ຢູ່ນະຄອນເຮີເຝີຍ,ນອກຈາກໃຫ້ເງິນອຸດໜູນໂດຍກົງແລ້ວ,ຍັງໄດ້ໃຊ້ຫຼາຍວິທີຫຼາຍກວ່າເກົ່າເພື່ອສົ່ງເສີມການບໍລິໂພກລົດໃຊ້ພະລັງງານໃໝ່,ເງິນອຸດໜູນຂອງລັດບວກກັບເງິນອຸດໜູນຂອງທ້ອງຖິ່ນ,ເຮັດໃຫ້ລາຄາຂອງລົດໃຊ້ພະລັງງານໃໝ່ຫຼຸດລົງຮອດລະດັບທີ່ຜູ່ບໍລິໂພກທົ່ວໄປຮັບເອົາໄດ້. ຄ່າໃຊ້ຈ່າຍໃນການໃຊ້ລົດໃຊ້ພະລັງງານໃໝ່ໄດ້ຫຼຸດລົງປະມານ80%ເມື່ອທຽບກັບລົດໃຊ້ນ້ຳມັນ.ທັງໝົດເຫຼົ່ານີ້ເຮັດໃຫ້ຜູ່ບໍລິໂພກສົນໃຈຢາກຊື້ຫຼາຍຂຶ້ນ.ຢູ່ນະຄອນຫາງໂຈ່ວທີ່ເປັນຕົວເມືອງທົດລອງປະຕິບັດນະໂຍບາຍໃຫ້ເງິນອຸດໜູນຕໍ່ລົດໃຊ້ພະລັງງານໃໝ່,ຜູ່ຂັບລົດຕັກຊີທີ່ມີນາມສະກຸນຫຼົວກ່າວວ່າສົນໃຈຢາກລອງຂັບລົດໃຊ້ພະລັງງານໃໝ່"ລົດຂ້ອຍໃຊ້ອີກປີເຄິ່ງກໍ່ຕ້ອງປ່ຽນລົດໃໝ່ແລ້ວ,ຖ້າວ່າຮອດເວລານັ້ນມີເງິນພຽງພໍຂ້ອຍຈະພິຈາລະນາຊື້ລົດໃຊ້ພະລັງງານໃໝ່,ເວົ້າສຳລັບຜູ່ຂັບລົດຕັກຊີແລ້ວ,ລົດໃຊ້ພະລັງງານໃໝ່ແມ່ນມີຄວາມດຶງດູດຫຼາຍ."
ແຕ່ວ່າ,ຍ້ອນພິຈາລະນາເຖິງລົດໃຊ້ໄຟຟ້າມີເຕັກນິກບໍ່ໝັ້ນທ່ຽງແລະຂາດອຸປະກອນຄົບຊຸດໃນການບໍລິການຜູ່ບໍລິໂພກ,ຜູ່ບໍລິໂພກບາງຄົນກ່າວວ່າ,ເຖິງວ່າລັດໄດ້ວາງນະໂຍບາຍສົ່ງເສີມແລະໃຫ້ເງິນອຸດໜູນກໍ່ຕາມ,ເຂົາເຈົ້າກໍ່ຈະບໍ່ຕັດສິນໃຈຊື້ລົດໃຊ້ພະລັງງານໃໝ່ເທື່ອ. "ສາກໄຟດົນໂພດ,ຂັບລົດໄປຮອດບ່ອນໜຶ່ງຕ້ອງສາກໄຟ5ຫາ6ຊົ່ວເມືອງ,ຄັນໃສ່ນ້ຳມັນພຽງ10ກວ່ານາທີເທົ່ານັ້ນກໍ່ໄດ້ແລ້ວ,ສາກໄຟຕ້ອງລໍຖ້າເປັນເວລາດົນເຕີບ,ນອກນີ້,ແມ່ແຮງຂອງລົດໃຊ້ພະລັງງານໃໝ່ດີຫຼືບໍ່ກໍ່ບໍ່ຮູ້,ລາຄາກໍ່ແພງ."
ຕໍ່ຄວາມບໍ່ໝັ້ນໃຈຂອງຜູ່ບໍລິໂພກເຫຼົ່ານີ້,ພາກສ່ວນແລະຕົວເມືອງທີ່ກ່ຽວຂ້ອງກໍ່ມີແຜນການແກ້ໄຂ.ໃນນະໂຍບາຍໃຫ້ເງິນອຸດໜູນຂອງລັດໄດ້ກຳນົດຢ່າງຈະແຈ້ງໃຫ້ອົງການປົກຄອງຂອງຕົວເມືອງທີ່ທົດລອງປະຕິບັດນະໂຍບາຍຕ້ອງຈັດງົບປະມານຈຳນວໜຶ່ງແລະວາງນະໂຍບາຍທີ່ເໝາະສົມກັນ,ໃຫ້ການສະໜັບສະໜູນຕໍ່ການສ້າງສະຖານີສາກໄຟ,ການຊື້ແລະນຳໃຊ້ລົດທີ່ໃຊ້ພະລັງງານໃໝ່,ຕ້ອງສ້າງລະບົບຊຳລະໝໍ້ໄຟທີ່ໃຊ້ບໍ່ໄດ້ແລະເກັບຄືນໝໍ້ໄຟແລະອື່ນໆ.
ຕໍ່ເລື່ອງນີ້,ທ່ານນາງລາງເສຫົງ ຜູ່ຊ່ຽວຊານວິເຄາະຂະແໜງການລົດຍົນກ່າວວ່າ,ເນື່ອງຈາກວ່າການກໍ່ສ້າງພື້ນຖານໂຄງລ່າງແລະປັບປຸງເຕັກນິກຂອງລົດໃຊ້ພະລັງງານໃໝ່ໃຫ້ສົມບູນຂຶ້ນຕ້ອງການເວລາ,ສະນັ້ນ,ລົດໃຊ້ພະລັງງານໃໝ່ເຂົ້າສູ່ຜູ່ຊົມໃຊ້ຢ່າງຫຼວງຫຼາຍນັ້ນຍັງຕ້ອງການເວລາດົນສົມຄວນ.ນາງບອກວ່າ"ຂ້ອຍເຫັນວ່າຍັງຕ້ອງໃຊ້ເວລາດົນຫຼາຍ,ເພາະວ່າຕ້ອງໄດ້ຮັບການສະໜັບສະໜູນຕໍ່ລົດໃຊ້ພະລັງງານໃໝ່ຊຸດທຳອິດທີ່ປ້ອນເຂົ້າຕະຫຼາດໃນດ້ານເຕັກນິກ,ການບໍລິການຫຼັງການຂາຍ,ພື້ນຖານໂຄງລ່າງແລະອື່ນໆ,ພວກເຮົາຕ້ອງຖອດຖອນບົດຮຽນໃນດ້ານນີ້,ຕ້ອງຊອກຫາບັນຫາທີ່ເກີດຂຶ້ນໃນການນຳໃຊ້ລົດຂອງລູກຄ້າແລ້ວປັບປຸງຜະລິດຕະພັນພວກເຮົາໃຫ້ດີຂຶ້ນ,ແລະໃນເວລາທົດລອງປະຕິ ບັດນະໂຍບາຍໃຫ້ເງິນອຸດໜູນ,ຍັງຕ້ອງສ້າງພື້ນຖານໂຄງລ່າງໃຫ້ສົມບູນຂຶ້ນ."
ແຕ່ວ່າ,ທ່ານຫວາງສວນຟູ ຜູ່ອຳນວຍການໃຫຍ່ບໍລິສັດລົດຍົນBYD ກ່າວວ່າ,ເຖິງວ່າການພັດທະນາຂອງລົດໃຊ້ພະລັງງານໃໝ່ຍັງປະເຊີນກັບຄວາມຫຍຸ້ງຍາກຈຳນວນໜຶ່ງກໍ່ຕາມ,ແຕ່ວ່າ,ເມື່ອລັດຖະບານໄດ້ວາງນະໂຍບາຍໃຫ້ເງິນອຸດໜູນຕໍ່ຜູ່ຊື້ລົດແລ້ວ,ການພັດທະນາຂອງລົດໃຊ້ພະລັງງານໃໝ່ຂອງຈີນຈະຄ່ອຍໆກ້າວເຂົ້າສູ່ການດຳເນີນງານທີ່ດີ.
ຕາມເປົ້າໝາຍຍຸດທະສາດແຫ່ງການພັດທະນາລົດໃຊ້ພະລັງງານໃໝ່ຂອງຈີນ,ຮອດປີ2015,ຈະມີລົດໄຟຟ້າເຖິງ5ແສນຄັນ,ປະລິມານການຜະລິດລົດແມ່ແຮງປະສົມທີ່ມີລະດັບຕ່າງກັນຈະກວມຍອດປະລິມານການຜະລິດຫຼາຍກວ່າ30%ຕໍ່ປີ.ອຸດສາຫະກຳການຜະລິດລົດໃຊ້ພະລັງງານໃໝ່ພ້ອມດ້ວຍຊີ້ນສ່ວນອາໄຫຼ່ຈະບັນລຸເຖິງລະດັບແຖວໜ້າຂອງໂລກ.
1 2 
