|
ຫວ່າງກ່ອນນີ້ບໍ່ດົນ, ທ່ານສົມສະຫວາດ.ເລັ່ງສະຫວັດ ຮອງນາຍົກລັດຖະມົນຕີລາວໄດ້ມາເຂົ້າ ຮ່ວມກອງປະຊຸມສາກົນຂອງບັນດາພັກການເມືອງໃນທະວີບອາຊີຄັ້ງທີສາມຢູ່ປັກກິ່ງ,ທ່ານໄດ້ໃຫ້ສຳພາດໂດຍຈຳເພາະຕໍ່ນັກຂ່າວວິທະຍຸພວກເຮົາ,ໃນເວລາໃຫ້ສຳພາດ,ທ່ານສົມສະຫວາດໄດ້ຕີລາຄາສູງຕໍ່ນະໂຍ ບາຍການຕ່າງປະເທດຂອງຈີນ,ແລະໄດ້ສະເຫນີສະພາບການກະກຽມກອງປະຊຸມສຸດຍອດອາຊຽນຄັ້ງທີ 10 ທ່ີຈະຈັດຂຶ້ນຢູ່ລາວນັ້ນສູ່ພວກເຮົາຟັງ, ຕໍ່ໄປ ເຊີນຟັງບົດສຳພາດທ່ານສົມສະຫວາດເລັ່ງສະຫວັດ.
ນັກຂ່າວ:ວັນທີ 8 ຕຸລາປີ 2003 ຈີນປະກາດເຂົ້າຮ່ວມສົນທິສັນຍາມິດຕະພາບແລະການຮ່ວມມືອາຊີອາຄະເນຢ່າງເປັນທາງການ,ແລ້ວກາຍເປັນປະເທດເຊັນສັນຍາດ່ັງກ່າວປະເທດທຳອິດທ່ີຢູ່ນອກເຂດອາຊີອາຄະເນ,ທ່ານມີການວິຈານແນວໃດຕໍ່ນະໂຍບາຍການຕ່າງປະເທດຂອງຈີນທ່ີ"ມີໄມຕີຈິດຕໍ່ປະເທດໃກ້ຄຕຽງ ຖືປະເທດໃກ້ຄຽງເປັນເພື່ອນ""ຖືກຕ້ອງປອງດອງກັບບ້ານໃກ້ເຮືອນຄຽງ ຢູ່ຮ່ວມກັນກັບປະເທດໃກ້ຄຽງຢ່າງສະຫງົບ ເຮັດໃຫ້ປະເທດໃກ້ຄຽງຮ່ັງມີຂຶ້ນ"?
ທ່ານສົມສະຫວາດ:ອາຊຽນພວກເຮົາມີຄວາມຊົມຊື່ນຍິນດີທ່ີເຫັນວ່າຈີນໄດ້ເຂົ້າເປັນພາຄີຂອງສົນທິສັນຍາໄມຕີຈິດແລະການຮ່ວມມືຢູ່ອາຊີອາຄະເນ ເປັນປະເທດທຳອິດທ່ີຢູ່ນອກອາຊຽນ.ນີ້ເປັນການສະແດງວ່າຈີນມີຄວາມ ມຸງຫວັງຢາກສ້າງການພົວພັນເປັນມິດໄມຕີທ່ີດີກັບອາຊຽນ.
ຂ້າພະເຈົ້າໄດ້ຕິດຕາມວ່າ,ນັບແຕ່ກອງປະຊຸມໃຫຍ່ຄັ້ງທີ 16 ຂອງພັກກອມມູນິດຈີນ,ເພິ່ນໄດ້ມີທິດນຳການຕ່າງປະເທດໃຫມ່ທ່ີຖືກຕ້ອງແທ້,ເພິ່ນເວົ້າເລື່ອງຈະສ້າງຄວາມເປັນມິດໄມຕີກັບປະເທດເພື່ອບ້ານໃກ້ຄຽງ, ຢາກເປັນຄູ່ຮ່ວມທ່ີດີກັບປະເທດໃກ້ຄຽງ,ຢ່າກສ້າງຄວາມປອງດອງກັບປະເທດໃກ້ຄຽງ ເຮັດໃຫ້ປະເທດໃກ້ຄຽງມີຄວາມສະຫງົບ ມີຄວາມຈະເລີນຮັ່ງມີຂຶ້ນ.ອັນນີ້ແມ່ນທິດນຳທ່ີຖືກ ຕ້ອງທ່ີສຸດ,ບໍ່ວ່າປະເທດຈີນຫລືປະເທດອື່ນໃນອາຊຽນພວກເຮົາກໍ່ຢາກແບບດຽວກັນນັ້ນ,ແມ່ນຢາກມີຄວາມສະຫງົບ.ສະນັ້ນ ພວກເຮົາຈິ່ງຮຽກຮ້ອງຢາກໃຫ້ປະເທດຢູ່ນອກອາຊີອາຄະເນເຂົ້າເປັນພາຄີຂອງສົນທິສັນຍາໄມຕີຈິດແລະການຮ່ວມມືນີ້,ດຽວນີ້ ຫລັງຈາກຈີນແລ້ວ,ຕໍ່ມາກໍ່ມີອິນເດຍ ຍີ່ປຸ່ນ,ເດືອນ 11 ນີ້ ຢູ່ວຽງຈັນໃນໂອກາດຈັດກອງປະຊຸມສຸດຍອດອາຊຽນນັ້ນ,ລັດເຊຍກໍ່ຈະເຂົ້າເປັນພາຄີຂອງສົນທິສັນຍາດ່ັງກ່າວ.ອັນນີ້ແມ່ນເປັນການຕອບສະຫນອງຄວາມຕ້ອງການຂອງທາງອາຊຽນພວກເຮົາ.
ພ້ອມກັນນັ້ນ ຂ້າພະເຈົ້າກໍ່ຄິດວ່າ,ນະໂຍບາຍຫລືທິດນຳການຕ່າງປະເທດຂອງຈີນທ່ີໃຫ້ຄວາມສຳຄັນກ່ອນອື່ນຫມົດແກ່ການສ້າງບັນຍາກາດການພົວພັນເປັນມິດທ່ີດີກໍ່ປະເທດໃກ້ຄຽງແມ່ນຖືກຕ້ອງຫລາຍ.ເພາະບໍ່ມີປະເທດໃດຢາກສ້າງປະເທດຂອງຕົນ,ແຕ່ສະພາບແວດລ້ອມອ້ອມແອ້ມຕົນເອງມີແຕ່ເສິກສົງຄາມຫລືວ່າຜິດຂອງຕ້ອງຖຽງກັນ,ຈັ່ງໃດຈິ່ງສ້າງໄດ້?ອັນນີ້ແລະ, ສະນັ້ນນະໂຍບາຍຕ່າງປະເທດຂອງຈີນແມ່ນສອດຄ່ອງກັບສະພາບການປະຈຸບັນ.
1 2 3 4
|
