|
 ເມືອງເກົ່າພິງຢາວຂອງແຂວງຊ່ານຊີ່ພາກເໜືອຂອງຈີນ,ແມ່ນບ່ອນທ່ອງທ່ຽວທີ່ຂ້ອນຂ້າງເຫີ່ກັນໃນໄລຍະມໍ່ໆນີ້.ເມືອງເກົ່າພິງຢາວແມ່ນເມືອງບູຮານທີ່ຖືກຮັກສາໄວ້ຄົບຖ້ວນກວ່າໝູ່ຢູ່ຈີນ,ຖືກຈັດເຂົ້າໃນ"ສາລະບານມໍລະດົກໂລກ".ເມືອງເກົ່າພິງຢາງມີສົມຍານາມເປັນ"ສິ່ງຍອດຢ້ຽມແລະສາງປະເສີດຂອງສິ່ງກໍ່ສ້າງບູຮານຈີນ",ຈຳນວນແລະຖານະຂອງຮ່ອງຮອຍວັດຖຸບູຮານລ້ວນແຕ່ຢູ່ໃນອັນດັບຍອດຢ້ຽມຢູ່ຈີນ.ໃນນັ້ນ,ກຳແພງເມືອງເກົ່າມີຂະໜາດໃຫຍ່ໂຕມະໂຫຖານ,ແມ່ນກຳແພງເມືອງທີ່ຖືກຮັກສາໄວ້ຄົບຖ້ວນກວ່າໝູ່ພາຍໃນປະເທດຈີນ;ວິຫານພະພຸດທະຮູບໝື່ນອົງຂອງວັດເຈີ້ນໂກແມ່ນສິ່ງກໍ່ສ້າງໄມ້ທີ່ລ້ຳຄ່າກວ່າໝູ່ທີ່ມີຢູ່ໃນປະຈຸບັນຂອງຈີນ,ຮູບຄວັດສີໃນວິຫານ ອາດເວົ້າໄດ້ວ່າແມ່ນຂອງຍອດຢ້ຽມ.ຢູ່ແຫ່ງນີ້ ຍັງມີທະນາຄານ"ຢື້ເຊີ່ງຊ່າງ" ທະນາຄານທີ່ຕັ້ງຂຶ້ນກ່ອນໝູ່ຂອງຈີນ.ປະຈຸບັນ,ເມືອງນີ້ບໍ່ພຽງແຕ່ໄດ້ກາຍເປັນສະຖານທີ່ຖ່າຍລະຄອນໂທລະພາບຈຳນວນຫຼວງຫຼາຍຂອງຈີນທໍ່ນັ້ນ,ຍິ່ງໄດ້ກາຍເປັນບ່ອນເລືອກກ່ອນໝູ່ຂອງຜູ້ມັກຂັບລົດໄປທ່ຽວຈຳນວນຫຼວງຫຼາຍອີກດ້ວຍ.
ທະນາຄານ"ຢື້ເຊີ່ງຊ່າງ"
ເມືອງເກົ່າພິງຢາວຕັ້ງຢູ່ພາກກາງແຂວງຊ່ານຊີ່,ໄກຈາກເມືອງໄທ້ຢວນ ເທດສະບານແຂວງໄປທິດໃຕ້ 90 ກິໂລແມັດ,ແມ່ນເມືອງບູຮານທີ່ຖືກຮັກສາໄວ້ຄົບຖ້ວນກວ່າໝູ່ຢູ່ຈີນ.ເມືອງບູຮານນີ້ສ້າງຕັ້ງຂຶ້ນເມື່ອ 2700 ກວ່າປີກ່ອນ,ໃນສະໄໝລາຊະວົງມິງແລະລາຊະວົງຊິງແມ່ນໄລຍະຈະເລີນກວ່າໝູ່.ສິ່ງກໍ່ສ້າງສ່ວນຫຼາຍໃນປະຈຸບັນ,ລ້ວນແຕ່ແມ່ນຕົກທອດມາແຕ່ສອງໄລຍະດັ່ງກ່າວ.
 ຖ້າຢາກຮູ້ເມືອງເກົ່າພິງຢາວຢ່າງຮອບດ້ານ,ທ່ານກໍຕ້ອງປິນຂຶ້ນກຳແພງເມືອງເກົ່າແລ້ວຫຼຽວລົງເບິ່ງທົ່ວເມືອງ.ເມືອງບູຮານທີ່ອ້ອມຮອບດ້ວຍກຳແພງ,ມີຮູບຄືຕົວເຕົ່າ.ເຮືອນຢູ່ ຮ້ານຄ້າຢູ່ໃນເມືອງກໍເໝືອນດັ່ງອອງເຕົ່າ.ປະຕູໃຕ້ແມ່ນຫົວເຕົ່າ,ນ້ຳສ້າງສອງບ່ອນຢູ່ນອກປະຕູເໝືອນດັ່ງສອງຕາຂອງເຕົ່າ.ປະຕູເໜືອຂອງເມືອງແມ່ນຫາງເຕົ່າ,ແມ່ນບ່ອນຕ່ຳສຸດຂອງທົ່ວເມືອງ,ນ້ຳອັ່ງທັງໝົດຢູ່ໃນເມືອງລ້ວນແຕ່ໄຫຼອອກເມືອງຈາກປະຕູນີ້.ຮູບແບບດັ່ງກ່າວໄດ້ສະແດງໃຫ້ເຫັນຄວາມໂຄລົບນັບຖືເຕົ່າຂອງບັນພະບຸລຸດເມືອງພິງຢາວ.ພວກເພິ່ນຫວັງອາໄສກຳລັງຂອງເທວະດາເຕົ່າ,ເຮັດໃຫ້ເມືອງພິງຢາວໝັ້ນແກ່ນເໝືອນດັ່ງກ້ອນຫີນ,ແລະມີຄວາມປອດໄພ.
ວິຫານພະພຸດທະຮູບໝື່ນອົງຂອງວັດເຈີ້ນໂກ
ຢູ່ໃນເມືອງທີ່ປິດລ້ອມ,ມີຖະໜົນໃຫຍ່ 4 ສາຍ ຖະໜົນນ້ອຍ 8 ສາຍແລະທາງຮ່ອມ 72 ສາຍໄຂວ່ກັນ,ມີພາລະບົດບາດອັນຈະແຈ້ງ,ແລະຈັດວາງຢ່າງຮຽບຮ້ອຍ.ເຮືອນຢູ່ເກົ່າແກ່າໃນເມືອງແມ່ນເດີ່ນບ້ານສີ່ຫຼ່ຽມທີ່ສ້າງດ້ວຍດິນຈີ່ສີຂຽວແລະດິນຂໍສີຂີ້ເຖົ່າໝົດ.ເດີ່ນບ້ານສີ່ຫຼ່ຽມທີ່ມີຢູ່ໃນປະຈຸບັນໃນທົ່ວເມືອງມີເກືອບ 4 ພັນແຫ່ງ,ໃນນັ້ນມີ 400 ກວ່າແຫ່ງໄດ້ຖືກຮັກສາໄວ້ໄດ້ດີສົມຄວນ.ເຮືອນຢູ່ຂອງປະຊາຊົນທີ່ສ່ອງແສງໃຫ້ເຫັນພາບຈະເລີນຮຸ່ງເຮືອງໃນໄລຍະລາຊະວົງມິງແລະລາຊະວົງຊິງເຫຼົ່ານີ້ ປະຈຸບັນລ້ວນແຕ່ກາຍເປັນເຮືອນພັກຮັບຕ້ອນນັກທ່ອງທ່ຽວ.ຜູ້ທີ່ເລືອກພັກຢູ່ໃນເມືອງ,ສ່ວນຫຼາຍຈະໄປພັກຢູ່ສິ່ງກໍ່ສ້າງບູຮານເກົ່າແກ່ເຫຼົ່ານີ້.
1 2 3 4
|
