ຕາມການລາຍງານຂ່າວຈາກຂ່າວສານສູນກາງເກົາຫຼີ ຫຼື KCNAໃຫ້ຮູ້ວ່າ: ກົມໃຫຍ່ເສນາທິການກອງທັບປະຊາຊົນ ສປປ ເກົາຫຼີຢືນຢັນໃນວັນທີ 7 ມັງກອນນີ້ວ່າ: ມື້ດຽວກັນ, ກອງປ້ອງກັນຝັ່ງທະເລຕາເວັນຕົກສຽງໃຕ້ຂອງກອງທັບປະຊາຊົນ ສປປ ເກົາຫຼີໄດ້ດຳເນີນການຝຶກຊ້ອມຍິງປືນດ້ວຍລູກປືນແທ້ຕໍ່4 ເຂດເປົ້າໝາຍຢູ່ເຂດທະເລຕາເວັນຕົກສຽງໃຕ້.

ກົມໃຫຍ່ເສນາທິການກອງທັບປະຊາຊົນ ສປປ ເກົາຫຼີໃຫ້ຮູ້ວ່າ: ການຝຶກຊ້ອມໄດ້ນຳໃຊ້ປືນໃຫຍ່ປ້ອງກັນຝັ່ງທະເລ 23 ກະບອກ, ໄດ້ຍິງລູກປືນ 88 ລູກ. ສຳລັບທິດທາງການຍິງປືນ, “ເຂດຍິງປືນຄັ້ງນີ້ບໍ່ໄດ້ກ່ຽວພັນເຖິງເສັ້ນຂີດແບ່ງຊາຍແດນທາງການທະຫານ, ບໍ່ໄດ້ເປັນໄພຂົ່ມຂູ່ຕໍ່ປະເທດທີ່ເປັນປໍລະປັກກັນ.”

ກົມໃຫຍ່ເສນາທິການກອງທັບປະຊາຊົນ ສປປ ເກົາຫຼີກ່າວຕື່ມວ່າ: ການຝຶກຊ້ອມຄັ້ງນີ້ຢູ່ໃນຂອບເຂດການຝຶກຊ້ອມທີ່ເປັນປົກກະຕິ ໂດຍໄດ້ປະຕິບັດຕາມແຜນການ.

ວັນທີ 7 ມັງກອນນີ້, ກົມໃຫຍ່ເສນາທິການປະສົມ ສ.ເກົາຫຼີ ໄດ້ອອກຄຳເຕືອນຕໍ່ ສປປ ເກົາຫຼີ ໂດຍຮຽກຮ້ອງໃຫ້ ສປປ ເກົາຫຼີຍຸດຕິການຍິງປືນ.