ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕົວເລກສະຖິຕິທີ່ມະຫາວິທະຍາໄລຈອນສ໌ຮອບກິນສ໌ຂອງອາເມຣິກາເປີດເຜີຍໃນວັນທີ 11 ມັງກອນນີ້ສະແດງໃຫ້ເຫັນວ່າ: ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ຢູ່ທົ່ວປະເທດອາເມຣິກາໄດ້ເພີ່ມຂຶ້ນຫຼາຍກວ່າ 1,4 ລ້ນາກໍລະນີ, ໄດ້ສ້າງສະຖິຕິສູງສຸດຂອງຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ເພີ່ມໃໝ່ຕໍ່ມື້ອີກເທື່ອໜຶ່ງນັບແຕ່ເກີດມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ. ນອກນັ້ນ, ນັບມາຮອດເວລາ 17 ໂມງຂອງວັນທີ 11 ມັງກອນນີ້, ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ຢູ່ອາເມຣິກາມີທັງໝົດຫຼາຍກວ່າ 62 ລ້ານຄົນ, ຈຳນວນຄົນນອນໂຮງໝໍຍ້ອນເປັນພະຍາດໂຄວິດ-19 ມີເຖິງ 147 ພັນຄົນ, ໄດ້ສ້າງສະຖິຕິສູງສຸດອີກຄັ້ງໜຶ່ງນັບແຕ່ເກີດມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ຈຳນວນຜູ້ເສຍຊີວິດມີຫຼາຍກວ່າ 840 ພັນຄົນ.
ແຕ່ວ່າ, ເມື່ອທຽບກັບສະພາບການແຜ່ລະບາດຂອງພະຍາດ, ສິ່ງທີ່ຄົນອາເມຣິກາເປັນຫ່ວງຫຼາຍກວ່າກໍ່ແມ່ນບັນຫາເສດຖະກິດ. ຂ່າວສານອາເປຫຼື AP ລາຍງານໃນວັນທີ 10 ມັງກອນນີ້ວ່າ: ສູນຄົ້ນຄວ້າວຽກງານສາທາລະນະທີ່ຂ່າວສານ AP ແລະສູນຄົ້ນຄວ້າຄວາມເຫັນຂອງປະຊາຊົນຂອງມະຫາວິທະຍາໄລຊິຄາໂກຮ່ວມກັນສ້າງຕັ້ງຂຶ້ນໄດ້ຢັ່ງຫາງສຽງປະຊາຊົນໃນເດືອນທັນວາປີ 2021, ຜົນການຢັ່ງຫາງສຽງສະແດງໃຫ້ເຫັນວ່າ: ປະຊາຊົນອາເມຣິກາມີພຽງແຕ່ 37% ທີ່ເຫັນວ່າສະພາບການແຜ່ລະບາດຂອງພະຍາດໂຄວິດ-19 ເປັນໜຶ່ງໃນວຽກງານບູລິມະສິດ 5 ຢ່າງຂອງລັດຖະບານອາເມຣິກາໃນປີ 2022. ໃນທາງກົງກັນຂ້າມ, ຜູ້ເຂົ້າຮ່ວມຢັ່ງຫາງສຽງມີ 68% ເຫັນວ່າຄວນຖືເອົາວຽກງານເສດຖະກິດເປັນໜຶ່ງໃນ 5 ວຽກງານສຳຄັນທີ່ຄວນເອົາໃຈໃສ່ຫຼາຍທີ່ສຸດ. ແຕ່ຜູ້ເຂົ້າຮ່ວມຢັ່ງຫາງສຽງຫຼາຍຄົນກໍກ່າວວ່າ: ເຖິງວ່າຕົນເອງເປັນຫ່ວງບັນຫາເສດຖະກິດຫຼາຍກວ່າ, ແຕ່ເລື່ອງນີ້ບໍ່ໄດ້ປ່ຽນແປງຄວາມເຫັນຂອງຕົນທີ່ມີຕໍ່ສະພາບການແຜ່ລະບາດຂອງພະຍາດໂຄວິດ-19.
ຂ່າວສານ AP ກ່າວວ່າ: ນັບມາຮອດເດືອນພະຈິກປີ 2021, ດັດສະນີລາຄາຜູ້ບໍລິໂພກຂອງອາເມຣິກາໄດ້ເພີ່ມຂຶ້ນ 6,8%, ໄດ້ສ້າງສະຖິຕິສູງສຸດໃນໄລຍະ 39 ປີຜ່ານມາ. ຄວາມເຫັນຂອງປະຊາຊົນໄດ້ສ່ອງແສງໃຫ້ເຫັນສິ່ງທ້າທາຍທີ່ພັກດີໂມເກຼັດອາເມຣິກາຜະເຊີນໃນເວລາຫາສຽງເລືອກຕັ້ງ. ພັກດີໂມເກຼັດໄດ້ຊະນະການເລືອກຕັ້ງປະທານາທິບໍດີແລະໄດ້ສິດຄວບຄຸມລັດຖະສະພາເມື່ອປີ 2020, ແລະໄດ້ໃຫ້ຄຳໝັ້ນສັນຍາວ່າຈະປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ໃຫ້ດີກວ່າລັດຖະບານທຣຳ. ແຕ່ວ່າພະຍາດໂຄວິດ-19 ພັດໄດ້ແຜ່ລະບາດຢ່າງໜັກໜ່ວງກວ່າເກົ່າເຊິ່ງໄດ້ສະແດງໃຫ້ເຫັນວ່າລັດຖະບານໂຈ ໄບເດັນໄດ້ຜິດຄຳໝັ້ນສັນຍາຂອງຕົນ.
ເຖິງຢ່າງໃດກໍຕາມ, ຄວາມເຫັນຂອງທຳນຽບຂາວພັດມີຄວາມແຕກຕ່າງກັນກັບຄວາມເຫັນຂອງປະຊາຊົນອາເມຣິກາ. ຫວ່າງມໍ່ໆມານີ້, ທຳນຽບຂາວກ່າວວ່າ: ປະຊາຊົນມີຄວາມສົນໃຈຕ່ຳລົງຕໍ່ສະພາບການແຜ່ລະບາດຂອງພະຍາດເຊິ່ງສະແດງໃຫ້ເຫັນວ່າ: ລັດຖະບານຕົນໄດ້ຮັບຜົນສຳເລັດໃນວຽກງານປ້ອງກັນແລະຄວບຄຸມການແຜ່ລະບາດຂອງພະຍາດ. ການສະແດງທ່າທີແບບນີ້ສົ່ງຜົນເຮັດໃຫ້ຄົນທັງຫຼາຍຮູ້ສຶກແປກໃຈທີ່ສຸດ.ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ເພີ່ມໃໝ່ຕໍ່ມື້ໄດ້ສ້າງສະຖິຕິສູງສຸດ, ຈຳນວນຄົນນອນໂຮງໝໍຍ້ອນເປັນພະຍາດໂຄວິດ-19 ໄດ້ສ້າງສະຖິຕິສູງສຸດ, ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ແລະຈຳນວນຜູ້ເສຍຊີວິດຍ້ອນເປັນພະຍາດໂຄວິດ-19 ລ້ວນແຕ່ເປັນອັນດັບໜຶ່ງຂອງໂລກ, ຖ້າວ່າການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ແບບນີ້ຖືວ່າເປັນຄວາມສຳເລັດຂອງອາເມຣິກາ, ຄັນຊັ້ນໃນໂລກນີ້ກໍບໍ່ມີປະເທດໃດປະລາໄຊໃນດ້ານການປ້ອງກັນແລະຄວບຄຸມການແຜ່ລະບາດຂອງພະຍາດແລ້ວ.
ຫາກທົບຄວນຄືນການຈັດອັນດັບໃນປີຜ່ານມາ, ຂ່າວສານບລຸມເບີກຂອງອາເມຣິກາໄດ້ຈັດອັນດັບອັນທີ່ເອີ້ນວ່າ: “ອັນດັບປະເທດທີ່ປະສົບຜົນສຳເລັດໃນການຕ້ານກັບການແຜ່ລະບາດຂອງພະຍາດໂຄວິດ-19”, ເພື່ອເຮັດໃຫ້ອາເມຣິກາຢູ່ໃນອັນດັບໜຶ່ງ, ຂ່າວສານບລຸມເບີກໄດ້ເບິ່ງຂ້າມປັດໄຈສຳຄັນທີ່ສຸດຄື: ຈຳນວນຜູ້ຖືກບົ່ງມະຕິເປັນພະຍາດແລະຈຳນວນຜູ້ເສຍຊີວິດຍ້ອນເປັນພະຍາດໂຄວິດ-19 ແລະອື່ນໆ, ຄັນຊັ້ນພວກເຮົາກໍເຂົ້າໃຈໄດ້ງ່າຍໆວ່າ, ເປັນຫຍັງພະຍາດໂຄວິດ-19 ໄດ້ແຜ່ລະບາດຢູ່ອາເມຣິກາຢ່າງໜັກໜ່ວງປານນີ້ແລ້ວ, ແຕ່ທຳນຽບຂາວພັດຍັງຕີລາຄາຕົນເອງວ່າໄດ້ຮັບຜົນສຳເລັດໃນການປ້ອງກັນແລະຄວບຄຸມການແຜ່ລະບາດຂອງພະຍາດ. ທ່ານເຊື່ອບໍ່ວ່ານີ້ຄືຜົນສຳເລັດ.
ຄົນຈີນມັກເວົ້າວ່າ: “ໃນໃຈຂອງປະຊາຊົນມີຊິງຊັ່ງຄັນໜຶ່ງ”, “ສາຍຕາຂອງປະຊາຊົນແມ່ນໃສແຈ້ງທີ່ສຸດ”. ການສະແດງທ່າທີຂອງທຳນຽບຂາວໄດ້ປີ້ນດຳເປັນຂາວ, ພວກເຮົາເລີຍຖືເອົາຄວາມເວົ້າຂອງອາເມຣິກາແບບນີ້ເປັນຄຳເວົ້າຫຼິ້ນໆກໍໄດ້ແລ້ວ. ບໍ່ແມ່ນຂອງແທ້ດອກ!
ຄຳເຫັນ
0