ສວນໂບຕັນເສີນໂຈ່ວຂອງນະຄອນໂລ້ຢາງຕັ້ງຢູ່ຕໍ່ໜ້າກັບວັດມ້າຂາວ, ສະຖານທີ່ບູຮານປະຫວັດສາດທີ່ມີຊື່ສຽງ, ຫ່າງຈາກຕົວເມືອງ 5 ກິໂລແມັດ, ໃນເມືອງມີລົດເມທ່ອງທ່ຽວສາຍສະເພາະໄປຮອດໂດຍກົງ. ສວນໂບຕັນເສີນໂຈ່ວກວມເນື້ອທີ່ຫຼາຍກວ່າ 40 ກວ່າເຮັກຕາ, ສິ່ງກໍ່ສ້າງໃນສວນເປັນແບບສະໄໝລາຊະວົງຖາງ, ໃນນັ້ນມີທິວທັດເປັນພູຜານາສວນ, ສິ່ງກໍ່ສ້າງໃນສວນກໍ່ໃຫຍ່ແລະສະຫງ່າງາມ. ໃນສວນໂບຕັນເສີນໂຈ່ວມີດອກໂບຕັນຫຼາຍພັນທັງຈາກພາຍໃນແລະຕ່າງປະເທດພັນກວ່າຊະນິດ, ແມ່ນສວນໜຶ່ງທີ່ມີດອກໂບຕັນຫຼາຍພັນທີ່ສຸດໃນຈີນປະຈຸບັນ. ທ່ານຈ້າວຢວນເສີງ, ພະນັກງານສວນໂບຕັນເສີນໂຈ່ວບອກວ່າ:
"ສວນໂບຕັນເສີນໂຈວເກັບຮັກສາແນວພັນດອກໂບຕັນທີ່ດີເດັ່ນແລະມີຊື່ສຽງຂອງພາຍໃນແລະຕ່າງປະເທດ 1021 ຊະນິດ, ແມ່ນສວນໂບຕັນທີ່ເກັບຮັກສາແນວພັນຄົບຖ້ວນຫຼາຍ. ໄລຍະດອກໂບຕັນບານຕາມທຳມະຊາດຂອງສວນນີ້ຈະຢູ່ໃນລະຫວ່າງຕົ້ນເດືອນເມສາຫາຕົ້ນເດືອນພຶດສະພາ, ແກ່ຍາວປະມານ 40 ມື້. ແນວພັນດອກໂບຕັນໃຫຍ່ກວ່າໝູ່ແມ່ນຊະນິດຕາເວັນ ຊຶ່ງເປັນຊະນິດທີ່ນຳເຂົ້າ, ໃນຍາມມັນບານ, ດອກໃຫຍ່ສຸດຈະກວ້າງ 30 ກວ່າມິລິແມັດ; ສ່ວນດອກໂບຕັນສືຈິນ, ຕົ້ນໂບຕັນຕົ້ນໜຶ່ງກໍ່ສາມາດໃຫ້ດອກ 7-8 ຊະນິດ, ເປັນ 7-8 ສີ, ນີ້ແມ່ນສີສັນທີ່ພິເສດຫຼາຍ."
ນອກຈາກຈະໄດ້ຊົມດອກໂບຕັນຊະນິດຕ່າງໆແລ້ວ, ສວນໂບຕັນເສີນໂຈວຍັງພັກຜ່ອນຢ່ອນອາລົມໄດ້, ແລະສຳຜັດກັບວັດທະນະທຳໂບຕັນ, ຊອກຮູ້ຂະບວນການປະສົມພັນພັນໃໝ່ຂອງດອກໂບຕັນດ້ວຍເຕັກນິກວິທະຍາສາດທີ່ທັນສະໄໝ. ຖ້ານັກທ່ອງທ່ຽວສົນໃຈ, ກໍ່ຊື້ຕົ້ນໜຶ່ງກັບບ້ານ, ເພື່ອປະດັບເຮືອນໃຫ້ງາມໆ.
ດອກໂບຕັນໃນສວນໂບຕັນເສີນໂຈ່ວບໍ່ພຽງແຕ່ມີຊື່ສຽງໃນທ້ອງຖິ່ນທໍ່ນັ້ນ, ຍັງຖືກເລືອກເປັນດອກໄມ້ປະດັບຂອງງານກິລາໂອລິມປິກປັກກິ່ງ 2008. ໃນງານວາງສະແດງໂລກຊຽງໄຮທີ່ພວມດຳເນີນນັ້ນ, ນັກທ່ອງທ່ຽວກໍ່ຈະໄດ້ຊົມດອກໂບຕັນໂລ້ຢາງໃນຫໍວາງສະແດງຫຼາຍແຫ່ງ.
ສວນສາທາລະນະວາງເສີງແມ່ນໜຶ່ງໃນສວນສາທາລະນະທີ່ໂຮມສູນວາງສະແດງດອກໂບຕັນໄວກວ່າໝູ່ຂອງນະຄອນໂລ້ຢາງ, ດອກໂບຕັນໃນແຫ່ງນີ້ກໍ່ມີຊື່ສຽງຫຼາຍ. ນາງສືຊິວເສຍ, ພະນັກງານສວນສາທາລະນະວາງເສີງໂລ້ຢາງກ່າວວ່າ:
"ສວນສາທາລະນະວາງເສີງແມ່ນບ່ອນຈັດງານຊົມດອກໂບຕັນຄັ້ງທຳອິດ, ປີ 1983, ນະຄອນໂລ້ຢາງຈັດງານຊົມດອກໂບຕັນກໍ່ແມ່ນຈັດຢູ່"ຕຶກໂບຕັນ"ຂອງສວນວາງເສີງພວກເຮົາ.
ສວນສາທາລະນະວາງເສີງເຊິ່ງແປວ່າວັງຂອງພະບໍລົມວົງສານຸວົງສ້າງໃນປີ 1955, ໄດ້ຊື່ຍ້ອນສ້າງຢູ່ເທິງຊາກສ່ວນໜຶ່ງຂອງພະລາຊະວັງໂຈ່ວຕາເວັນອອກ, ແມ່ນສວນໃຫຍ່ທີ່ສຸດຂອງນະຄອນໂລ້ຢາງ, ແລະເປັນສວນສາທາລະນະທີ່ໃຫຍ່ທີ່ສຸດຂອງແຂວງເຫີນານ. ສວນວາງເສີງນີ້ແມ່ນສວນທີ່ມີແນວພັນໂບຕັນຄົບຖ້ວນທີ່ສຸດຂອງໂລ້ຢາງ, ພວກເຮົາມີປະຫວັດດົນນານກວ່າໝູ່ໃນດ້ານປູກແລະປະສົມພັນໂບຕັນ, ມີເຕັກນິກສູງກວ່າໝູ່, ຜ່ານການເບິ່ງແຍງດູແລຢ່າງຈິງຈັງ, ດອກໂບຕັນໃນສວນພວກເຮົາເຕີບໃຫຍ່ໄດ້ດີທີ່ສຸດ."
ປີນີ້, ໃນສວນສາທາລະນະວາງເສິງ, ນອກຈາກຊົມດອກໂບຕັນແລ້ວ, ນັກທ່ອງທ່ຽວຍັງສາມາດເຂົ້າຮ່ວມກິດຈະກຳຕ່າງໆ. "ກາງເວັນຊົມດອກໂບຕັນ, ກາງຄືນຊົມໂຄມໄຟ"ແມ່ນຮີດຄອງປະເພນີຊົມດອກໂບຕັນຂອງຄົນໂລ້ຢາງ, ສວນສາທາລະນະວາງເສີງໄດ້ວາງສະແດງໂຄມໄຟປະດັບປະເພດຕ່າງໆໂດຍສະເພາະ. ເມື່ອຍ່າງເຂົ້າປະຕູສວນ, ກໍ່ຈະໄດ້ເຫັນ"ໂຄມໄຟໂບຕັນ", ເຊຶ່ງຕິດຢູ່ເທິງຜ້າກັ້ງທີ່ສູງ 16 ແມັດ, ກວ້າງ 5 ແມັດ, "ໂບຕັນ"ຫຼາຍສີແຂ່ງຂັນກັນບານ, ໄດ້ສະແດງຄວາມຮຸ່ງເຮືອງເຫຼືອງເຫຼື້ອມ; ຢູ່ຂ້າງຮູບທາຍເກັກທີ່ເປັນສັນຍະລັກໃຫ້ແກ່ວັດທະນະທຳເກົ່າແກ່ຂອງຈີນແລະຢູ່ຕີນ"ນາງຟ້າໂບຕັນ", ດອກໂບຕັນທີ່ເປັນດອກໄມ້ປະຈຳຊາດຈີນພວມແຂ່ງຂັນກັນບານ.
ນອກຈາກສວນໂບຕັນເສີນໂຈ່ວແລະສວນສາທາລະນະວາງເສີງແລ້ວ, ນະຄອນໂລ້ຢາງຍັງມີສວນຊົມດອກໂບຕັນ 20 ກວ່າແຫ່ງ, ລ້ວນແຕ່ສາມາດຊົມດອກໂບຕັນບານເຮື່ອເຮືອງ.
<< 1 2 >>
Fri Apr. 4, 2025
