ປີ2009,ເມື່ອໄດ້ປະສົບການຊຸດໂຊມເປັນໄລຍະສັ້ນໆຍ້ອນໄດ້ຮັບຜົນກະທົບຈາກວິກິດການການເງິນແລ້ວ,ຕະຫຼາດອະສັງຫາລິມະຊັບຂອງຈີນໄດ້ຟື້ນຕົວຢ່າງແຂງແຮງ,ບໍ່ວ່າໃນດ້ານປະລິມານຫຼືລາຄາລ້ວນແຕ່ເພີ່ມຂຶ້ນ.ມີສື່ມວນຊົນໃຊ້ຄຳວ່າ"ບ້າ"(crazy)ມາພັນລະນາຕະຫຼາດເຮືອນຂອງຈີນໃນປີກາຍນີ້.ເພື່ອສະກັດກັ້ນບໍ່ໃຫ້ລາຄາເຮືອນຢູ່ຂອງບາງຕົວເມືອງແພງຂຶ້ນໄວເກີນໄປ,ແລະດັດສົມຄວບຄຸມຕະຫຼາດອະສັງຫາລິມະຊັບຕື່ມອີກ,ເລີ່ມແຕ່ທ້າຍປີກາຍນີ້ເປັນຕົ້ນມາ,ລັດຖະບານຈີນໄດ້ວາງມາດຕະການຫຼາຍຢ່າງອອກມາຢ່າງລຽນຕິດ,ມາດຕະການເຫຼົ່ານີ້ມີຈຸດປະສົງສອງຢ່າງທີ່ຈະແຈ້ງຄືຕ້ານການສວຍໂອກາດແລະຮັບປະກັນຄວາມຕ້ອງການທີ່ສົມເຫດສົມຜົນຕໍ່ເຮືອນຢູ່.
ຕົວເລກຂອງກົມສະຖິຕິແຫ່ງລັດຈີນສະແດງໃຫ້ເຫັນວ່າ,ປີ2009,ການຈຳໜ່າຍເຮືອນຢູ່ທີ່ຊື້ຂາຍກັນຢູ່ຈີນມີເນື້ອທີ່937ລ້ານຕາແມັດ,ເມື່ອທຽບໃສ່ໄລຍະດຽວກັນຂອງປີກ່ອນແລ້ວໄດ້ເພີ່ມຂຶ້ນ42%,ມູນຄ່າການຈຳໜ່າຍມີ4400ຕື້ຢວນ,ເພີ່ມຂຶ້ນຫຼາຍກວ່າ75%ເມື່ອທຽບໃສ່ໄລຍະດຽວກັນຂອງປີກ່ອນ.ພ້ອມດຽວກັນນັ້ນ,ລາຄາສະເລ່ຍຂອງເຮືອນຢູ່ທີ່ຊື້ຂາຍກັນໃນປີ2009ແມ່ນ4695ຢວນຕໍ່ຕາແມັດ,ເພີ່ມຂຶ້ນເກືອບ25%ເມື່ອທຽບໃສ່ໄລຍະດຽວກັນຂອງປີກ່ອນ,ຈັງຫວະເຕີບໂຕໄດ້ສ້າງສະຖະຕິສູງສຸດໃນຮອບ15ປີ.ຕາມປະຊາຊົນທົ່ວໄປຂອງຈີນເຫັນວ່າ,ການເຕີບໂຕຂອງລາຄາເຮືອນໄດ້ ກາຍຄວາມສາມາດຮັບເອົາໄດ້ຂອງເຂົາເຈົ້າແລ້ວ.
"ຄັນໄລ່ຕາມເງິນເດືອນແລ້ວ,ບໍ່ສາມາດຊື້ເຮືອນໄດ້ເລີຍ,ເຖິງຈະຈ່າຍຄ່າເຮືອນເທື່ອທຳອິດກໍ່ບໍ່ພໍ,ຍັງຕ້ອງໄປຢືມຜູ່ອື່ນອີກ."
"ເວົ້າສຳລັບປະຊາຊົນທຳມະດາຄືພວກເຮົາແລ້ວ,ຢາກຊື້ເຮືອນແທ້ໆ,ແຕ່ລາຄາເຮືອນຖີບສູງຂຶ້ນຕະຫຼອດ,ແລ້ວຂ້ອຍມີແຕ່ລໍຖ້າເບິ່ງກ່ອນແລ້ວຈິ່ງຕັດສິນໃຈວ່າຈະຊື້ຫຼືບໍ່?"
ປື້ມປົກສີຟ້າເສດຖະກິດປະຈຳປີຂອງສະພາບັນດິດວິທະຍາສາດສັງຄົມຈີນໄດ້ສະໜັບສະໜູນທັດສະນະດັ່ງກ່າວ,ບົດລາຍງານສະບັບນີ້ຂຽນວ່າ,ເພື່ອຮັບມືກັບວິກິດການການເງິນ,ໃນ6ເດືອນທ້າຍປີ2008,ຈີນໄດ້ວາງນະໂຍບາຍທີ່ໃຫ້ສິດທິພິເສດເພື່ອສົ່ງເສີມການຊື້ຂາຍໃນຕະຫຼາດອະສັງຫາລິມະຊັບ,ໃນໄລຍະດຽວກັນ,ພາຍໃຕ້ສະພາບການທີ່ປະລິມານການຈຳໜ່າຍໄດ້ຫຼຸດລົງຢ່າງຫຼວງຫຼາຍ,ລາຄາເຮືອນຢູ່ໄດ້ຫຼຸດລົງ,ເວົ້າໃນດ້ານພາວະວິໃສແລ້ວ,ນີ້ໄດ້ກະຕຸ້ນໃຫ້ຂະແໜງການອະສັງຫາລິມະຊັບຟື້ນຕົວ.ພາຍໃຕ້ການກະຕຸ້ນຈາກຄວາມຕ້ອງການເພີ່ມຂຶ້ນຢ່າງຫຼວງຫຼາຍ,ລາຄາເຮືອນໄດ້ເພີ່ມຂຶ້ນຢ່າງວ່ອງໄວ.ຕາມຕົວເລກໃນບົດລາຍງານ,ອີງຕາມບົດຮຽນໃນສາກົນ,ອັດຕາສ່ວນລະຫວ່າງລາຄາເຮືອນກັບລາຍໄດ້ຕໍ່ປີຂອງຄອບຄົວຄົນໃນເມືອງຄວນຢູ່ລະຫວ່າງ3-7ເທົ່າ.ແຕ່ວ່າໃນປີ2009,ອັດຕານີ້ພັດຫຼາຍກວ່າ8ເທົ່າ,ອັນໄດ້ ກາຍຂອບເຂດຮັບເອົາໄດ້ທີ່ສົມເຫດສົມຜົນແລ້ວ.
ພາຍໃຕ້ສະພາບນີ້,ໂດຍແນໃສ່ສະພາບເສດຖະກິດມະຫາພາກທີ່ກ້າວອອກຈາກຜົນກະທົບຂອງວິກິດການການເງິນເປັນກ້າວໆ,ເລີ່ມແຕ່ທ້າຍປີ2009ເປັນຕົ້ນມາ,ລັດຖະບານຈີນເລີ່ມຫຼຸດສິດທິພິເສດໃນດ້ານນະໂຍບາຍສົ່ງເສີມຂະແໜງການອະສັງຫາລິມະຊັບ.ທະນາຄານຕ່າງໆຂອງຈີນກໍ່ເລີ່ມໃຫ້ສິດທິພິເສດໜ້ອຍລົງໃນການປ່ອຍເງິນກູ້ສິນເຊື່ອ.
ກ່ຽວກັບເລື່ອງນີ້,ທ່ານລີຕ້າວຂຸຍ ຫົວໜ້າສູນຄົ້ນຄວ້າເສດຖະກິດຈີນແລະເສດຖະກິດໂລກຂອງມະຫາວິທະຍາໄລຊິງຮວາເຫັນວ່າ:
"ນະໂຍບາຍເຫຼົ່ານີ້ແມ່ນປະຕິບັດໂດຍປະສານສົມທົບກັບນະໂຍບາຍຕ້ານການສວຍໂອກາດໃນຂະແໜງການອະສັງຫາລິມະຊັບ,ຫຼຸດການໃຫ້ສິທິພິເສດໜ້ອຍລົງ,ຫຼຸດການປ່ອຍເງິນກູ້ໃຫ້ໜ້ອຍລົງ,ຕໍ່ຕ້ານຄວາມຕ້ອງການແບບສວຍໂອກາດ.ຂ້າພະເຈົ້າເຊື່ອວ່າທະນາຄານອື່ນກໍ່ຈະເຮັດແນວນີ້ຕາມໆກັນ.ສຳລັບຕະຫຼາດອະສັງຫາລິມະຊັບແລ້ວ,ປະລິມານການຈຳໜ່າຍແລະລາຄາອາດຈະຫຼຸດລົງໜ້ອຍໜຶ່ງ."
1 2 
