ບ້ານເຖິງໂຖຂອງນະຄອນເຟີ້ງຮວາແຂວງເຈີ້ຈ່ຽງ ພາກຕາເວັນອອກຂອງຈີນ,ແຕ່ກ່ອນເປັນບ້ານນ້ອຍໆທີ່ບໍ່ມີຊື່ສຽງຫຍັງເລີຍ.ເລີ່ມແຕ່ຊຸມປີ1990ເປັນຕົ້ນມາ,ບ້ານນ້ອຍແຫ່ງນີ້ເລີ່ມມີຊື່ສຽງໂດ່ງດັງໄປທົ່ວປະເທດຈີນກໍ່ຄືທົ່ວໂລກ,ແລະເປັນບ້ານພຽງແຫ່ງດຽວໃນໂລກທີ່ຖືກຄັດເລືອກເປັນບ້ານ"ແບບຢ່າງຂອງຕົວເມືອງ"ຂອງງານວາງສະແດງໂລກຊຽງໄຮ້2010.ຫວ່າງກ່ອນນີ້ບໍ່ດົນ,ຄະນະນັກຂ່າວຈີນແລະຕ່າງປະເທດຂອງCRIໄດ້ໄປເອົາຂ່າວຢູ່ບ້ານເຖິງໂຖ,ໄດ້ສຳຜັດກັບອຸດົມການທີ່ພາກພູມໃຈຂອງຊາວບ້ານເຖິງໂຖທີ່ຄົນໃນເມືອງໄຝ່ຝັນຫາ.
ເມື່ອລົດເມໃຫຍ່ຂອງຄະນະນັກຂ່າວCRIໄປຮອດຫົວບ້ານເຖິງໂຖ,ນັກຂ່າວແປກໃຈຫຼາຍ,ຖາມຕົວເອງວ່າ"ນີ້ແມ່ນຊົນນະບົດບໍ່?"ຢູ່ແຫ່ງນີ້ມີຕົ້ນໄມ້ຂຽວງາມ,ດອກໄມ້ທີ່ສວຍງາມ,ມີນ້ຳໄຫຼອ້ອມບ້ານ,ໄດ້ຍິນສຽງນົກຮ້ອງທີ່ມວນຫູ,ປານກັບສວນສາທາລະນະທີ່ສະແດງໃຫ້ເຫັນທິວທັດທຳມະຊາດທີ່ສວຍງາມຂອງພາກໃຕ້ແມ່ນ້ຳຢາງຊີກ້ຽງ.ເຮືອນເກົ່າປະຫວັດຮ້ອຍປີ,ເຂດຊົມຕົ້ນໝາກກ້ຽງ,ສູນເພາະພັນພືດດ້ວຍຈຸລິນຊີ,ສະໜາມທີ່ມີນ້ຳພຸປະກອບດົນຕີ,ຫໍວາງສະແດງສິລະປະແກະສະຫຼັກລວດລາຍດ້ວຍຫີນແລະອື່ນໆ,ໝົດບ້ານນີ້ໄດ້ສະແດງໃຫ້ເຫັນພາບ ທີ່ເກົ່າແກ່ບູຮານແລະທຳມະຊາດແຕ່ມີຊີວິດຊີວາຫຼາຍ.
ຢູ່ແຄມຫ້ວຍ,ພໍ່ເຖົ້າຜູ່ໜຶ່ງເອີ້ນໃສ່ຝູງນົກກາງແກວ່າ"ມາແມ້,ມາແມ້!"ນົກກາງແກຂາວຫຼາຍຮ້ອຍໂຕກໍ່ບິນມາອ້ອມຂ້າງເພິ່ນ,ພາໃຫ້ນັກທ່ອງທ່ຽວຮ້ອງໂຮຊົມເຊີຍ.ພໍ່ເຖົ້າຜູ່ນີ້ເວົ້າດ້ວຍຄວາມພາກພູມໃຈວ່າ,ເພິ່ນຊື່ວ່າລູເວິນກວາງທີ່ມີຊື່ສຽງຂອງບ້ານເຖິງໂຖໂດຍໄດ້ສົມຍານາມວ່າ"ຈອມພົນ3ເຫຼົ່າທັບ",ເພາະເພິ່ນລ້ຽງແລະຝຶກນົກກາງແກ,ເປັດປ່າແລະກະຮອກ.ແຕ່ກ່ອນ,ພໍ່ເຖົ້າລູເວີນກວາງເປັນຄົນບ້ານອື່ນ,10ປີກ່ອນ,ເພິ່ນພ້ອມກັບເມຍຍ້າຍໄປເຮັດວຽກຢູ່ບ້ານເຖິງໂຖ,ທາງບ້ານໄດ້ຈັດເຮືອນຢູ່ດີໆໃຫ້ເພິ່ນ,ຈ່າຍຄ່າແຮງງານປີລະ4ໝື່ນຢວນ,ເມື່ອທຽບໃສ່ລາຍຮັບຂອງຊາວໜຸ່ມໃນເມືອງແລ້ວ,ເພິ່ນໄດ້ເງິນເດືອນຫຼາຍກວ່າ,ແລະຍັງມີສະຫວັດດີການປະເພດຕ່າງໆອີກ.ລູກເຕົ້າຂອງພໍ່ເຖົ້າຢູ່ນະຄອນນິງໂປຢາກໃຫ້ເພິ່ນໄປຢູ່ນຳກັນ,ແຕ່ເພິ່ນພັດຢາກຢູ່ບ້ານເຖິງໂຖ.ພໍ່ເຖົ້າບອກວ່າ:
"ຢູ່ເທິງອິນເຕີເນັດ,ເມື່ອກ່າວເຖິງຈອມພົນເປັດຂອງບ້ານເຖິງໂຖໃຜໆກໍ່ຮູ້.ມີຫຼາຍບ່ອນຢາກ ຈ້າງຂ້ອຍ,ແຕ່ຂ້ອຍກໍ່ຕັດສິນໃຈຢູ່ບ້ານນີ້ຕະຫຼອດໄປ,ເພາະວ່າຂ້ອຍຮັກແພງບ້ານເຖິງໂຖ,ສຳຄັນທີ່ສຸດແມ່ນຍ້ອນບ້ານເຖິງໂຖແມ່ນປ່ອງຢ້ຽມແຫ່ງການກໍ່ສ້າງຊົນນະບົດໃໝ່,ຂ້ອຍຢືນຢູ່ປ່ອງຢ້ຽມແຫ່ງນີ້,ເປັນຜູ່ໂຄສະນາ,ຂ້ອຍມັກບ້ານແຫ່ງນີ້ທີ່ເປັນບ່ອນທີ່ຄົນກັບທຳມະຊາດພັດທະນາຢ່າງກົມກຽວກັນ,ສິ່ງແວດລ້ອມທຳມະຊາດສວຍງາມ,ເຮັດວຽກຢູ່ແຫ່ງນີ້ເຮັດໃຫ້ຂ້ອຍຮູ້ສຶກມ່ວນຊື່ນຫຼາຍ,ນັກທ່ອງທ່ຽວທັງຫຼາຍກໍ່ຮູ້ສຶກມ່ວນຄືກັນ."
ບ້ານເຖິງໂຖໄດ້ສ້າງຊື່ສຽງໃຫ້ແກ່ພໍ່ເຖົ້າລູເວີນກວາງແລະເຮັດໃຫ້ເພິ່ນເກີດມີຄວາມຮັກຄວາມຜູກພັນຕໍ່ບ້ານນີ້ແລະເປັນບ້ານພຽງແຫ່ງດຽວໃນໂລກທີ່ຖືກຄັດເລືອກເປັນ"ບ້ານແບບຢ່າງທີ່ດີເດັ່ນຂອງຕົວເມືອງ"ໃນງານວາງສະແດງໂລກຊຽງໄຮ2010.:ແລະຍັງໄດ້ຮັບນາມມະຍົດລະດັບຊາດ70ກວ່າປະການເຊັ່ນວ່າ1ໃນ500ບ່ອນສິ່ງແວດລ້ອມທຳມະຊາດດີເດັ່ນຂອງໂລກ,1ໃນ10ບ້ານກົມກຽວກັນດີເດັ່ນຂອງໂລກ,1ໃນບ້ານວັດທະນະທຳຊຸດທຳອິດຂອງປະເທດຈີນແລະອື່ນໆ.ທ່ານລີວຊົງຈ່ຽງ ນາຍບ້ານເຖິງໂຖບອກນັກຂ່າວວ່າ,ອຸດົມການແຫ່ງການພັດທະນາຂອງບ້ານເຖິງໂຖແມ່ນ"ເຮັດໃຫ້ຄົນໃນເມືອງຍິ່ງໄຝ່ຝັນເຖິງຊີວິດຊົນນະບົດ."ທ່ານກ່າວວ່າ:
"ງານວາງສະແດງໂລກຊຽງໄຮມີຫົວຂໍ້ວ່າ"ຕົວເມືອງທີ່ດີກວ່າ,ຊີວິດທີ່ດີກວ່າ".ສ່ວນຄຳຂວັນຂອງບ້ານພວກເຮົາກໍ່ແມ່ນຄວາມຝັນຂອງບ້ານເຖິງໂຖທີ່ເຮັດໃຫ້ຄົນໃນເມືອງຍິ່ງໄຝ່ຝັນເຖິງຊີວິດຊົນນະບົດ".ເມື່ອພັດທະນາມາໄດ້40ກວ່າປີແລ້ວ,ບ້ານເຖິງໂຖພວກເຮົາໄດ້ມີການປ່ຽນແປງແບບໜ້າມືເປັນຫຼັງມື,ຊົນນະບົດພວກເຮົາກໍ່ຄືກັບຕົວເມືອງ,ເຮັດໃຫ້ຄົນໃນເມືອງໄຝ່ຝັນເຖິງຊົນນະບົດ."
ບ້ານເຖິງໂຖມີ343ຄອບຄົວມີ830ກວ່າຄົນ,ກວມເນື້ອທີ່2ກິໂລຕາແມັດ,ມີວິສາຫະກິດນ້ອຍໃຫຍ່60ກວ່າແຫ່ງ.ປີ2009,ມູນຄ່າການຜະລິດຂອງ ບ້ານມີຫຼາຍກວ່າ4ຕື້ຢວນ.ບ້ານເຖິງໂຖເປັນແຫຼ່ງທ່ອງທ່ຽວຊົນນະບົດລະດັບຊາດ5Aແຫ່ງທຳອິດຂອງຈີນ,ລາຍຮັບດ້ານເສດຖະກິດການການທ່ອງທ່ຽວມີ110ລ້ານຢວນ.
1 2 
