ວັນທີ 4 ມີນານີ້, ທ່ານໂອຊາມາ ຮາມດານ ເຈົ້າໜ້າທີ່ຂັ້ນສູງຂອງກຸ່ມຮາມາສກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງເບຣຸດ ປະເທດລີບັງວ່າ, ເຖິງວ່າອາເມຣິກາ ແລະ ອິດສະຣາແອນໄດ້ໃຊ້ຄວາມກົດດັນໂດຍຜ່ານຊ່ອງທາງຕ່າງໆມາໂດຍຕະຫຼອດ, ແຕ່ອິດສະຣາແອນບໍ່ສາມາດໃຊ້ກົນອຸບາຍດ້ານການເມືອງເພື່ອບັນລຸເປົ້າໝາຍທີ່ບໍ່ສາມາດສຳເລັດຜົນໄດ້ໃນດ້ານການທະຫານ.

ທ່ານໂອຊາມາ ຮາມດານກ່າວເນັ້ນໜັກອີກວ່າ, ປັດຈຸບັນ, ກຸ່ມຮາມາສພວມຕັ້ງໜ້າເຂົ້າຮ່ວມການເຈລະຈາຢຸດຍິງຮອບໃໝ່ລະຫວ່າງປາແລັດສະຕິນ ກັບ ອິດສະຣາແອນ, ແຕ່ຈະບໍ່ປະລະ ການຕໍ່ສູ້ຢູ່ເຂດກາຊາ. ທ່ານຍັງໄດ້ກ່າວປະນາມກອງທັບອິດສະຣາແອນທີ່ໂຈມຕີນະຄອນລາຟາທາງພາກໃຕ້ຂອງເຂດກາຊາໃນຫວ່າງບໍ່ດົນມານີ້.