ຊີ່ຊີ່---ດິນທາມສວຍງາມ
-----------------------------------------------------------------------------------------------------------------
ຊ່ຽງໄຮ້, ທີ່ເປັນ ບ່ອນຈັດງານວາງສະແດງໂລກ2010, ແມ່ນຕົວເມືອງໃຫຍ່ທີ່ມີຊີວິດຊີວາ. ຢູ່ເມືອງຫາງໂຈ່ວແຂວງເຈີ້ຈ່ຽງທີ່ໄກຈາກຊ່ຽງໄຮ້200ກວ່າກິໂລແມັດ, ມີດິນທາມແຫ່ງໜຶ່ງຊື່ວ່າຊີ່ຊີ່. ໃນຄໍລຳມື້ນີ້, ພວກເຮົາຈະພາທ່ານໄປທ່ຽວດິນທາມແຫ່ງນີ້.
ໃນຖານະເປັນໜຶ່ງໃນນະຄອນຫຼວງບູຮານ7ແຫ່ງຂອງຈີນ, ເມືອງຫາງໂຈ່ວແຂວງເຈີ້ຈ່ຽງມີຊື່ສຽງຍ້ອນທິວທັດທີ່ສວຍງາມໃນປະຫວັດສາດ. ຢູ່ໄກຈາກໜອງຊີ່ຫູບໍ່ຮອດ5ກິໂລແມັດ, ມີດິນທາມອະນຸຊີວະພາບຕົວເມືອງແຫ່ງໜຶ່ງຊື່ວ່າດິນທາມຊີ່ຊີ່. ຈາກຊ່ຽງໄຮ້ໄປຫາຫາງໂຈ່ວ, ຂັບລົດໃຊ້ເວລາພຽງແຕ່2ຊົ່ວໂມງເທົ່ານັ້ນ, ເມື່ອໄປຮອດຫາງໂຈ່ວແລ້ວ, ກໍ່ມີລົດນຳທ່ຽວໄປຊີ່ຊີ່.
ສວນສາທາລະນະດິນທາມແຫ່ງຊາດ—ຊີ່ຊີ່ຕັ້ງຢູ່ພາກຕາເວັນຕົກຂອງເມືອງຫາງໂຈ່ວ, ໄກຈາກໜອງຊີ່ຫູບໍ່ຮອດ5ກິໂລແມັດ, ມີເນື້ອທີ່ປະມານ10 ກວ່າກິໂລຕາແມັດ. ບ່ອນນີ້ມີຊັບພະຍາກອນຊີວະພາບອຸດົມສົມບູນ, ທິວທັດທຳມະຊາດສວຍງາມແລະວັດທະນະທຳຍາວນານ, ແມ່ນສວນສາທາລະນະດິນທາມແຫ່ງຊາດພຽງແຫ່ງດຽວທີ່ມີທັງດິນທາມຕົວເມືອງ, ດິນທາມປູກຝັງແລະດິນທາມວັດທະນະທຳປະສົມປະສານເຂົ້າເປັນອັນໜຶ່ງອັນດຽວກັນ.
ຊີຊີໃນຍາມລະດູໜາວ
ຢູ່ໃນສວນສາທາລະນະດິນທາມຊີ່ຊີ່, ມີນ້ຳ6ສາຍໄຫຼຈອດກັນ.ໃນນັ້ນແບ່ງເປັນຫຼາຍຄອງນ້ອຍແລະໜອງ, ກາຍເປັນທິວທັດດິນທາມທີ່ມີສີສັນພິເສດ. ນ້ຳສາຍຕ່າງໆເຫຼົ່ານີ້ຍາວ100ກວ່າກິໂລແມັດ, ເນື້ອທີ່ປະມານ70%ແມ່ນຄອງນ້ອຍ, ອ່າງນ້ຳແລະດິນເບືອມ. ທິວທັດແບບນີ້ແມ່ນຫາເບິ່ງຍາກຫຼາຍສຳລັບຄົນທີ່ດຳລົງຊີວິດຢູ່ໃນຕົວເມືອງຕະຫຼອດປີ.
ນັກທ່ອງທ່ຽວຊ່ຽງໄຮ້ນັ່ງຢູ່ເທິງເຮືອໄມ້ທີ່ແລ່ນດ້ວຍໄຟຟ້າທີ່ມີສີສັນເກົ່າແກ່ຖ່າຍ ຮູບຕະຫຼອດ. ເຂົາເຈົ້າເວົ້າວ່າ, ເຂົາເຈົ້າແມ່ນຄົນມັກຖ່າຍຮູບ, ໄດ້ຮູ້ກ່ຽວກັບ ໜອງຊີ່ຫູເປັນຢ່າງດີແລ້ວ, ແຕ່ມາດິນທາມຊີ່ຊີ່ແມ່ນເທື່ອທຳອິດ, ແນ່ນອນຕ້ອງຖ່າຍຮູບທິວທັດທີ່ສວຍງາມເພື່ອແບ່ງປັນຄວາມສຸກໃຫ້ໝູ. ນາງເສີນທີ່ເປັນນັກທ່ອງທ່ຽວ ເວົ້າວ່າ: "ນ້ຳໄຫຼແລະທິວທັດໃນຝົນຂອງຊີ່ຊີ່ງາມຫຼາຍ."