ຫຼັງຕອນທ່ຽງ,ນັກຂ່າວພວກເຮົາໄດ້ໄປຮອດເຮືອນພັກຊື່ວ່າ"ຫ້ອງສ່ວນຕົວສຳລັບທ່ານ"ທີ່ຢູ່ແຄມໜອງຊິ້ງຟູເມີຍລິນ.ເຮືອນພັກແຫ່ງນີ້ມີບັນຍາກາດສົດຊື່ນ,ຢູ່ໜ້າປະຕູເຮືອນມີຕົ້ນໄຮ3ຕົ້ນ,ຢູ່ກ້ອງຮົ່ມໄມ້ມີໂຕະ3ຫາ4ໜ່ວຍ,ທ່ານລອງວາດພາບເບິ່ງວ່າ,ເມື່ອນັ່ງອ່ານປຶ້ມ,ດື່ມນ້ຳຊາຢູ່ບ່ອນນີ້ມັນຈະສະຫວາດສະເຫວີຍປານໃດ.
ເຮືອນພັກແຫ່ງນີ້ເປັນເຮືອນທີ່ມີໂຄງສ້າງ3ຊັ້ນທັງມີເດີ່ນ,ແຕ່ລະຊັ້ນມີຈຸດພິເສດຕ່າງກັນ.ຊັ້ນເທິງແມ່ນເຮືອນຫຼາຍຫ້ອງ,ຢູ່ໃນເຮືອນມີຜ້າພົມຫຍ້າ,ສະລົງໃຫຍ່,ເຄື່ອງປະດັບທີ່ເຮັດດ້ວຍທອງມີເອກະລັກພິເສດ,ຖ້ານປຶ້ມຢູ່ຫ້ອງຮັບແຂກມີປຶ້ມຊະນິດຕ່າງໆເຕັມຖ້ານ….ຢູ່ໃນເຮືອນເຕັມໄປດ້ວຍບັນຍາກາດວັດທະນະທຳ.ຊັ້ນທີສອງເປັນແທ່ນນ້ອຍທີ່ມີດິນດຳທີ່ອຸດົມສົມບູນ,ບໍ່ໄດ້ປູກຫຍ້າຫຼືດອກໄມ້ໃສ່,ແຕ່ແມ່ນພືດທຳມະຊາດສີຂຽວ.ຊັ້ນລຸ່ມແມ່ນເດີ່ນນ້ອຍທີ່ຍັງບໍ່ທັນຈັດສັນໃຫ້ດີເທື່ອ.ເຈົ້າຂອງເຮືອນບອກວ່າ,ໃນຕໍ່ໜ້າ,ເພິ່ນຈະປູກຜັກແລະໝາກໄມ້ຢູ່ໃນເດິ່ນບ້ານ,ຫວັງວ່າຈະໃຊ້ຊີວິດແບບພໍພຽງ.
ຢູ່ໃນເຮືອນພັກທີ່ປະດັບເປັນພິເສດແຫ່ງນີ້,ມັກມີໝູ່ເພື່ອນຂອງວົງການວັດທະນະທຳແລະສື່ມວນຊົນຈຳນວນບໍ່ໜ້ອຍມາຢາມ,ຈົນກາຍເປັນວັດທະ ນະທຳສະລົງກໍ່ວ່າໄດ້. ຕອນບ່າຍທີ່ອາກາດປ່ອດໂປ່ງສົດໃສ,ຄົນທັງຫຼາຍມານັ່ງອ່ານປຶ້ມ,ຫຼືອ່ານບົດປະພັນຢູ່ກ້ອງຮົ່ມຕົ້ນໄຮ.
ຊີວິດແບບບໍ່ມີການແຂ່ງຂັນຊິງດີຊິງເດັ່ນ,ບໍ່ມີການຜູກມັດ,ເປັນຊີວິດແບບພໍພຽງ,ເຖິງຈະເປັນຊີວິດແບບງ່າຍດາຍແຕ່ຮູ້ສຶກເພິ່ງພໍໃຈແນວນີ້ເຮັດໃຫ້ ທ່ານລີລ້ຽງເຈີ່ນ ເຈົ້າຂອງເຮືອນພັກຕັດສິນໃຈປັກຫຼັກຖານແລະເຮັດທຸລະກິດຢູ່ແຫ່ງນີ້.ເມື່ອເວົ້າເຖິງອຸດົມການດ້ານຊີວິດແລະວິທີເຮັດທຸລະກິດ,ທ່ານລີລ້ຽງເຈີ່ນບອກໃຫ້ຮູ້ວ່າ:"ລູກຄ້າມາຢູ່ເຮືອນພັກແຫ່ງນີ້,ເພິ່ນກໍ່ຈະມີຄວາມຮູ້ສຶກດຽວກັນກັບຂ້ອຍແລ້ວຈະມັກຊີວິດແບບນີ້.ເຮັດທຸລະກິດຢູ່ແຫ່ງນີ້,ພວກເຮົາບໍ່ຄອຍຖ້າແລະກໍ່ບໍ່ເຊີນຊວນລູກຄ້າ,ເຮັດທຸລະກິດໄປຕາມທຳມະຊາດ,ຜູ່ໃດຢາກມາກໍ່ມາໂລດ."
ທ່ານລີລ້ຽງເຈີ່ນເຄີຍເປັນຜູ່ບໍລິຫານຂັ້ນສູງໃນບໍລິສັດໃຫຍ່,ແຕ່ປະຈຸບັນ,ເພິ່ນເປັນພໍ່ຄົວຂອງເຮືອນພັກແຫ່ງນີ້,ໃຜກໍ່ບໍ່ເຄີຍຄິດວ່າຜູ່ຊາຍທີ່ບໍ່ເຄີຍເຂົ້າເຮືອນຄົວໃນເມື່ອກ່ອນ,ແຕ່ວ່າປະຈຸບັນພັດມີສີມືດີໃນ ການແຕ່ງກິນ,ບໍ່ພຽງແຕ່ແຕ່ງໃຫ້ຄົນໃນຄອບຄົວເທົ່ານັ້ນ,ຍັງສາມາດເຮັດທຸລະກິດໄດ້ອີກ,ນີ້ເຮັດໃຫ້ທ່ານລີລ້ຽງເຈີ່ນຮູ້ສຶກພາກພູມໃຈຫຼາຍ.
ຫຼັງຕອນທ່ຽງ,ຕາກແດດທີ່ອົບອຸ່ນ,ກິນອາຫານເສສວນລົດຊາດແທ້ຢູ່ເຮືອນພັກຊົນນະບົດເປັນເລື່ອງທີ່ສະຫວາດສະເຫວີຍທີ່ສຸດ.ແຕ່ເວົ້າສຳລັບທ່ານລີລ້ຽງເຈີ່ນແລ້ວ,ຊີວິດທີ່ແທ້ຈິງບໍ່ຈຳເປັນຕ້ອງມີເງິນຫຼາຍ,ສອງຜົວເມຍເຂົາເຈົ້າເປີດເຮືອນພັກຢູ່ຕາແສງຊ່ານເຊີ້ງພຽງແຕ່ແມ່ນເຮັດໃຫ້ຊີວິດໃນຄວາມຝັນຂອງຕົນບັນລຸເປັນຈິງເທົ່ານັ້ນ.ທ່ານບອກວ່າ:"ຫຼາຍຄົນອາດຈະຄິດວ່າ,ຕ້ອງມີເງິນຫຼາຍຈິ່ງໃຊ້ຊີວິດແບບນີ້ໄດ້.ທີ່ຈິງບໍ່ແມ່ນດອກ,ໃຊ້ຕົ້ນທຶນນ້ອຍໆກໍ່ສາມາດໃຊ້ຊີວິດແນວນີ້ໄດ້,ເພາະວ່າມີຄວາມຕ້ອງການຄວາມຫຼູຫຼາແບບຕົວເມືອງໜ້ອຍທີ່ສຸດ,ເກືອບໍ່ຕ້ອງການການບັນເທິງເລີຍ.ແຕ່ ໃຈຊ້ຳພັດຮູ້ສຶກພຽງພໍແລະມີຄວາມສຸກ."
1 2 
