ຕາມຂ່າວ CRI ລາຍງານວ່າ: ພິທີວາງສີລາລືກຂອງໂຄງການສຳນັກງານສູນກາງພັກປະຊາຊົນປະຕິວັດລາວທີ່ຈີນເປັນຜູ້ຊ່ວຍເຫຼືອກໍ່ສ້າງໄດ້ຈັດຂຶ້ນໃນຕອນເຊົ້າວັນທີ 13 ກຸມພານີ້, ທ່ານຄຳພັນ ພົມມະທັດ ເລຂາຄະນະພັກ ຫົວໜ້າຫ້ອງວ່າການສູນກາງພັກປະຊາຊົນປະຕິວັດລາວ, ທ່ານດຣ ຄຳສຸກ ໄຊຍະສອນ ຮອງເລຂາຄະນະພັກ ຮອງຫົວໜ້າຫ້ອງວ່າການສູນກາງພັກ ຫົວໜ້າຄະນະຮັບຜິດຊອບໂຄງການກໍ່ສ້າງ, ທ່ານຖົງຕ້າວສື ຜູ້ຊ່ວຍລັດຖະມົນຕີວ່າການກະຊວງການຄ້າຈີນ, ທ່ານກ່ວນຮວາປິ່ນ ເອກອັກຄະລັດຖະທູດຈີນປະຈຳລາວໄດ້ເຂົ້າຮ່ວມພິທີວາງສີລາລືກ.
ທ່ານດຣ ຄຳສຸກ ໄຊຍະສອນ ໄດ້ຕາງໜ້າຝ່າຍລາວກ່າວຄຳປາໄສໂດຍໄດ້ສະແດງຄວາມຂອບອົກຂອບໃຈແລະຄວາມຮູ້ບຸນຄຸນອັນລົ້ນເຫຼືອໄປຍັງສູນກາງພັກ, ລັດຖະບານແລະປະຊາຊົນຈີນ ທີ່ໄດ້ໃຫ້ການຊ່ວຍເຫຼືອອັນລ້ຳຄ່າໃຫ້ແກ່ພັກ, ລັດແລະປະຊາຊົນລາວຢ່າງຈິງໃຈ.
ໂອກາດກ່າວຄຳປາໄສໃນພິທີດັ່ງກ່າວ, ທ່ານຖົງຕ້າວສື ຜູ້ຊ່ວຍລັດຖະມົນຕີວ່າການກະຊວງການຄ້າຈີນໄດ້ກ່າວວ່າ ໂຄງການກໍ່ສ້າງອາຄານເຮັດວຽກຂອງສຳນັກງານສູນກາງພັກປະຊາຊົນປະຕິວັດລາວເປັນອີກໂຄງການໜຶ່ງອັນສຳຄັນທີ່ປະເທດຈີນຊ່ວຍເຫຼືອກໍ່ສ້າງ ນອກຈາກໂຄງການສູນປະຊຸມສາກົນ (ຫໍປະຊຸມແຫ່ງຊາດ), ເປັນໝາກຜົນແຫ່ງການຮ່ວມມືຂອງສອງພັກ ແລະລັດຖະບານຈີນ-ລາວໃນຍຸກສະໄໝໃໝ່, ຝ່າຍຈີນຍິນດີເພີ່ມທະວີມິດຕະພາບແລະການຮ່ວມມືລະຫວ່າງສອງພັກ ແລະລັດຖະບານຈີນ-ລາວຕື່ມອີກ, ໃຫ້ການຊ່ວຍເຫຼືອຕາມຄວາມສາມາດຂອງຕົນແກ່ພາລະກິດສັງຄົມນິຍົມແລະການພັດທະນາດ້ານເສດຖະກິດ-ສັງຄົມຂອງລາວ.
ຕາມຂ່າວແຈ້ງວ່າ ໂດຍຕອບສະໜອງຕາມຄວາມຮຽກຮ້ອງຈາກສູນກາງພັກປະຊາຊົນປະຕິວັດລາວ, ສູນກາງພັກກອມມູນິດຈີນເຫັນດີຊ່ວຍເຫຼືອກໍ່ສ້າງໂຄງການອາຄານເຮັດວຽກຂອງສຳນັກງານສູນກາງພັກປະຊາຊົນປະຕິວັດລາວ, ເຊິ່ງໂຄງການນີ້ໄດ້ກວມເນື້ອທີ່ 22.000 ຕາແມັດ, ນອກຈາກມີຫ້ອງເຮັດວຽກປະເພດຕ່າງໆແລ້ວຍັງສ້າງໃຫ້ມີຫ້ອງປະຊຸມທີ່ສາມາດບັນຈຸໄດ້ພັນຄົນແລະສະຖານທີ່ປະຊຸມຫຼາຍແຫ່ງອີກດ້ວຍ, ພາຍຫຼັງໂຄງການດັ່ງກ່າວນີ້ສ້າງສຳເລັດແລ້ວ ຈະສາມາດປັບປຸງເງື່ອນໄຂການເຮັດວຽກຂອງສູນກາງພັກປະຊາຊົນປະຕິວັດລາວໃຫ້ດີຂຶ້ນຢ່າງຫຼວງຫຼາຍ.
