ຫລັກຫມາຍທາງອັນໃຫມ່ແຫ່ງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສປປ ລາວກັບ ສປ ຈີນ
(GMT+08:00) 2013-09-30 13:26:32 cri
ໃນການສຳພາດເທື່ອນີ້, ທ່ານຈູມມະລີ ໄຊຍະສອນຍັງໄດ້ກ່າວເຖິງ ຄວາມຫມາຍຂອງການຢ້ຽມຢາມຢູ່ປະເທດຈີນເທື່ອນີ້:"ການຢ້ຽມຢາມປະເທດຈີນເທື່ອນີ້,ເຖິງວ່າມີເວລາສັ້ນຫລາຍກໍ່ຕາມ, ແຕ່ວ່າຂ້າພະເຈົ້າເອງໄດ້ພົບປະກັບສະຫາຍເລຂາທິການໃຫຍ່ປະທານປະ ເທດສີຈິ້ນຜິງທີ່ເປັນຜູ່ນຳລຸ່ນໃຫມ່ຂອງປະເທດຈີນ,ເຖິງຈະແມ່ນລຸ່ນໃຫມ່ແຕ່ກໍ່ແມ່ນເພື່ອນເກົ່າມາແຕ່ດົນ. ການພົບປະໃນຄັ້ງນີ້ໄດ້ມີເນື້ອໃນໃຫມ່ຫລາຍອັນ, ເປັນການເປີດບັ້ນໃຫມ່ໃຫ້ແກ່ການຮ່ວມມືໃນຕໍ່ຫນ້າ.ເທື່ອນີ້,ທັງສອງຝ່າຍໄດ້ ເຊັນສັນຍາ 10 ກວ່າສະບັບ,ເຊິ່ງເປັນພື້ນຖານອັນຫນັກແຫນ້ນໃຫ້ແກ່ການພັດ ທະນາປະຊາຊົນປະເທດລາວຂອງພວກເຮົາ.ເວົ້າເຖິງການຮ່ວມມືແລ້ວ, ເຫັນວ່າປະເທດຈີນຍັງໄດ້ໃຫ້ການຊ່ວຍຫນູນ ຊ່ອຍເຫລືອ,ໃຫ້ການຮ່ວມມື ຮ່ວມມືກັບ ສປປ ລາວແຕ່ສະໄຫມໃດມາ ເຊິ່ງນັບແຕ່ສະໄຫມຕໍ່ສູ້ກູ້ຊາດ ຈົນສະໄຫມສ້າງສາ.ສະນັ້ນ, ການຢ້ຽມຢາມເທື່ອນີ້ຖືເປັນຂີດຫມາຍໃຫມ່, ພັກປະຊາຊົນປະຕິວັດລາວຮູ້ສຶກປິຕິຊົມເຊີນເປັນຢ່າງຍິ່ງ ເຫັນວ່າເພື່ອນຍຸດ ທະສາດທັງສອງຝ່າຍເຮົາລ້ວນແຕ່ມີຄວາມຊື່ສັດ ຄວາມຈິງໃຈຕໍ່ກັນມີອຸດົມ ການອັນດຽວກັນ,ຄິດວ່າປະເທດຊາດຂອງພວກເຮົາຈະກ້າວໄປຫນ້າໄປຕາມທິດສັງຄົມນິຍົມ."
ປີນີ້ແມ່ນການຄົບຮອບ 10 ປີ ແຫ່ງການສ້າງການພົວພັນຄູ່ຮ່ວມມືຍຸດ ທະສາດລະຫວ່າງອາຊຽນກັບຈີນ.ໃນເວລາໃຫ້ສຳພາດຕໍ່ນັກຂ່າວ CRI , ທ່ານຈູມມລີ ໄຊຍະສອນ ໄດ້ຕີລາຄາສູງຕໍ່ການຮ່ວມມືອາຊຽນ-ຈີນ ຕະຫລອດໄລຍະຜ່ານມາທີ່ມີຫມາກມີຜົນອັນໃຫຍ່ຫລວງໃນຫລາຍດ້ານກວມເອົາທຸກຂົງເຂດ: ການເມືອງ-ຄວາມຫມັ້ນຄົງ, ເສດຖະກິດ ແລະວັດທະ ນະທຳ-ສັງຄົມ ອັນໄດ້ເຮັດໃຫ້ ສປ ຈີນກາຍເປັນຄູ່ຮ່ວມຍຸດທະສາດປະເທດ ທຳອິດຂອງອາຊຽນໃນປີ 2003.
ທ່ານຈູມມະລີ ໄຊຍະສອນກ່າວວ່າ:"ຕະຫລອດໄລຍະ 10 ປີຂອງການ ເປັນຄູ່ຮ່ວມຍຸດທະສາດ, ການຮ່ວມມື ອາຊຽນ-ຈີນ ໄດ້ຮັບການເສີມຂະຫຍາຍ ເປັນກ້າວໆມາ ໂດຍສະເພາະໃນຂົງເຂດການຄ້າ, ການລົງທຶນ, ການສຶກສາ, ວັດທະນະທຳ-ສັງຄົມ ແລະ ການທ່ອງທ່ຽວ. ສິ່ງເຫລົ່ານີ້ ໄດ້ກາຍເປັນພື້ນຖານໃຫ້ແກ່ການເພີ່ມທະວີການຮ່ວມມື,ຄວາມເຂົ້າອົກເຂົ້າໃຈເຊິ່ງກັນ ແລະກັນ ບົນພື້ນຖານການເປັນເພື່ອນບ້ານທີ່ດີ ເຊິ່ງບໍ່ສະເພາະແຕ່ໄດ້ນຳຜົນປະໂຫຍດມາສູ່ອາຊຽນ ແລະ ສປ ຈີນເທົ່ານັ້ນ, ແຕ່ຍັງເປັນການປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະານຮ່ວມມືເພື່ອການພັດທະນາໃນພາກພື້ນອາຊີຕາເວັນອອກ ແລະໃນໂລກອີກດ້ວຍ. ດັ່ງນັ້ນ, ຂ້າພະເຈົ້າຈິ່ງເຫັນວ່າສາຍພົວພັນລະຫວ່າງ ອາຊຽນ ແລະຈີນ ເປັນສາຍພົພວັນຍຸດທະສາດທີ່ເຂັ້ມແຂງ, ຮອບດ້ານ ແລະຕ່າງຝ່າຍຕ່າງມີຜົນປະໂຫຍດ ເຊິ່ງອາຊຽນ ແລະ ສປ ຈີນ ຄວນສືບຕໍ່ຮັກສາການຮ່ວມມືອັນດີນີ້ ແລະ ພ້ອມກັນເສີມຂະຫຍາຍໃຫ້ນັບມື້ນັບແຕກດອກອອກຜົນ."
