ປີໜ້າ ຄືປີ 2018, ການປະຕິຮູບແລະເປີດປະຕູຕໍ່ພາຍນອກຂອງພວກເຮົາຈະດຳເນີນຄົບຮອບ 40 ປີແລ້ວ. ຂະນະທີ່ການປະຕິຮູບແລະເປີດປະຕູຕໍ່ພາຍນອກ ເປັນມາດຕະການສຳຄັນທີ່ກຳນົດຊາຕາກຳຂອງຈີນໃນຍຸກປັດຈຸບັນ ໂດຍໃນ 40 ປີຜ່ານມາ, ການປະຕິຮູບແລະເປີດປະຕູຕໍ່ພາຍນອກໄດ້ເຮັດໃຫ້ຊີວິດການເປັນຢູ່ຂອງປະຊາຊົນຈີນບັນລຸລະດັບອີ່ມໜຳສຳລານ ທັງຮັ່ງມີຂຶ້ນເປັນກ້າວໆ. ພວກເຮົາຈະສະຫຼຸບ ແລະຖອດຖອນບົດຮຽນ, ບຸກໜ້າບືນຕົວ, ສືບຕໍ່ຊຸກຍູ້ລະບົບການຄຸ້ມຄອງປະເທດແລະຄວາມສາມາດການຄຸ້ມຄອງຂອງລັດໃຫ້ເປັນທັນສະໄໝ, ລົງເລິກການປະຕິຮູບດ້ານຕ່າງໆຢ່າງເດັດດ່ຽວ, ເປີດກວ້າງການເປີດປະຕູຕໍ່ພາຍນອກຢ່າງເດັດດ່ຽວ, ເຮັດໃຫ້ການປະຕິຮູບ ແລະ ການເປີດປະຕູຕໍ່ພາຍນອກ ຕ່າງຍູ້ໜູນກັນ ແລະຕ່າງກໍມີປະສິດທິຜົນຍິ່ງຂຶ້ນ. ຂ້າພະເຈົ້າເຊື່ອໝັ້ນຢ່າງໜັກແໜ້ນວ່າ, ການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງຊົນຊາດຈີນ ຍ່ອມຈະບັນລຸຜົນເປັນຈິງໃນຂະບວນການປະຕິຮູບແລະເປີດປະຕູຕໍ່ພາຍນອກ.
ປີ2019, ພວກເຮົາຈະສະຫຼອງວັນຄົບຮອບ 70 ປີແຫ່ງການສະຖາປະນາສາທາລະນະລັດປະຊາຊົນຈີນ. ພວກເຮົາຈະປະຕິບັດທັດສະນະພັດທະນາອັນໃໝ່, ຊຸກຍູ້ເສດຖະກິດຈີນພັດທະນາຢ່າງຕໍ່ເນື່ອງແລະປອດໃສ, ມີຜົນດີຕໍ່ປະຊາຊົນຈີນແລະບັນດາປະເທດ. ພວກເຮົາຈະສືບຕໍ່ຈັດຕັ້ງປະຕິບັດທຸກໜ້າທີ່ຕາມແຜນການ " 5 ຄັ້ງທີ 13" ທີ່ໄດ້ກຳນົດແລະວາງແຜນໃໝ່ໃຫ້ແກ່ການພັດທະນາໃນອະນາຄົດ, ຊຸກຍູ້ພາລະກິດຕ່າງໆພັດທະນາຢ່າງຮອບດ້ານ, ສ້າງສາທາລະນະລັດປະຊາຊົນຂອງພວກເຮົາໃຫ້ຈະເລີນຮຸ່ງເຮືອງແລະມັ່ງຄັ່ງເຂັ້ມແຂງກວ່າເກົ່າ.
ປີ 2020, ພວກເຮົາຈະສ້າງສັງຄົມທີ່ອີ່ມໜຳສຳລານຢ່າງຮອບດ້ານ. ການສ້າງສັງຄົມທີ່ອີ່ມໜຳສຳລານຢ່າງຮອບດ້ານ, ນັ້ນຈະໃຫ້ຂາດຜູ້ດຽວບໍ່ໄດ້; ໃນເສັ້ນທາງສູ່ການກາຍເປັນຮັ່ງມີ, ຜູ້ໃດຕົກຂະບວນບໍ່ໄດ້. ພວກເຮົາຈະເຮັດສຸດກຳລັງຂອງທົ່ວພັກແລະທົ່ວປະເທດ, ສຳເລັດໜ້າທີ່ຫຼຸດອອກຈາກຄວາມທຸກຍາກຢ່າງເດັດດ່ຽວ, ຮັບປະກັນເຮັດສຳເລັດຕາມຄຳໝັ້ນສັນຍາຂອງພວກເຮົາ. ພວກເຮົາຕ້ອງຈື່ຈຳຄວາມໃຝ່ຝັນຂອງປະຊາຊົນຕໍ່ຊີວິດການເປັນຢູ່ອັນດີງາມແມ່ນເປົ້າໝາຍບຸກບືນສູ້ຊົນຂອງພວກເຮົາ, ຍຶດໝັ້ນແນວຄິດພັດທະນາທີ່ຖືປະຊາຊົນເປັນກົກໃຈ, ພະຍາຍາມຮັບປະກັນວຽກງານຮັກສາແລະປົວແປງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ເພີ່ມຄວາມຮູ້ສຶກວ່າໄດ້ຮັບຜົນປະໂຫຍດ, ມີຄວາມສຸກ, ມີຄວາມປອດໄພຂອງປະຊາຊົນຢ່າງບໍ່ຢຸດຢັ້ງ, ຊຸກຍູ້ປະຊາຊົນທຸກຄົນອຸດົມຮັ່ງມີຮ່ວມກັນ. ຂ້າພະເຈົ້າເຊື່ອໝັ້ນວ່າ, ຊີວິດການເປັນຢູ່ຂອງປະຊາຊົນຈີນໃນແຕ່ລະປີຍ່ອມຈະດີກວ່າປີຜ່ານມາຢ່າງແນ່ນອນ.
ໃນປີ 2021, ພວກເຮົາຈະກ້າວສູ່ປີແຫ່ງການສ້າງຕັ້ງພັກກອມມູນິດຈີນຄົບຮອບ 100 ປີ. ພັກກອມມູນິດຈີນມີຈຸດປະສົງເພື່ອສ້າງສາພາລະກິດອັນຍິ່ງໃຫຍ່ຂອງຊົນຊາດຈີນ, ມີອາຍຸ 100 ປີພໍດີແມ່ນອາຍຸແຫ່ງຄວາມເຂັ້ມແຂງ！ພັກກອມມູນິດຈີນເປັນພັກການເມືອງທີ່ໃຫຍ່ທີ່ສຸດໃນໂລກ. ພັກການເມືອງໃຫຍ່ຕ້ອງມີທ່າທີຂອງພັກການເມືອງໃຫຍ່。 ພຶດຕິກຳຕົວຈິງໄດ້ຢືນຢັນຢ່າງເຕັມທີ່ວ່າ, ພັກກອມມູນິດຈີນສາມາດນຳພາປະຊາຊົນຈີນດຳເນີນການປະຕິວັດສັງຄົມຢ່າງຍິ່ງໃຫຍ່ແລະກໍສາມາດດຳເນີນການປະຕິວັດຕົນເອງຢ່າງຍິ່ງໃຫຍ່. ພວກເຮົາຕ້ອງຮັກສາຄວາມກະຕືລືລົ້ນນີ້ໂດຍຕະຫຼອດ, ເປັນຜູ້ຮັບໃຊ້ປະຊາຊົນ, ເປັນຜູ້ນຳໜ້າໃນໄລຍະໃໝ່, ເປັນເສົາຄ້ຳຂອງຊົນຊາດຕະຫຼອດໄປ. ຄຸ້ມຄອງພັກຢ່າງເຂັ້ມງວດໃນຮອບດ້ານໂດຍຕະຫຼອດ, ບໍຄວນມີແນວຄວາມຄິດທີ່ຢາກພັກຜ່ອນ. ພວກເຮົາຈະສືບຕໍ່ລົບລ້າງພະຍາດທັງໝົດທີ່ທຳລາຍສຸຂະພາບຂອງພັກ, ພະຍາຍາມສ້າງບັນຍາກາດນິເວດການເມືອງຢ່າງປອດໃສ, ນຳໃຊ້ກຳລັງທາງບວກຂອງທົ່ວພັກຢ່າງເຂັ້ມງວດເພື່ອເຕົ້າໂຮມກຳລັງອັນສະຫງ່າອົງອາດຂອງທົ່ວສັງຄົມຊຸກຍູ້ການພັດທະນາແລະຄວາມກ້າວໜ້າຂອງຈີນ.
ພັກກອມມູນິດຈີນແລະປະຊາຊົນຈີນໄດ້ຜ່ານຜ່າຄວາມຫຍຸ້ງຍາກ, ຮູ້ຮັກຫອມສັນຕິພາບແລະຄຸນຄ່າຂອງການພັດທະນາ. ປະຊາຊົນຈີນມີຄວາມເຊື່ອໝັ້ນແລະຄວາມເຄົາລົບເປັນເຈົ້າຕົນເອງ, ຈະຍຶດໝັ້ນປົກປ້ອງຜົນປະໂຫຍດຂອງຊາດດ້ານອະທິປະໄຕ, ຄວາມໝັ້ນຄົງແລະການພັດທະນາ, ພ້ອມກັນນັ້ນກໍຈະຮ່ວມກັບປະຊາຊົນປະເທດຕ່າງໆ. ຕັ້ງໜ້າຊຸກຍູ້ສ້າງປະຊາຄົມຮ່ວມຊາຕາກຳຂອງມວນມະນຸດ, ສືບຕໍ່ປະກອບສ່ວນໃໝ່ຍິ່ງໃຫຍ່ກວ່າເກົ່າເຂົ້າໃນພາລະກິດອັນຍິ່ງໃຫຍ່ເພື່ອສັນຕິພາບແລະການພັດທະນາຂອງມວນມະນຸດ.
ປະຫວັດສາດແມ່ນຂຽນດ້ວຍປະຊາຊົນ, ຄຸນງາມຄວາມດີທັງໝົດເປັນຂອງປະຊາຊົນ. ຂໍພຽງແຕ່ພວກເຮົາສ້າງຮາກແກ້ວຕໍ່ປະຊາຊົນຢ່າງເລິກເຊິ່ງ, ອາໄສປະຊາຊົນຢ່າງໃກ້ຊິດ,ກໍ່ສາມາດໄດ້ຮັບກຳລັງນັບບໍ່ຖ້ວນ, ຜ່ານຜ່າທຸກຄວາມຫຍຸ້ງຍາກ, ອົງອາດກ້າຫານມຸ່ງໄປສູ່ທາງໜ້າ. ສຸພາສິດຈີນເວົ້າວ່າ ໄດ້ຍິນຮ້ອຍເທື່ອບໍ່ທໍ່ຕາເຫັນເທື່ອດຽວ,ຫຼືສຸພາສິດລາວເວົ້າວ່າສິບປາກເວົ້າບໍ່ທໍ່ຕາເຫັນ. ພວກເຮົາຍິນດີຕ້ອນຮັບນັກຂ່າວທຸກທ່ານໄປເບິ່ງຈີນເລື້ອຍໆ, ສືບຕໍ່ເອົາໃຈໃສ່ຕໍ່ການພັດທະນາ ແລະ ການປ່ຽນແປງຂອງຈີນຫຼັງກອງປະຊຸມໃຫຍ່ພັກກອມມູນິດຈີນຄັ້ງທີ 19, ຮູ້ດີ ແລະ ລາຍງານຈີນຢ່າງຮອບດ້ານກວ່າເກົ່າ. ພວກເຮົາບໍ່ຕ້ອງການຄຳຍ້ອງຍໍສັນລະເສີນ, ພວກເຮົາຍິນດີຕ້ອນຮັບການແນະນຳທີ່ພາວະວິໄສ ແລະ ຂໍ້ສະເໜີທີ່ມີຜົນປະໂຫຍດມາໂດຍຕະຫຼອດ ເຊິ່ງອັນທີ່ເອີ້ນວ່າ "ບໍ່ຕ້ອງການຜູ້ອື່ນມາຍ້ອມສີໃຫ້ງາມ,ພຽງແຕ່ໃຫ້ມີຄວາມປອດໃສຂາວສະອາດຢູ່ໃນໂລກ."
