ພິທີຕ້ອນຮັບໄດ້ຈັດຂຶ້ນຢ່າງສົມກຽດແລະຈາກນັ້ນ,ໄດ້ມີການພົບປະສອງຝ່າຍເຊິ່ງ ທັງສອງ ກອງທັບ ລາວ-ຈີນ ໄດ້ແຈ້ງສະພາບພົ້ນເດັ່ນທາງການເມືອງ,ເສດຖະກິດ-ສັງຄົມຂອງສອງປະເທດໂດຍສະເພາະວຽກງານປ້ອງກັນຊາດທີ່ຕ່າງຝ່າຍສົນໃຈ ແລະ ໄດ້ທົບທວນຄືນການຮ່ວມມືລະຫວ່າງ ສອງກະຊວງປ້ອງກັນປະເທດ ລາວ-ຈີນ,ຈີນ-ລາວ ໃນໄລຍະຜ່ານມາແລະທິດທາງການຮ່ວມມືໃນຕໍ່ຫນ້າ.ທັງນີ້ເພື່ອເພີ່ມທະວີການຮ່ວມມືດ້ານການທະຫານຢ່າງຮອບດ້ານລະຫວ່າງສອງກະຊວງປ້ອງກັນປະເທດ ລາວ-ຈີນ ໃຫ້ມີຄວາມເຂັ້ມແຂງ ແລະ ຂະຫຍາຍຕົວຢ່າງບໍ່ຢຸດຢັ້ງ. ສອງຝ່າຍຍັງໄດ້ ລົງນາມແຜນການຮ່ວມມືແລກປ່ຽນຄະນະຜູ້ແທນການທະຫານຂັ້ນສູງ,ການກໍ່ສ້າງບຸກຄະລາກອນ,ປັບປຸງກົນໄກການຮ່ວມມືປ້ອງກັນຊາຍແດນໃຫ້ສົມບູນ,ວຽກງານການເມືອງ ແລະ ສປ ຈີນ ເຫັນດີຈະສືບຕໍ່ຊ່ວຍເຫລືອທາງດ້ານອຸປະກອນເຕັກນິກການທະຫານ ໃຫ້ແກ່ກອງທັບປະຊາຊົນ ລາວ.
