|
ທ່ານລີຊວນງຈ່ຽງແມ່ນນັກຮ້ອງຊາຍສຽງສູງທີ່ມີຊື່ສຽງຂອງຈີນ, ໃນຫລາຍສິບປີມານີ້, ລີລາຮ້ອງທີ່ມີເອກະລັກພິເສດຢ່າງເດັ່ນຊັດແລະຄວາມຫ້າວຫັນດ້ານສິນລະປະກຳຂອງທ່ານໄດ້ຮັບຄວາມນິຍົມຊົມຊອບຈາກຜູ່ຟັງຢູ່ພາຍໃນປະເທດຈີນແລະຕ່າງປະເທດ.ໃນຂະນະດຽວກັນ, ໃນດ້ານການສິດ ສອນວິຊາຮ້ອງເພງ, ທ່ານກໍ່ໄດ້ບຳລຸງສ້າງສິນລະປິນຮ້ອງເພງໄວຫນຸ່ມໄວກາງຄົນທີ່ມີຄວາມສາມາດຕົວຈິງແລະມີກຳລັງບົ່ມຊ້ອນໃນການພັດທະນາຫລາຍສົມຄວນງວດຫນຶ່ງໃຫ້ເວທີຮ້ອງເພງຂອງຈີນ.
ທີ່ທ່ານພວມຟັງຢູ່ນີ້ແມ່ນເພງດາວແດງເຍືອງແສງສົ່ງທາງຂ້ອຍໄປສູ້ລົບທີ່ຂັບຮ້ອງໂດຍທ່ານລີຊວງຈ່ຽງ,ເພງນີ້ແມ່ນເພງປະກອບຮູບເງົາເລື່ອງດາວແດງເຫລື້ອມຍິບຍັບ ເຊິ່ງເປັນຮູບເງົາກ່ຽວກັບການທະຫານໃນຊຸມປີ 70 ສະຕະວັດແລ້ວນີ້,ຄຽງຄູ່ກັບຮູບເງົານີ້ໄດ້ຮັບຄວາມນິຍົມຈາກຜູ່ຊົມ, ຊື່ຂອງທ່ານລີຊວງຈ່ຽງກໍ່ໄດ້ເຜີຍແຜ່ໄປຮອດແຫ່ງຕ່າງໆທົ່ວປະເທດຈີນ. ຕໍ່ຈາກນັ້ນ, ທ່ານລີຊວງຈ່ຽງໄດ້ຮ້ອງເພງກ່ຽວກັບການທະຫານຢ່າງຫລວງຫລາຍ, ນີ້ແມ່ນແຍກອອກຈາກຊີວິດໃນກອງທະຫານຂອງທ່ານເປັນເວລາຫລາຍປີນັ້ນ ບໍ່ໄດ້.
ທ່ານລີຊວງຈ່ຽງເກີດໃນປີ 1939 ຢູ່ເມືອງຮາເອີປິນ ຕົວເມືອງພາກຕາເວັນອອກສຽງເຫນືອຂອງຈີນ,ທ່ານມັກສິນລະປະກຳຕັ້ງແຕ່ຍາມຍັງນ້ອຍ, ມັກຮ້ອງເພງຫລາຍ. ໃນເວລາຮຽນຢູ່ໂຮງຮຽນປະຖົມ,ທ່ານໄດ້ຮັບລາງວັນໃນການສະແດງສິນລະປະກຳຂັ້ນແຂວງແລະຂັ້ນເມືອງທຸກປີ. ໃນເວລາຮຽນຈົບຈາກໂຮງຮຽນມັດທະຍົມປາຍ, ທ່ານລີຊວງຈ່ຽງໄດ້ຖືກສົ່ງໄປຮຽນຢູ່ມະຫາວິທະຍາໄລແພດສາດໂດຍບໍ່ຕ້ອງເສັງຍ້ອນມີຜົນງານການຮຽນດີເດັ່ນ,ນີ້ກໍ່ແມ່ນຄວາມຫວັງຂອງພໍ່ເພິ່ນໃນຫລາຍປີມານີ້. ແຕ່ທ່ານລີຊວງຈ່ຽງພັດຕິດໃຈນຳດົນຕີ,ເພື່ອເຮັດໃຫ້ຄວາມຝັນຂອງຕົນບັນລຸຜົນເປັນຈິງ, ທ່ານໄດ້ປະລະໂອກາດຖືກສົ່ງໄປຮຽນຢູ່ມະຫາວິທະຍາໄລໂດຍບໍ່ຕ້ອງເສັງ,ແລ້ວສະສະຫມັກຊື່ເສັງເຂົ້າສະຖາບັນດົນຕີ. ການເລືອກເອົາຂອງເພິ່ນຖືກພໍ່ຂອງເພິ່ນຄັດຄ້ານຢ່າງເດັດດ່ຽວ, ແຕ່ໂດຍມີການສະຫນັບສະຫນູນຢ່າງລັບໆຂອງແມ່,ໃນທີ່ສຸດທ່ານລີຊວງຈ່ຽງໄດ້ສະຫມັກຊື່ເສັງເຂົ້າສະຖາບັນດົນຕີສູນກາງ,ແລະໄດ້ຜ່ານການສອບເສັງດ້ວຍຜົນງານອັນດີເດັ່ນ.
1 2 3 4
|
