທະຍາສາດເຕັກໂນໂລຢີກວ້ານເຈ໋ໄດ້ເພິ່ມຂຶ້ນ 40%. ເພື່ອເປີດກວ້າງຕະຫຼາດ, ປີນີ້ ບໍລິສັດຍັງຈະນຳເຂົ້າຜະລິດຕະພັນໃໝ່ ແລະ ຜະລິດຢູ່ສາຂາແຂວງຮູເປ.ທ່ານກ່າວວ່າ,
"ຢູ່ເມືອງອູຮ້ານ,ພວກເຮົາເພິ່ມຄວາມສາມາດຜະລິດໜ້າຈໍມໍນີເຕີຢ່າງບໍ່ຢຸດຢັ້ງ, ໃນອະນາຄົດ, ເມືອງອູຮ້ານຈະກາຍເປັນຈຸດທີ່ຕັ້ງຂະຫຍາຍຕະຫຼາດແຜ່ນດິນໃຫຍ່ຈີນທີ່ໃຫຍ່ກວ່າໝູ່ ແລະ ສຳຄັນກວ່າໝູ່ຂອງພວກເຮົາ. ຂ້ອຍຄິດວ່າ ຖ້າພວກເຮົາມີໂອກາດອັນເໝາະສົມໃນອະນາຄົດ, ພວກເຮົາຍັງຈະນຳເຂົ້າຜະລິດຕະພັນໃໝ່ຈຳນວນໜຶ່ງ ແລະ ຜະລິດຢູ່ເມືອງອູຮ້ານ."
"ສັບປະດາໄຕ້ຫວັນ"ເທື່ອນີ້ໄດ້ຮັບໝາກຜົນດີຫຼາຍ, ໄດ້ເຊັນສັນຍາໂຄງການ ເກືອບ60 ສະບັບ, ມູນຄ່າການລົງທຶນມີເກືອບ 10 ຕື້ຢວນ, ກ່ຽວພັນກັບຫຼາຍຂົງເຂດ, ເຊັ່ນ, ອາຫານ,ກະສິກຳ, ເອເລັກໂຕຼນິກ, ການຜະລິດແຜ່ນແພ ແລະ ເຄື່ອງອາໄຫຼ່ລົດຍົນເປັນຕົ້ນ. ນີ້ເຮັດໃຫ້ແຂວງຮູເປຢ່ວງບາດກ້າວອີກບາດໜຶ່ງ ເພື່ອບັນລຸເປົ້າໝາຍທີ່ກາຍເປັນເຂດນັກທຸລະກິດໄຕ້ຫວັນເຕົ້າໂຮມກັນໃຫຍ່ກວ່າໝູ່ຂອງພາກກາງຈີນ.
ປັດຈຸບັນ, ວິສາຫະກິດໄຕ້ຫວັນຫຼາຍແຫ່ງທີ່ລົງທຶນຢູ່ແຂວງຮູເປພວມກ້າວເຂົ້າສູ່ໄລຍະ"ໄດ້ຮັບຜົນ", ວິສາຫະກິດຈຳນວນບໍ່ໜ້ອຍໄດ້ກາຍເປັນວິສາຫະກິດຫຼັກທີ່ມີບົດບາດຊື່ສຽງໃນຂະແໜງການ. ໂດຍສະເພາະແມ່ນຄຽງຄູ່ກັບວິສາຫະກິດຂະໜາດໃຫຍ່ເຊັ່ນ, SMIC ແລະ Foxconnແລະອື່ນໆ ໄດ້ທະຍອຍກັນສ້າງໂຮງງານ, ເຂດໂຮງຈັກໂຮງງານໄຕ້ຫວັນເຕົ້າໂຮມກັນຂອງແຂວງຮູເປພວມຈໍ່ຕົວຂຶ້ນຢ່າງວ່ອງໄວ. ທ່ານຕີ່ງຄູ່ນຮວາ ປະທານສະມາຄົມວິສາຫະກິດທີ່ພີ່ນ້ອງຮ່ວມຊາດໄຕ້ຫວັນລົງທຶນບອກໃຫ້ຮູ້ວ່າ, ສະມາຄົມກໍ່ຢາກສ້າງເຂດເຕົ້າໂຮມທີ່ຍິ່ງສາມາດສະແດງທ່າແຮງຂອງກຸ່ມຢູ່ພາກກາງຂອງຈີນ ໃຫ້ແກ່ວິສາຫະກິດໄຕ້ຫວັນທັງຫຼາຍ.ທ່ານກ່າວວ່າ,
"ໃນເມື່ອກ່ອນ, ວິສາຫະກິດໄຕ້ຫວັນສ່ວນຫຼາຍກໍ່ແມ່ນວິສາຫະກິດແບບສົ່ງອອກ, ປັດຈຸບັນ, ພວກເຮົາກໍ່ຕັ້ງໜ້າສະແຫວງຫາຕະຫຼາດໃໝ່. ຊ່ອງທາງແລະທ່າແຮງດ້ານທີ່ຕັ້ງ ພ້ອມທັງຄວາມສາມາດບໍລິໂພກຂອງແຂວງຮູເປທີ່ມີໃນປັດຈຸບັນນີ້ຈະແມ່ນທິດທາງທີ່ພວກເຮົາປ່ຽນແປງຕະຫຼາດໃນອະນາຄົດ. ປັດຈຸບັນ ນັກທຸລະກິດໄຕ້ຫວັນໄດ້ມາລົງທຶນ, ພວກເຮົາຢາກໃຫ້ສ້າງເຂດລົງທຶນໄຕ້ຫວັນໂຮມສູນກັນຢູ່ທີ່ມີຄວາມຍາວ 2 ກິໂລແມັດຢູ່ແຂວງຮູເປ, ໃຫ້ວິສາຫະກິດໄຕ້ຫວັນສ່ວນຫຼາຍ ເຊັ່ນ,ວິສາຫະກິດການເງິນ,ການຈໍລະຈອນສິນຄ້າ,ການຜະລິດ ແລະ ການຈຳໜ່າຍກໍ່ຕັ້ງຢູ່ເຂດດັ່ງກ່າວ.
ຜູ້ຊ່ຽວຊານເຫັນວ່າ, ອຸດສາຫະກຳສ່ວນຫຼາຍໃນ 10 ອຸດສາຫະກຳທີ່ແຜ່ນດິນໃຫຍ່ຈີນເນັ້ນຊຸກຍູ້ສົ່ງເສີມເພື່ອກະຕຸ້ນເສດຖະກິດ ເຊັ່ນ,ລົດຍົນ ແລະ ການຜະລິດແຜ່ນແພເປັນຕົ້ນ ລ້ວນແຕ່ແມ່ນອຸດສາຫະກຳທີ່ມີທ່າແຮງຂອງແຂວງຮູເປ.ຖ້າວ່ານັກທຸລະກິດໄຕ້ຫວັນກຳເອົາໂອກາດ,ລົງທຶນຫຼາຍກວ່ານີ້, ກໍ່ຍ່ອມຈະໄດ້ຮັບຜົນຫຼາຍກວ່າ.
