ອາຫານແຊບທີ່ມີເອກະລັກສະເພາະຕົວຂອງແມ່ນ້ຳນູ້ຈ່ຽງ
-----------------------------------------------------------------------------------------------------------------
ຮ່ອມພູແມ່ນ້ຳນູ້ຈ່ຽງທີ່ຢູ່ແຂວງຢຸນນານ ພາກຕາເວັນຕົກສຽງໃຕ້ຂອງຈີນບໍ່ພຽງແຕ່ມີຊື່ສຽງດົ່ງດັງໃນໂລກຍ້ອນມີທິວທັດທຳມະຊາດສະຫງ່າງາມເທົ່ານັ້ນ,ວັດທະນະທຳຊົນເຜົ່າທີ່ມີຫຼາຍຮູບຫຼາຍສີຢູ່ແຫ່ງນີ້ກໍ່ເປັນສາເຫດສຳຄັນອັນໜຶ່ງທີ່ດຶງດູດນັກທ່ອງທ່ຽວຢ່າງຫຼວງຫຼາຍ.ໃນນັ້ນ,ວັດທະນະທຳອາຫານທີ່ມີເອກະລັກພິເສດກໍ່ແມ່ນສ່ວນປະກອບອັນໜຶ່ງທີ່ຂາດບໍ່ໄດ້ໃນຮີດຄອງປະເພນີພື້ນເມືອງແຫ່ງນີ້.
ໃນເວລາທີ່ຊາວເຜົ່າລີຊໍູຮ້ອງເພງກິນເຫຼົ້າ, ກໍ່ໝາຍເຖິງງານລ້ຽງອາຫານທີ່ແຊບຊ້ອຍເລີ່ມຕົ້ນແລ້ວ.ກິ່ນຫອມຂອງອາຫານລອຍມາຕາມອາກາດໄດ້ຍົ້ວຍວນນ້ຳລາຍຂອງນັກທ່ອງທ່ຽວ.ການລ້ຽງແຂກຄົນທີ່ມາຈາກແດນໄກດ້ວຍເຂົ້າໃຊ້ມືນັ້ນແມ່ນພິທີທີ່ມີຄວາມເຄົາລົບນັບຖືສູງສຸດໃນການຕ້ອນຮັບແຂກຂອງປະຊາຊົນເຜົ່າລີຊໍ.ທ່ານຈ້າວເວິນເຊິ້ງ ພະນັກງານພະແນກທ່ອງທ່ຽວກິ່ງແຂວງນູ້ຈ່ຽງບອກວ່າ:
"ເປັນຫຍັງຈິ່ງຕ້ອງກິນເຂົ້າໃຊ້ມື?ເພາະວ່າປີນີ້ໄດ້ຮັບຜົນເກັບກ່ຽວອັນອຸດົມສົມບູນ,ເພື່ອສະເຫຼີມສະຫຼອງການເກັບກ່ຽວໄດ້ຫຼາຍ,ປະຊາຊົນກໍ່ເອົາອາຫານໃສ່ກະດົ້ງ,ແລ້ວພາກັນເອົາມືຈັບກິນເລີຍ,ນີ້ເປັນງານລ້ຽງສະຫຼອງຜົນເກັບກ່ຽວແບບບູຮານທີ່ສຸດ."
ການເກັບກ່ຽວອັນອຸດົມສົມບູນພາໃຫ້ຄົນທັງຫຼາຍເບີກບານມ່ວນຊື່ນ,ສະນັ້ນ,ໃນເວລາທີ່ມີແຂກມາຢາມ,ຄົນເຜົ່າລີຊໍກໍ່ຢາກແບ່ງປັນຄວາມມ່ວນຊື່ນຂອງຕົນກັບແຂກຄົນ.ການກິນເຂົ້າແບບໃຊ້ມືຈັບຂອງເຜົ່າລີຊໍພິຖີພິຖັນທີ່ສຸດ,ເພາະວ່າຕາມທຳມະດາແລ້ວເຂົາເຈົ້າຖືເຂົ້າເປັນອາຫານຫຼັກ,ແລ້ວອ້ອມຂ້າງອາຫານຫຼັກກໍ່ຈະມີປິ່ນໝູ,ປີ້ງໄກ່,ປີ້ງເປັດ,ໝູແຮັມ,ຊີ້ນແຫ້ງ,ໄຂ່ໄກ່ກັບມັນຝະຣັ່ງ,ຜັກ,ຫົວກາລົດແລະອື່ນໆ,ອາຫານເຫຼົ່ານີ້ມີຫຼາຍສີຫຼາຍສັນ,ເຕັມໄປດ້ວຍກິ່ນຫອມ.ໃນເວລາກິນເຂົ້າ,ໃຊ້ມືຂວາຈັບເອົາຜັກ,ຊີ້ນແລະເຂົ້າເອົາມາໃສ່ມືຊ້າຍປົນກັນດີແລ້ວຈິ່ງເອົາໃສ່ປາກ.ກິນເຂົ້າໃຊ້ມືຍັງມີວິທີພິເສດວິທີໜຶ່ງ.ນາງຢິນຈູຮຸ້ຍ ປະຊາຊົນທ້ອງຖິ່ນບອກວ່າ:"ຕ້ອງໃຊ້ແຜ່ນໝູແຮັມທີ່ມັນໆມາທາຝາມືເບື້ອງຊ້າຍໃຫ້ມີນ້ຳມັນໜ້ອຍໜຶ່ງແລ້ວເວລາປັ້ນເຂົ້າຈິ່ງບໍ່ຕິດມື,ທັງສະອາດດີ."
ໄປທ່ຽວນູ້ຈ່ຽງ,ກໍ່ຕ້ອງກິນເຂົ້າໃຊ້ມືທີ່ແຊບຊ້ອຍ.
ໃນປະເພນີການກິນດື່ມຂອງເຜົ່າລີຊໍ,ປະເພນີທີ່ມ່ວນທີ່ສຸດກໍ່ແມ່ນການດື່ມເຫຼົ້າ.ຄົນເຜົ່ານີ້ມີຄຳເວົ້າທີ່ວ່າ"ເຫຼົ້າກັບການຟ້ອນລຳທຳເພງແມ່ນສິ່ງຄູ່ກັນຂອງເຜົ່າລີຊໍ". ເວົ້າສຳລັບເຜົ່າລີຊໍທີ່ມັກຟ້ອນລຳທຳເພງແລ້ວ,ການດື່ມເຫຼົ້າແມ່ນສ່ວນໜຶ່ງຂອງຊີວິດການເປັນຢູ່,ແລະກໍ່ເປັນວິທີພິເສດທີ່ສ້າງຄວາມມ່ວນຊື່ນໃຫ້ແກ່ຊີວິດແລະສະແດງເຖິງຄວາມມີນ້ຳໃຈ.ນາງມີ້ຊິ້ວເຈິນ ທີ່ດຳລົງຊີວິດຢູ່ເມືອງຫຼູສຸ້ຍ ກິ່ງແຂວງນູ້ຈ່ຽງບອກວ່າ:"ວິທີດື່ມເຫຼົ້າຂອງພວກເຮົາມີ5ຢ່າງຄືຕຳຈອກ,ດື່ມແບບໄຂວ່ແຂນກັນ,ດື່ມແບບກອດຄໍກັນ,ດື່ມເຫຼົ້າໃຈດຽວກັນ,ແລະເຫຼົ້າສາມແມ່ນ້ຳໄຫຼຮ່ວມເຂົ້າກັນ"
