ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານສີຈິ້ນຜິງເວົ້າວ່າ, ທ່ານບໍ່ເຄີຍລືມບ້ານຫຼຽງເຈ່ຍເຫີແລະພໍ່ແມ່ຊາວບ້ານຫຼຽງເຈ່ຍເຫີຈົນເທົ້າໃດໆ, ບໍ່ວ່າຈະໄປຮອດໃສຈະຢູ່ບ່ອນໃດ, ບໍ່ວ່າຈະຈາກກັນດົນປານໃດກໍຕາມ, ກໍ່ຍັງຈະມີຄວາມຫ່ວງໃຍມາຫາຕະຫຼອດໂດຍຂ້າມຜ່ານພູພັນໜ່ວຍນ້ຳໝື່ນສາຍ.
ມີເທື່ອໜຶ່ງ, ເມຍຂອງຫຼຽງຢ້າວສາຍເຈັບໜັກ, ເມື່ອທ່ານສີຈິ້ນຜິງຮູ້ຂ່າວແລ້ວ ກໍ່ໄດ້ຝາກເງິນມາຊ່ວຍເຫຼືອ 1.000 ຢວນ. ປີ 2015, ທ່ານສີຈິ້ນຜິງກັບໄປຢາມບ້ານຫຼຽງເຈ່ຍເຫີ, ຫຼຽງຢ້າວສາຍຈັບມືທ່ານສີຈິ້ນຜິງແລະເວົ້າວ່າ: “ເງິນທີ່ອ້າຍຝາກມາໃຫ້ນ້ອງໃນປີນັ້ນໄດ້ຮັບແລ້ວ, ຄວາມຮັກຄວາມແພງຂອງອ້າຍ, ນ້ອງຈະບໍ່ຫຼົງລືມຈົນເທົ້າໃດໆ”. ຫຼຽງຢູ້ມິງເຄີຍໄປຢາມທ່ານສີຈິ້ນຜິງຫຼາຍເທື່ອ, ພົບກັນເທື່ອໃດ, ທ່ານສີຈິ້ນຜິງກໍ່ຕ້ອງຖາມເຖິງປະຊາຊົນ ແລະເລື່ອງຕ່າງໆໃນບ້ານຢ່າງລະອຽດ. ຖ້າຮູ້ວ່າຊີວິດການເປັນຢູ່ຂອງຊາວບ້ານມີຄວາມຫຍຸ້ງຍາກ, ທ່ານກໍ່ຮູ້ສຶກບໍ່ສະບາຍໃຈ; ຖ້າວ່າຊີວິດການເປັນຢູ່ຂອງຊາວບ້ານດີຂຶ້ນ, ທ່ານກໍ່ດີໃຈນຳ.
ປີ 2019, ທ່ານສີຈິ້ນຜິງຖ່າຍຮູບຮ່ວມກັບໝູ່ທີ່ເຄີຍຫຼິ້ນນຳກັນມາແຕ່ນ້ອຍຢູ່ນະຄອນຢຽນອ່ານ
ເດືອນພະຈິກ 2009, ທ່ານສີຈິ້ນຜິງໄປເຄື່ອນໄຫວເຮັດວຽກ ແລະສຳຫຼວດຄົ້ນຄວ້າຢູ່ນະຄອນຢຽນອ່ານ, ຍ້ອນເວລາຈຳກັດ, ທ່ານບໍ່ສາມາດໄປເຖິງບ້ານຫຼຽງເຈ່ຍເຫີ. ແຕ່ວ່າ ທ່ານກໍ່ໄດ້ເຊີນ “ໝູ່ທີ່ເຄີຍຫຼີ້ນນຳກັນມາແຕ່ນ້ອຍ” ມາຫາຢູ່ນະຄອນຢຽນອ່ານ. ໃນເວລາໂອ້ລົມສົນທະນາກັນກັບເຂົາເຈົ້າ, ທ່ານສີຈິ້ນຜິງໄດ້ຝາກຄຳເວົ້າໄວ້ເທື່ອແລ້ວເທື່ອອີກວ່າ: “ອອກຄວາມຄິດເຫັນຊ່ວຍບ້ານຫຼຽງເຈ່ຍເຫີໃຫ້ຫຼາຍແດ່, ຊ່ວຍສືຊຸ່ນຢາງແກ້ໄຂວຽກບ້ານໃຫ້ດີ.”
ວູຮຸ່ຍ ທີ່ຊາວບ້ານມັກເອີ້ນເປັນ “ແທໂສ້” ຫຼື “ກະແຈເຫຼັກ” ບອກວ່າ, ຂໍແຕ່ວ່າຊາວບ້ານພົບຄວາມຫຍຸ້ງຍາກແລ້ວໄປຫາທ່ານສີຈິ້ນຜິງ, ເພິ່ນກໍ່ຈະໃຫ້ຄວາມຊ່ວຍເຫຼືອ. ຂໍແຕ່ວ່າຂຽນຈົດໝາຍໄປຫາ, ເພິ່ນກໍ່ຕອບມາທຸກຄັ້ງ. ວັນທີ 28 ສິງຫາ 2007, ວັນທີ 12 ກໍລະກົດ 2008, ວັນທີ 2 ພຶດສະພາ 2011, ແລະວັນທີ 5 ພຶດສະພາ 2014, ທ່ານສີຈິ້ນຜິງໄດ້ຂຽນຈົດໝາຍໄປຫາບ້ານຫຼຽງເຈ່ຍເຫີ 4 ເທື່ອ, ຫວັງຢາກໃຫ້ຊາວບ້ານໄດ້ດຳລົງຊີວິດອິ່ມໜຳສຳລານໂດຍໄວເທົ່າທີ່ຈະໄວໄດ້.
ຄວາມຮັກຄວາມແພງຂອງທ່ານສີຈິ້ນຜິງ, ຊາວບ້ານຈື່ຈຳໄວ້ຕະຫຼອດ, ກໍ່ເໝືອນດັ່ງຄຳເວົ້າຂອງພວກເຂົາເຈົ້າທີ່ວ່າ: “ຈິດໃຈຂອງຈິ້ນຜິງຢູ່ນຳຫຼຽງເຈ່ຍເຫີຕະຫຼອດເວລາ.”
ບ້ານຫຼຽງເຈ່ຍເຫີ
ສາຍນ້ຳຫຼຽງເຈ່ຍເຫີເຊື່ອງຢູ່ໃນຮ່ອມພູທັງຍາວທັງແຄບ, ຖ້າເລີ່ມຈາກປາກຮ່ອມຍ່າງເຂົ້າໄປໃນ, ຮ່ອມພູບາງຕອນກວ້າງບາງຕອນແຄບ, ແລະຍັງມີຮ່ອມນ້ອຍທີ່ສະຫຼັບສັບຊ້ອນແຈກຍາຍອອກໄປ, ບ້ານຫຼຽງເຈ່ຍເຫີກໍ່ຕັ້ງຢູ່ຕອນທ້າຍຂອງຮ່ອມນີ້. ຈາກຕາແສງເວີນອ່ານຢີ້ໄປຫາບ້ານຫຼຽງເຈ່ຍເຫີປະມານ 8 ກິໂລແມັດ, ທາງເສັ້ນນ້ອຍຄັບແຄບນີ້ເປັນທາງດິນແດງ, ເມື່ອຄົນຍ່າງຜ່ານ, ຂີ້ຝຸ່ນກໍ່ປິວຂຶ້ນໃສ່ດັງເຂົາເຈົ້າທັນທີ.
ຖ້ຳເຮືອນທີ່ທ່ານສີຈິ້ນຜິງເຄີຍຢູ່ໃນເວລາລົງພື້ນຖານຢູ່ບ້ານຫຼຽງເຈ່ຍເຫີ
ບ້ານຫຼຽງເຈ່ຍເຫີມີທັງໝົດ 60 ຄອບຄົວ, ແລະປະຊາກອນ 200 ກວ່າຄົນ, ຢາຍກັນຢູ່ເຮືອນຖ້ຳທີ່ສ້າງຕິດກັບພູຢູ່ຕາມສອງຟາກນ້ຳ. ໃນເຮືອນຖ້ຳມີຕຽງທີ່ກໍ່ດ້ວຍດິນຈີ່, ຢູ່ກ້ອງຕຽງມີຮູລ່ວງເພື່ອໃຫ້ອາຍຮ້ອນຈາກເຕົາໄຟມາຮົມເພື່ອຄວາມອົບອຸ່ນໃນເວລານອນຍາມໜາວຂອງປະຊາຊົນພາກເໜືອສານຊີ່, ເມື່ອດັງໄຟແຕ່ງກິນ, ຕຽງກໍ່ຈະອຸ່ນພ້ອມ. ນີ້ແມ່ນຫົວຄິດປະດິດສ້າງດ້ານການດຳລົງຊີວິດຂອງປະຊາຊົນພາກເໜືອສານຊີ່. ທ່ານສີຈິ້ນຜິງແລະໄວໜຸ່ມປັນຍາຊົນອີກ 5 ຄົນກໍ່ນອນຮ່ວມຕຽງດຽວກັນ.
ຄວາມໜັກໜ່ວງດ້ານການອອກແຮງງານຂອງຊາວກະສິກອນໄດ້ເຮັດໃຫ້ສີຈິ້ນຜິງທີ່ຫາກໍ່ໄປຮອດບ້ານຫຼຽງເຈ່ຍເຫີຮູ້ສຶກຕົກໃຈແຮງ. ຊາວກະສິກອນຕື່ນແຕ່ເຊົ້າ, ຫາກໍ່ 6 ໂມງເຊົ້າ ເຂົາເຈົ້າກໍ່ລຸກຂຶ້ນໄປເຮັດວຽກຢູ່ເທິງພູ. ເມື່ອປີນຂຶ້ນເທິງພູ, ຄົນກໍ່ຫາຍໃຈຍາກແລະເມື່ອຍຫຼາຍແລ້ວ, ແຕ່ຍັງຕ້ອງເຮັດວຽກ, ຈົນຮອດເວລາກິນເຂົ້າທ່ຽງ, ບໍ່ມີເວລາພັກຜ່ອນເລີຍ.
ຢູ່ຊົນນະບົດບໍ່ມີເງື່ອນໄຂສະດວກໃນການອາບນ້ຳ, ໃນຍາມໜາວ, ກໍ່ຕົ້ມນ້ຳ, ໃຊ້ຜ້າເຊັດໂຕກໍ່ແລ້ວໄປ. ເມື່ອອາກາດອຸ່ນຂຶ້ນ, ພວກໄວໜຸ່ມປັນຍາຊົນທັງຫຼາຍກໍ່ຈະໄປອາບນ້ຳຢູ່ແຄມສາຍນ້ຳ, ເຖິງວ່າໄດ້ນຸ່ງສົ້ງລອຍນ້ຳ, ແຕ່ຊາວບ້ານຍັງຫົວຂວັນເຂົາເຈົ້າວ່າ ເປັນໄວໜຸ່ມແລ້ວຍັງປະໂຕ, ຈາກນັ້ນ ເຂົາເຈົ້າກໍ່ບໍ່ໄດ້ໄປອາບຄືແນວນັ້ນອີກ.
ການຖູແຂ້ວກໍ່ເກືອບເປັນເລື່ອງທີ່ຖືກຫົວຂວັນ. ຄົນໃນບ້ານບໍ່ເຂົ້າໃຈເລື່ອງການຖູແຂ້ວແມ່ນຫຍັງ, ຕອນເຊົ້າເຫັນໄວໜຸ່ມປັນຍາຊົນຖູແຂ້ວ ກໍ່ເວົ້າກັນວ່າ “ໄວໜຸ່ມປັນຍາຊົນພວກນີ້ບໍ່ຮູ້ເປັນຫຍັງ, ຕອນເຊົ້າລຸກຂຶ້ນມາກໍ່ຄາຍຝອດຂາວ.” ອອກມາໂລດ.
ຕ້າຍມີງທີ່ເປັນໄວໜຸ່ມປັນຍາຊົນທີ່ໄປເຮັດວຽກຢູ່ບ້ານຫຼຽງເຈ່ຍເຫີໃນໄລຍະດຽວກັນບອກວ່າ, ທ່ານສີຈິ້ນຜິງບໍ່ເຄີຍຈົ່ມທຸກຈົ່ມຍາກຈັກເທື່ອ, ເປັນຄົນເຂັ້ມແຂງຫຼາຍ. ຊາວບ້ານໃຜກໍ່ຮູ້ສຶກວ່າ ໃນໂຕສີຈິ້ນຜິງບໍ່ມີ “ກິ່ນຕົວເມືອງ”ທີ່ເຮັດໃຫ້ຄົນບໍ່ກ້າເຂົ້າມາໃກ້ຊິດ.
ບ້ານຫຼຽງເຈ່ຍເຫີມີຜູ້ບ່າວຜູ້ໜຶ່ງຊື່ວ່າ “ຫຼີງຫວາ”, ຫຼີງຫວາເປັນຄົນປັນຍາອ່ອນ, ບໍ່ຢາກເວົ້າຫຍັງກະເວົ້າໂລດ ບໍ່ຮູ້ຖືກຮູ້ຜິດ, ຢາກເຮັດຫຍັງກະເຮັດຕາມໃຈຕົນເອງ, ເຮັດວຽກຫຍັງຊ້ຳພັດເຮັດໄດ້ດີຫຼາຍ. ທ່ານສີຈິ້ນຜິງແລະໄວໜຸ່ມປັນຍາຊົນຫຼາຍຄົນລ້ວນແຕ່ມັກສູບຢາ, ໃນເວລາພັກຜ່ອນ, ເຂົາເຈົ້າມັກມ້ວນຢາມາສູບ. ບາງເທື່ອ, ທ່ານສີຈິ້ນຜິງມ້ວນຢາແລ້ວ, ຄາບຢູ່ປາກ ຫາກໍ່ສູບ, ກໍ່ຖືກຫຼີງຫວາແລ່ນມາຍາດໄປ, ແລ້ວຢ່ອງຖີ້ມທັນທີ. ເລື່ອງແບບນີ້ເກີດຂຶ້ນເລື້ອຍໆ, ແຕ່ບໍ່ມີໃຜເຫັນທ່ານສີຈິ້ນຜິງເຄີຍຄຽດ ຫຼືໃຈຮ້າຍຈັກເທື່ອ.
ຄຳເຫັນ
0