ວັນທີ 30 ກັນຍານີ້ເປັນ "ວັນລະລຶກຜູ້ເສຍສະຫຼະເພື່ອການປະຕິວັດ"ຄັ້ງທຳອິດ ທີ່ລັດຖະບານຈີນສ້າງຕັ້ງຂຶ້ນ, ພໍດີຖືກກັບໂອກາດວັນສະຖາປະນາສາທາລະນະລັດປະຊາຊົນ ຈີນຄົບຮອບ 65 ປີ. ຕອນເຊົ້າວັນທີ 30 ກັນຍານີ້, ຜູ້ນຳພັກແລະລັດຖະບານຈີນເຊັ່ນທ່ານສີຈິ້ນຜິງ, ທ່ານລີເຄີ້ສຽງ, ທ່ານຈ່າງເຕີຈ່ຽງ,ທ່ານຢູເຈີ້ງເຊິ່ງ, ທ່ານຫຼິວຢຸນຊ່ານ, ທ່ານຫວາງສີຊ່ານ, ທ່ານຈ່າງກ່າວລີ້ແລະທ່ານອື່ນໆໄດ້ເດີນທາງໄປເຖິງສະໜາມຫຼວງທ່ຽນອ່ານເມິນນະຄອນຫຼວງປັກກິ່ງແລະໄດ້ຮ່ວມກັບຜູ້ແທນວົງການຕ່າງໆຂອງນະຄອນຫຼວງປັກກິ່ງວາງກະຕ່າດອກໄມ້ຕໍ່ອະນຸສາວະລີວິລະຊົນ.
ພິທີວາງກະຕ່າດອກໄມ້ໄດ້ເລີ່ມແຕ່ເວລາປະມານ 10 ໂມງ. ກອງດຸລິຍາງທະຫານໄດ້ບັນເລັງເພງຊາດຈີນ. ໄປພ້ອມໆກັບທຳນອງເພງທີ່ເຄັ່ງຂຶມ, ທ່ານສີຈິ້ນຜິງພ້ອມການນຳພັກ-ລັດທ່ານອື່ນໆແລະຜູ້ແທນວົງການຕ່າງໆໄດ້ພ້ອມກັນຮ້ອງເພງຊາດສາທາລະນະລັດປະຊາຊົນຈີນ .
ເພງຊາດຈົບລົງ,ທຸກໆຄົນຢືນສະຫງົບເຄັ່ງຂຶມເພື່ອໄວ້ອາໄລຕໍ່ຜູ້ເສຍສະຫຼະຊີວິດເພື່ອພາລະກິດປົດປ່ອຍປະຊາຊົນຈີນແລະພາລະກິດກໍ່ສ້າງສາທາລະນະລັດປະຊາຊົນຈີນດ້ວຍຄວາມພິລະອາດຫານ.
ກອງເຍົາວະຊົນພ້ອມຜູ້ແທນປະຊາຊົນວົງການຕ່າງໆໄດ້ຍ່າງໄປເຖິງຕໍ່ໜ້າອະນຸສາວະລີແລະວາງດອກໄມ້ຕາມລຳດັບເພື່ອລະລຶກເຖິງຄຸນງາມຄວາມດີຂອງຜູ້ເສຍສະຫຼະເພື່ອການປະຕິວັດ ແລະສຳນຶກເຖິງບຸນຄຸນທີ່ນຳເອົາຊີວິດການເປັນຢູ່ທີ່ມີຄວາມຜາສຸກທີ່ໄດ້ມາບໍ່ແມ່ນງ່າຍໃນທຸກມື້ນີ້.