ເລີ່ມແຕ່ວັນທີ1ມີຖຸນາແລ້ວນີ້ເປັນຕົ້ນໄປ,ລັດຖະບານຈີນເລີ່ມທົດລອງການໃຫ້ເງິນອຸດໜູນຕໍ່ບຸກຄົນທີ່ຊື້ລົດໃຊ້ພະລັງງານໃໝ່ຢູ່5ນະຄອນຄືຊຽງໄຮ້,ຊາງຊຸນ,ຫາງໂຈ່ວ,ເຮີເຝີຍແລະເສິນເຈີ້ນ.ຄືຈະໃຫ້ເງິນອຸດໜູນແກ່ຜູ່ຊື້ລົດໃນຈຳນວນສູງສຸດ6ໝື່ນຢວນ.ພາກສ່ວນທີ່ກ່ຽວຂ້ອງ,ວິສາຫະກິດແລະຜູ່ບໍລິໂພກຂອງ5ນະຄອນນີ້ລ້ວນແຕ່ສະແດງຄວາມຊົມເຊີຍຕໍ່ນະໂຍບາຍດັ່ງກ່າວ.ແຕ່ວ່ານັກວິຊາການພາຍໃນຂະແໜງການລົດຍົນກ່າວວ່າ,ເຖິງວ່າຈີນໄດ້ເລີ່ມຕົ້ນຂະບວນການຫັນເປັນອຸດສາຫະກຳລົດຍົນໃຊ້ພະລັງງານໃໝ່ແລ້ວກໍ່ຕາມ,ແຕ່ລົດໃຊ້ພະລັງງານໃໝ່ເຂົ້າສູ່ຄອບຄົວຢ່າງຂະໜາດໃຫຍ່ຍັງຕ້ອງໃຊ້ເວລາດົນຢູ່.
ໃນ5ນະຄອນທີ່ທົດລອງປະຕິບັດນະໂຍບາຍ,ນະຄອນເຮີເຟີຍຢູ່ໃນແຖວໜ້າຕະຫຼອດໃນດ້ານຄົ້ນຄວ້າພັດທະນາລົດໃຊ້ພະລັງງານໃໝ່.ປັດຈຸບັນ,ມີລົດໃຊ້ພະລັງງານໃໝ່200ຄັນທີ່ຜະລິດໂດຍບໍລິສັດລົດຍົນຈ່ຽງຫວາຍ,ບໍລິສັດລົດໂດຍສານອ່ານຄາຍແລະອື່ນໆຂອງນະຄອນເຮີເຝີຍພວມທົດລອງນຳໃຊ້ຢູ່ນະຄອນຫຼວງປັກກິ່ງແລະນະຄອນຕ້າລຽນເປັນຕົ້ນ.ພ້ອມກັນນັ້ນຍັງມີລົດເມໄຟຟ້າ30ຄັນຮັບໃຊ້ການຂົນສົ່ງຜູ່ໂດຍສານລົດເມປະຈຳທາງສາຍ18ຂອງນະຄອນເຮີເຟີຍ,ແລະມີປະສິດທິຜົນດີຫຼາຍ.ທ່ານວາງຊຽນເຟີ່ງ ຮອງຜູ່ອຳນວຍການໃຫຍ່ຂອງບໍລິສັດລົດຍົນອ່ານຄາຍກ່າວວ່າ,ລົດຍົນໃຊ້ພະລົງງານໃໝ່ເຫຼົ່ານີ້ມີບົດບາດປະຢັດພະລັງງານຢ່າງພົ້ນເດັ່ນ."ຄ່າໃຊ້ຈ່າຍຂອງລົດຊະນິດນີ້ໜ້ອຍທີ່ສຸດ,ສະເລ່ຍແລ້ວກິໂລແມັດໜຶ່ງໃຊ້ໄຟຟ້າ1ກິໂລວັດໂມງ.ຄັນໄລ່ຕາມລາຄາໄຟຟ້າໃນປັດຈຸບັນແລ້ວ,ແລ່ນລົດ1ກິໂລແມັດປະຢັດເງິນ2ຢວນ."
ແຕ່ກ່ອນ,ເມື່ອທຽບກັບລົດໃຊ້ນ້ຳມັນທີ່ມີລະດັບດຽວກັນ,ຕົ້ນທຶນການຜະລິດລົດໃຊ້ພະລັງງານໃໝ່ແມ່ນສູງສົມຄວນ,ສະນັ້ນ,ລາຄາຈຳໜ່າຍໃນຕະຫຼາດຈິ່ງອ່າວສູງ,ເຮັດໃຫ້ຜູ່ບໍລິໂພກບໍ່ກ້າຊື້.ໃນນະໂຍບາຍສົ່ງເສີມເທື່ອນີ້,ການເງິນສູນກາງໃຫ້ເງິນອຸດໜູນຕໍ່ບຸກຄົນຊື້ລົດແມ່ແຮງປະສົມແບບສາກໄຟໃນຈຳນວນເງິນຫຼາຍທີ່ສຸດຄັນລະ5ໝື່ນຢວນ,ສຳລັບລົດໃຊ້ແຕ່ໄຟຟ້າຈະໃຫ້ເງິນອຸດໜູນຫຼາຍທີ່ສຸດຄັນລະ6ໝື່ນຢວນ.
ຕໍ່ນະໂຍບາຍໃຫ້ເງິນອຸດໜູນເຫຼົ່ານີ້,ທ່ານຢາງຈ່າວ ຜູ່ອຳນວຍການພະແນກປະຊາສຳພັນຂອງບໍລິສັດລົດຍົນBYDທີ່ມີສຳນັກງານໃຫຍ່ຢູ່ນະຄອນເສິນເຈີ້ນກ່າວວ່າ,ບໍລິສັດBYD ມີລົດແມ່ແຮງປະສົມແບບສາກໄຟລຸ້ນໜຶ່ງແລະລົດໃຊ້ແຕ່ໄຟຟ້າລຸ້ນໜຶ່ງໄດ້ຈຳໜ່າຍຢູ່ຕະຫຼາດແລ້ວ,ພາຍຫຼັງນະໂຍບາຍໃຫ້ເງິນອຸດໜູນ ແລ້ວ,ຈະຊຸກຍູ້ການຈຳໜ່າຍລົດສອງລຸ້ນນີ້.ພ້ອມກັນນັ້ນ,ນະໂຍບາຍນີ້ຈະມີບົດບາດນຳທາງການຄົ້ນຄວ້າແລະການຜະລິດຂອງບໍລິສັດລົດຍົນຈີນໃນຕໍ່ໜ້າ.ທ່ານຢາງຈ່າວກ່າວວ່າ
"ກ່ອນອື່ນແມ່ນໃຫ້ກຳລັງໃຈ,ຕາມເອກະສານນະໂຍບາຍ,ລົດໃຊ້ແຕ່ໄຟຟ້າແລະລົດແມ່ແຮງປະສົມສາກໄຟແມ່ນໄດ້ຮັບເງິນອຸດໜູນຫຼາຍທີ່ສຸດ,ນີ້ເຮັດໃຫ້ບໍລິສັດລົດຍົນມີຄວາມໝັ້ນໃຈເດັດດ່ຽວກວ່າເກົ່າໃນການພັດທະນາລົດໃຊ້ພະລັງງານໃໝ່ທີ່ຖືລົດໄຟຟ້າເປັນຫຼັກ.ພາຍຫຼັງນະໂຍບາຍໃຫ້ເງິນອຸດໜູນວາງອອກມາແລ້ວ,ມີບົດບາດສະໜັບສະໜູນການຈຳໜ່າຍລົດໄຟຟ້າຕໍ່ຜູ່ບໍລິໂພກທົ່ວໄປ."
ຢູ່ນະຄອນເສິນເຈີ້ນທີ່ຕັ້ງສຳນັກງານໃຫຍ່ຂອງບໍລິສັດລົດຍົນBYD,ນອກຈາກນະໂຍບາຍສົ່ງເສີມຂອງລັດແລ້ວ,ນະຄອນເສິນເຈີ້ນຍັງໄດ້ປະກາດໃຊ້ນະໂຍບາຍທີ່ເໝາະສົມກັນ.ຕາມຜູ່ຮັບຜິດຊອບຂອງຄະນະກຳມະການພັດທະນາແລະປະຕິຮູບນະຄອນເສິນເຈີ້ນເຜີຍໃຫ້ຮູ້ວ່າ,ຢູ່ນະຄອນເສິນເຈີ້ນ, ບຸກຄົນ,ອົງການຈັດຕັ້ງຕ່າງໆຂອງສັງຄົມແລະວິສາຫະກິດທີ່ຊື້ລົດໃຊ້ພະລັງງານໃໝ່,ນອກຈາກຈະໄດ້ເງິນອຸດໜູນຈາກລັດແລ້ວ,ຍັງຈະໄດ້ເງິນອຸດໜູນອີກ2ໝື່ນຢວນ,ຄືລວມທັງໝົດແມ່ນ8ໝື່ນຢວນ.
1 2 
