ປີ2005,ທ່ານຢຽນຢົງທີ່ຫຼົງໄຫຼນຳກິ່ນຫອມຂອງກາເຟຫວຽດນາມຕົກລົງນຳເຂົ້າກາເຟຫວຽດນາມມາຂາຍຢູ່ນານນິງ.ຕາມທ່ານຢຽນຢົງເວົ້າວ່າ,ກໍ່ແມ່ນຍ້ອນເຂດກວາງຊີຈັດງານວາງສະແດງສິນຄ້າຈີນ-ອາຊຽນ,ຈິ່ງສ້າງໂອກາດໃຫ້ບໍລິສັດຂອງທ່ານໄດ້ສ້າງສາຍພົວພັນກັບກາເຟຫວຽດນາມ.ທ່ານບອກວ່າ"ປີ2005,ບໍລິສັດກາເຟຈົ່ງຢວນໄດ້ເຂົ້າຮ່ວມງານວາງສະແດງສິນຄ້າຈີນ-ອາຊຽນ.ຕົ້ນປີ2006,ບໍລິສັດພວກເຮົາກໍ່ໄດ້ຕິດຕໍ່ກັບບໍລິສັດນີ້ແລະເຊັນສັນຍາກັນ,ບໍລິສັດພວກເຮົາກໍ່ກາຍເປັນຮ້ານຕົວແທນຈຳໜ່າຍທີ່ໄດ້ຮັບອະນຸຍາດພິເສດຈາກບໍລິສັດເຂົາເຈົ້າຢູ່ຈີນ.ໃນເວລາເປີດຮ້ານກາເຟຈົ່ງຢວນແຫ່ງທຳອິດແມ່ນຄຶກຄື້ນຫຼາຍ, ກົງສູນຫວຽດນາມ,ເຈົ້າໜ້າທີ່ຫ້ອງການເປີດປະຕູສູ່ພາຍນອກຂອງອົງການປົກຄອງເມືອງນານນິງກໍ່ໄປຮ່ວມພິທີເປີດຮ້ານ,ມີລູກຄ້າມາອຸດໜູນເຕັມຮ້ານເປັນຫຼາຍເດືອນລຽນຕິດ,ມື້ໜຶ່ງກໍ່ມີຫຼາຍຮ້ອຍຄົນມາອຸດໜູນ."
ເມື່ອຫວນຄືນສະພາບໃນຕອນຫາກໍ່ເປີດຮ້ານໃໝ່ໆ,ທ່ານຢຽນຢົງຍັງອົດຄວາມຕື່ນເຕັ້ນບໍ່ໄດ້.ໃນຄວາມຊົງຈຳຂອງທ່ານ,ກໍ່ແມ່ນເລີ່ມຕັ້ງແຕ່ເປີດຮ້ານກາເຟຈົ່ງຢວນແຫ່ງທຳອິດນີ້ລະ,ກິ່ນຫອມຂອງກາເຟຫວຽດນາມແທ້ໆຈິ່ງຄ່ອຍໆເປັນທີ່ຍອມຮັບຂອງຄົນນານນິງ.ປັດຈຸບັນ,ໃນຮ້ານຂອງທ່ານ,ສະເພາະແຕ່ການຈຳໜ່າຍກາເຟຫວຽດນາມກໍ່ຫຼາຍກວ່າ100ກິໂລຕໍ່ເດືອນ.
ພັນລະຍາຂອງທ່ານຢຽນຢົງເປັນຄົນຫວຽດນາມຊື່ວ່າລາມບິກຮັງ.ນາງບອກນັກຂ່າວວ່າ,ວິທີເຮັດກາເຟຢອດອັນພິເສດຂອງຫວຽດນາມແມ່ນໄດ້ຮັບຄວາມນິຍົມທີ່ສຸດໃນຮ້ານນີ້."ເອົານ້ຳຕົ້ມຖອກໃສ່ເຄື່ອງຕອງທີ່ເຮັດພິເສດທີ່ມີຝຸ່ນກາເຟຢູ່ໃນຫັ້ນ,ເອົາມືບີບຝາເຄື່ອງຕອງ,ກາເຟກໍ່ຍ້ອຍດລົງຈອກເປັນຢອດໆ,ໃຊ້ເວລາພຽງ5ນາທີ,ກາເຟຈອກໜຶ່ງກໍ່ເຮັດສຳເລັດແລ້ວ.ກາເຟທີ່ເຮັດດ້ວຍວິທີນີ້ແນ່ນອນແລ້ວມີກິ່ນຫອມພິເສດ,ແລະວິທີຊົງກາເຟແບບຊ້າໆກໍ່ຍິ່ງຖືກກັບວັດທະນະທຳກາເຟທີ່ແທ້ຈິງຄືສະບາຍກາຍສະບາຍໃຈບໍ່ຟ້າວບໍ່ຟັ່ງ."
ທ່ານເສິນເສິ່ງແມ່ນຜູ່ອຳນວຍການຂອງວິສາຫະກິດ ຕ່າງປະເທດແຫ່ງໜຶ່ງຂອງນານນິງ.ເພິ່ນເປັນຂາປະຈຳຂອງຮ້ານກາເຟຈົ່ງຢວນແລະແຟນປະຈຳຂອງກາເຟຫວຽດນາມ,ທ່ານໄດ້ໄປນັ່ງກິນກາເຟຢູ່ຮ້ານກາເຟຈົ່ງຢວນເກືອບທຸກມື້,ກິນກາເຟຈອກໜຶ່ງແລະກິນອາຫານເບົາຂອງຫວຽດນາມເຍື່ອງໜຶ່ງ.ທ່ານບອກວ່າ,"ສາມາດເວົ້າໄດ້ວ່າ,ກາເຟຈົ່ງຢວນມີຊື່ສຽງຫຼາຍຢູ່ເມືອງນານນິງ,ໝູ່ນານນິງຫຼາຍຄົນຄັນຢາກຊອກຮູ້ວັດທະນະທຳກາເຟຂອງຫວຽດນາມກໍ່ລ້ວນແຕ່ຈະໄປຮ້ານກາເຟຈົ່ງຢວນ.ໝູ່ຫວຽດນາມບອກຂ້ອຍວ່າ,ກິນກາເຟຈົ່ງຢວນກໍ່ຄ້າຍໆກັບຮອຍຈູບເທື່ອທຳອິດຂອງສາວນ້ອຍ,ມີລົດຂົມໜ້ອຍໜຶ່ງ,ແຕ່ປະທັບໃຈທີ່ສຸດ,ເຮັດໃຫ້ໃຈເຕັ້ນແຮງ.ເວລາກິນກາເຟຈົ່ງຢວນເທື່ອໃດຂ້ອຍກໍ່ຄິດພໍ້ຄວາມເວົ້ານີ້,ກິນແລ້ວຮູ້ສຶກວ່າເປັນແນວນັ້ນແທ້."
ທ່ານເສິນເສິ່ງບອກວ່າ,ແຕ່ກ່ອນ,ທຸກປີທ່ານກໍ່ຂໍໃຫ້ໝູ່ທີ່ຢູ່ຊາຍແດນຝາກກາເຟໄປໃຫ້ຢູ່ນານນິງ,ເຖິງຈະຈ່າຍຄ່າສົ່ງທາງໄປສະນີແພງແດ່,ແຕ່ກໍ່ຍັງຖືກກວ່າຊື້ຢູ່ຕະຫຼາດນານນິງ.ແຕ່ວ່າດຽວນີ້ບໍ່ຈຳເປັນຫຍຸ້ງຍາກໃຫ້ໝູ່ຝາກທາງໄປສະນີອີກແລ້ວ.ອີກບໍ່ດົນເຂດການຄ້າເສລີຈີນ-ອາຊຽນກໍ່ຈະສ້າງສຳເລັດແລ້ວ.ຮອດເວລານັ້ນ,ຊື້ກາເຟຫວຽດນາມຢູ່ນານນິງ,ລາຄາກໍ່ຈະຖືກເຊັ່ນດຽວກັນ.
ເມື່ອເຂດການຄ້າເສລີຈີນ-ອາຊຽນສ້າງສຳເລັດໃນວັນທີ1ມັງກອນ2010ແລ້ວ,ພາສີຂອງຜະລິດຕະພັນກະສິກຳຄືກາເຟກໍ່ຈະຫຼຸດລົງຮອດສູນໃນທີ່ສຸດ.ຕົ້ນທຶນການນຳເຂົ້າກາເຟຈາກປະເທດອາຊຽນມານານນິງຈະຫຼຸດລົງ20%ໂດຍທົ່ວໄປ.ຮອດເວລານັ້ນ,ກາເຟຈາກປະເທດອາຊຽນຈະກວມສ່ວນແບ່ງຫຼາຍກວ່າເກົ່າໃນຕະຫຼາດນານນິງ.ກ່ຽວກັບເລື່ອງນີ້,ທ່ານເສິນເຊິ່ງບອກວ່າ, "ຂ້ອຍຫວັງຢ່າງຍິ່ງວ່າເມື່ອເຂດການຄ້າເສລີຈີນ-ອາຊຽນສ້າງສຳເລັດແລ້ວ,ຈະມີຜະລິດຕະພັນຂອງປະເທດອາຊຽນຢ່າງຫຼວງຫຼາຍເຂົ້າສູ່ຈີນ,ໃຫ້ປະຊາຊົນພວກເຮົາໄດ້ຊົມໃຊ້ໝາກຜົນແຫ່ງການສ້າງສຳເລັດເຂດການຄ້າເສລີ,ສຳຜັດກັບວັດທະນະທຳອາຊຽນຫຼາຍກວ່າເກົ່າ,ເຮັດໃຫ້ຊີວິດການເປັນຢູ່ຂອງພວກເຮົາມີສີສັນອາຊຽນຫຼາຍກວ່າເກົ່າ."
<< 1 2 >>
Fri Apr. 4, 2025
