ຢູ່ນະຄອນເສິງຕູ່ເທດສະບານແຂວງເສສວນທີ່ຕັ້ງຢູ່ພາກຕາເວັນຕົກສຽງໃຕ້ຂອງຈີນ,ມີຄົນໃນເມືອງກຸ່ມໜຶ່ງເພີດເພີນນຳທິວທັດທຳມະຊາດ,ເຂົາເຈົ້າພົ້ນຈາກຄວາມອຶກກະທຶກຄຶກໂຄມຂອງຕົວເມືອງ,ໄປຊານເມືອງເສິງຕູ່ເຊົ່າເຮືອນປູກພືດ,ໃຊ້ຊີວິດຢ່າງມວນຊື່ນ.
ຕົ້ນລະດູໃບໄມ້ຫຼົ່ນຂອງນະຄອນເສິງຕູ່,ລົມພັດໃບໜ້າຄ່ອຍໆຍັງເຮັດໃຫ້ຮູ້ສຶກເຖິງຄວາມຮ້ອນຂອງລະດູຮ້ອນທີ່ຫາກໍ່ຜ່ານໄປ.ຢູ່ເຮືອນພັກຊົນນະບົດແຫ່ງໜຶ່ງຂອງບ້ານຫົງຊ່າຕາແສງຊ່ານເຊິ້ງນະຄອນເສິງຕູ່,ຊາວໜຸ່ມຫຼາຍຄົນນັ່ງອ້ອມໂຕະ,ທັງລົມກັນທັງດື່ມກາເຟເຢັນ,ກິນຂະໜົມເຄັກຕີຣາມີຊູຂອງອີຕາລີ,ຟັງດົນຕີແຈສອາເມລິກາ.ພາບນີ້ເຮັດໃຫ້ຄົນຫຼົງ ວ່ານີ້ແມ່ນຮ້ານກາເຟທີ່ມີບັນຍາກາດດີແຫ່ງໜຶ່ງໃນເມືອງ.
ຄວາມຈິງແລ້ວ,ເຮືອນພັກຊົນນະບົດຄືແນວນີ້ຢູ່ຕາແສງຊ່ານເຊິ້ງມີເກືອບ10ແຫ່ງ.ເຖິງວ່າກວມບໍ່ຮອດ5%ໃນເຮືອນພັກຊົນນະບົດຈຳນວນເກືອບ300ແຫ່ງໃນບ້ານນີ້ກໍ່ຕາມ,ແຕ່ເຮືອນພັກປະເພດນີ້ພວມຄ່ອຍໆເຮັດໃຫ້ໂສມໜ້າຂອງບ້ານມີການປ່ຽນແປງ.
ນັກຂ່າວພວກເຮົາໄດ້ຂັບລົດໄປສຸດທາງນ້ອຍຂອງບ້ານຫົງຊ່າກໍ່ຮອດເຮືອນພັກຊົນນະບົດທີ່ມີຊື່ວ່າ"ຟ້ານຊວນ"ທີ່ມີຊື່ສຽງຫຼາຍໃນບ້ານ.
ເຈົ້າຂອງເຮືອນພັກທີ່ມີເດິ່ນບ້ານກວ້າງຊື່ວ່າ"ຟ້ານຊວນ"ເປັນຊາວໜຸ່ມທີ່ເກີດຊຸມປີ1980,ນາງມີຊື່ຫຼີ້ນວ່າ"ສ້ຽວກວ້າຍ".ສ້ຽວກວ້າຍບອກວ່າຈຸດເດັ່ນທີ່ສຸດຂອງເຮືອນພັກ"ຟ້ານຊວນ"ກໍ່ແມ່ນອາຫານຈີນແລະອາຫານຕາເວັນຕົກປະສົມປະສານກັນ.ນາງບອກວ່າ:"ແຕ່ກ່ອນຂ້ອຍເຮັດວຽກການອອກແບບສິ່ງພິມຈົນມາຮອດປີກ່ອນຈິ່ງເລີ່ມພັດທະນາວຽກໃນຂະແໜງການຮ້ານອາຫານ.ທຳອິດຂ້ອຍໄດ້ເປີດຮ້ານອາຫານເຄັດລັບສ່ວນຕົວ,ແຕ່ຮ້ານນັ້ນນ້ອຍໂພດ,ບັນຈຸຄົນໄດ້ໜ້ອຍດຽວ,ສະນັ້ນຈິ່ງມາເປີດເຮືອນພັກຢູ່ຕາແສງຊ່ານເຊີ້ງແຫ່ງນີ້.ຍ້ອນວ່າຕອນເປີດຮ້ານອາຫານເຄັດລັບສ່ວນຕົວລ້ວນແຕ່ແມ່ນຂາຍອາຫານຕາເວັນຕົກ,ອາຫານຈີນໜ້ອຍທີ່ສຸດ,ເມື່ອເປີດເຮືອນພັກຢູ່ແຫ່ງນີ້ແລ້ວໄດ້ຂາຍອາຫານຕາເວັນຕົກ,ແລະຍັງໄດ້ຈ້າງພໍ່ຄົວແຕ່ງອາຫານເສສວນ,ສະນັ້ນ,ຮ້ານນີ້ແມ່ນມີທັງອາຫານຈີນແລະຕາເວັນຕົກ."
ເມື່ອນັ່ງຢູ່ສະລົງແບບຕາເວັນຕົກຢູ່ເດີ່ນບ້ານ,ຟັງດົນຕີທີ່ອອນຊອນ,ຈິ່ງເຂົ້າໃຈໃນທັນທີວ່າເປັນຫຍັງເຮືອນພັກຊົນນະບົດ"ຟ້ານຊວນ"ທີ່ຜູ່ໃຊ້ອິນເຕີເນັດເອີ້ນວ່າເປັນເຮືອນພັກທີ່ທັນສະໄໝທີ່ສຸດແຫ່ງນີ້ຫາກໍ່ເປີດມາໄດ້4ເດືອນກວ່າກໍ່ເຮັດທຸລະກິດໄດ້ດີທີ່ສຸດ.
ນາງສ້ຽວກວ້າຍມີຈຸດພິເສດຂອງຄົນເສິງຕູ່ຄືໝັ້ນໃຈໂຕເອງ,ມັກເສລີພາບ.ນີ້ແມ່ນຈຸດປະສົງເບື້ອງຕົ້ນທີ່ນາງເປີດເຮືອນພັກຊົນນະບົດ.ຢູ່ຕາແສງຊ່ານເຊິ້ງ, "ຟ້ານຊວນ"ແມ່ນເຮືອນພັກຊົນນະບົດແຫ່ງທຳອິດທີ່ມີບັນຍາກາດຂອງຊີວິດຄົນຊັ້ນກາງແບບຕາເວັນຕົກ.ໃນເວລາເຮືອນພັກຊົນນະບົດທົ່ວໄປລ້ວນແຕ່ມີການດື່ມນ້ຳຊາແລະຫຼິ້ນໃພ້ນົກກະຈອກ,ເນື້ອໃນການບໍລິການຂອງເຮືອນພັກ"ຟ້ານຊວນ"ໄດ້ຕື່ມຄວາມທັນສະໄໝເຂົ້າໄປ,ຄືເປີດດົນຕີບຼູສທີ່ອອນຊອນຊື້ງໆເຢັນໆ, ມີການຫຼິ້ນເກມເທິງໂຕະທີ່ໄວລຸ້ນນິຍົມທີ່ສຸດ,ເຮັດໃຫ້ເຫັນວັດທະນະທຳການພັກຜ່ອນຢ່ອນອາລົມການບັນເທີງລື້ນເລີງແບບດັ້ງເດີມປະສົມປະສານກັບແບບທັນສະໄໝ,ເຮັດໃຫ້ມີຈຸດພິເສດການພັກຜ່ອນຢ່ອນອາລົມໃນເມືອງຍຸກປະຈຸບັນທີ່ມີເນື້ອໃນເລິກເຊິ່ງກວ່າເກົ່າ.
1 2 
