ຍ້ອນວ່າໄປຮອດພູພຽງແລ້ວບໍ່ມີເວລາພັກຜ່ອນ,ວຽກກໍ່ຫຼາຍ,ສະມາຊິກທັງໝົດ30ຄົນຂອງໜ່ວຍກູ້ໄພລ້ວນແຕ່ມີອາການບໍ່ລື້ງກັບອາກາດພູພຽງ.ທ່ານໂຮຊື້ເຄີ່ເອງກໍ່ມີອາການໜັກຫຼາຍ.ເພິ່ນບອກວ່າ:"ເຈັບຫົວ,ຮາກຫຼາຍເທື່ອ,ຫົວໃຈເຕັ້ນໄວແລະອຶດອັດຫຼາຍ.ລົ້ມຢູ່ສະຖານທີ່ກູ້ໄພສອງເທື່ອ.ດູດອົກຊີແຊນ,ໃສ່ນ້ຳທະເລ,ສັກຢາ,ອາການໄຄແດ່ແລ້ວກໍ່ບຸກເຮັດວຽກຕໍ່."
ກໍ່ຄືເວົ້າມາຫັ້ນແລ້ວວ່າ,ທ່ານໂຮຊື້ເຄີ່ພ້ອມກັບສະມາຊິກອື່ນໆຂອງໜ່ວຍກູ້ໄພບາກບັ່ນສູ້ຊົນຢູ່ແນວໜ້າກູ້ໄພ.ເມື່ອຜ່ານ3ມື້ທຳອິດທີ່ຫຍຸ້ງຍາກລຳບາກທີ່ສຸດແລ້ວ,ທ່ານໂຮຊື້ເຄິ່ຮູ້ສຶກວ່າການກູ້ໄພເມືອງອີ້ຊູ້ເທື່ອນີ້ໄດ້ສຳເລັດໂດຍພື້ນຖານແລ້ວ.ເພາະວ່າ,ໜ່ວຍກູ້ໄພໄດ້ຮັບໄຊຊະນະທີ່ມີລັກສະນະຕັດສິນພາຍໃນ72ຊົ່ວໂມງທີ່ເປັນເວລາທີ່ດີທີ່ສຸດສຳລັບກູ້ເອົາຊີວິດຂອງຄົນ.
ເວົ້າສຳລັບໜ່ວຍກູ້ໄພແລ້ວ,ການກູ້ໄພເທື່ອນີ້ມີຈຸດພິເສດອີກອັນໜຶ່ງຄືການປະຕິບັດໜ້າທີ່ຢູ່ເຂດຊົນເຜົ່າສ່ວນໜ້ອຍ.ປະຊາຊົນເມືອງອີ້ຊູ້ສ່ວນຫຼາຍແມ່ນຊາວເຜົ່າຕິເບດ.ໃນໄລຍະກູ້ໄພ,ພີ່ນ້ອງເຜົ່າຕິເບດທີ່ຊື່ສັດບໍລິສຸດແລະໃຈບຸນໄດ້ໃຫ້ການຊ່ວຍເຫຼືອຢ່າງເອື້ອເຟື້ອເຜື່ອແຜ່ແກ່ໜ່ວຍກູ້ໄພ,ເຊິ່ງເຮັດໃຫ້ທ່ານໂຮຊື້ເຄິ່ພ້ອມດ້ວຍສະມາຊິກໜ່ວຍກູ້ໄພທັງຫຼາຍຮູ້ສຶກຕື້ນຕັ້ນໃຈຫຼາຍ.ທ່ານໂຮຊື້ເຄີ່ກ່າວ່າ,ໃນບໍ່ເທົ່າໃດມື້ທຳອິດ,ເຄື່ອງຊ່ວຍເຫຼືອຍັງບໍ່ທັນສົ່ງເຖິງເຂດປະສົບໄພ,ບໍ່ມີນ້ຳຮ້ອນ.ປະຊາຊົນເຜົ່າຕິເບດທີ່ປະສົບໄພກໍ່ເອົານ້ຳຮ້ອນໄປໃຫ້ພວກເພິ່ນ.ທ່ານເວົ້າວ່າ:
"ປະຊາຊົນຜູ່ປະສົບໄພເມື່ອອອກຈາກຊາກອາຄານແລ້ວກໍ່ຕັ້ງຕູບຜ້າເຕັ້ນຢູ່ສະໜາມກິລາທີ່ເປັນບ່ອນປະຈຳການຂອງໜ່ວຍແພດ.ເຂົາເຈົ້າຜ່າຝືນຕົ້ມນ້ຳ,ແລ້ວຕັກໃສ່ກະຕິກນ້ຳຮ້ອນພຽງໜ່ວຍດຽວທີ່ໄດ້ມາຈາກກອງຊາກອາຄານ,ແລ້ວຂົນໄປໃຫ້ໜ່ວຍກູ້ໄພພວກເຮົາ.ນ້ຳໃຈ ນີ້ຂ້ອຍຈະບໍ່ມີວັນລືມໃນຕະຫຼອດຊີວິດ."
ທ່ານໂຮຊື້ເຄີ່ເຫັນວ່າ,ຄວາມເອົາໃຈໃສ່ແລະຄວາມຊ່ວຍເຫຼືອຂອງປະຊາຊົນເຜົ່າຕິເບດທີ່ມີຕໍ່ໜ່ວຍກູ້ໄພທີ່ຈິງແລ້ວກໍ່ແມ່ນການແລກປ່ຽນດ້ວຍຄວາມຈິງໃຈ.ເຂົາເຈົ້າສູ້ຕາຍເພື່ອກູ້ໄພ,ພີ່ນ້ອງເຜົ່າຕິເບດໄດ້ເຫັນແລະໄດ້ຈື່ຈຳໃນໃຈ.ທ່ານໂຮຊື້ເຄີ່ກ່າວວ່າ,ຜ່ານຈາກການກູ້ໄພສຸກເສີນຢູ່ເມືອງອີ້ຊູ້ເທິງພູພຽງ,ທ່ານກັບໜ່ວຍກູ້ໄພຈີນໄດ້ຜ່ານການທົດສອບອັນຂ້ຽວຂາດອີກ ເທື່ອໜຶ່ງ.ໃນຕໍ່ໜ້າ,ໜ່ວຍກູ້ໄພໜ່ວຍນີ້ບໍ່ວ່າຈະໄປກູ້ໄພຢູ່ບ່ອນໃດກໍ່ມີບໍ່ຫຍັງທີ່ຈະຜ່ານຜ່າບໍ່ໄດ້,ບໍ່ມີໜ້າທີ່ໃດທີ່ຈະບໍ່ສຳເລັດ.
1 2 
